Kukulisa Luso Lathu mu Utumiki​—Kutawira Mweneciro Nyumba Omwe ni Mkali

Thangwe Ranyi Mpsakufunika: Azinji omwe timbagumana nawo mu utumiki ni wanthu wa ulemu. Napo bziri tenepo, Jezu adaleweratu kuti wanthu winango an’dzatiwenga. (Juwau 17:14) Pa thangwe limweri tin’dzafunika lini kudabwa tikagumana na mweneciro nyumba omwe ni mkali. Tikagumana na wanthu ninga amwewa, tin’dzafunika kuwatawira mu njira yomwe ingakondwese ule omwe timbamuyimira, Yahova. (War. 12:17-21; 1 Pe. 3:15) Tikacita bzimwebzi tin’dzatcenkha bzomwe munthu mkali akhakhumba kuticitira. Ndipo bzimwebzi bzingapereke pomwe umboni bwabwino kuna mweneciro nyumbayo na wanthu omwe angatiwone, bziciwacitisa kufuna kudzatetekera pa nthawe inango akadzazungiridwa pomwe na Mboni zinango za Yahova.​—2 Wak. 6:3.

Momwe Mungacitire:

• Pitirizani kukhala na mkhalidwe wakuderekha na wauxamwali. Bzimwebzi bzin’dzathandiza kuti munthuyo abweze ukali bwace. Lekani kufuna kubwezera pa bzomwe mweneciro nyumba angacite. (Mpal. 7:9) Iye angakhale waukali pinango thangwe ra mabvuto yomwe akugumana nayo ayai pinango mwamufikira pa nthawe yakuphonyeka. Napo iye angakalipe thangwe ra mafala yomwe tamubweresera, tsono nthawe zizinji bzimwebzi bzimbacitika thangwe rakuti munthuyo adapumpsidwa.​—2 Wak. 4:4.

• Mutawireni na mafala yabwino na ya kutenda. (Mim. 15:1) Kodi mwamulamusa pa tulo ayai mwamugwatiza pa bzomwe iye akhacita? Napo tingapepese lini pa basa lomwe timbacita, tingapepese mwakubzicepswa tikafikira mweneciro nyumba pa nthawe yakuphonyeka. Kodi munthuyo adakalipa thangwe ra kubva nkhani zakunama pakulewa bza ife? Penu n’tenepo, mungalewe kuti: “Ndikubvesesa thangwe race mudakalipa. Na tenepo, ndikuwona kuti bzomwe imwepo mudabva pakulewa bza ife mpsacadidi lini. Ndingakufotokozereni?” Kodi iye ambalamba bzinango mwa bzibvero bzathu, ninga pa nkhani ya momwe tingakhalire na munthu wakucosedwa ayai pa nkhani ya kuikhidwa mulopa? Pinango mungamutawire tenepa: “Ndikubvesesa. Wanthu winango ana thupo libodzi-bodziro. Ndingakulatizeni bzomwe Bibliya limbapfunzisa pa nkhaniyi?”

• Penu munthuyo adakalipa kwene-kwene, bziri bwino timugoneke ndipo ticoke mwakusaya kuyeza kufuna kumutawira. Penu iye ankumbira kuti Mboni za Yahova zileke kudzamuzungira pomwe, mutsimikizireni kuti mundzalemekeza bzomwe iye akufunabzo.

Yezerani Kucita Bzimwebzi Mkati mwa Mwezi Wathunthu:

• Khalani na mbali za kuyezeza nkhani imweyi pa kunamata kwanu ninga banja.

• Mukacoka pa mui pomwe mweneciro nyumba adakalipa, cezeranani na mwanzanu omwe mwacoka naye mu utumiki momwe mungatawirire mweneciro nyumba omwe adakalipa mu njira yabwino.