Kukulisa Luso Lathu mu Utumiki—Kugawira Bukhu la Bibliya Limbapfunzisa Ciyani
Thangwe Ranyi Mpsakufunika: Bukhu la Bibliya Limbapfunzisa Ciyani ni cinthu cathu cakuyamba cakuphatisa basa pakupfunzisa. Na tenepo, pomwe tikanati kuyamba kupfunzisira munthu, cakuyamba tin’funika kumugawira. Tsono, tensenefe tin’funika kucita nyongo ya kukhala wa luso pakugawira bukhu la Bibliya Limbapfunzisa Ciyani. (Mim. 22:29) Ziripo njira zizinji za momwe tingacitire bzimwebzi ndipo apalizi wan’funika kuphatisa basa zomwe zingawathandize.
Momwe Mungacitire:
• Citani mbvunzo omwe ungacitise mweneciro mui kufunisisa kudziwa bzizinji koma ukhale mbvunzo omwe unkubveraniratu na msolo ubodzi wa m’bukhulo. Mungasankhule m’bodzi mwa mibvunzo yomwe iri kumayambiriro kwa msolo uli-wense. Pambuyo pa kubva mtawiro wa mweneciro nyumbayo, werengani vesi lakuthemera ndipo mulatizeni ndime ibodzi bzikakwanisika mucicezerana naye ndimeyo.
• Njira inango ni kuphatisa basa matsamba yakuyambirira kuti mukuze mtima wace wakufuna kubva ndipo mulatizeni mweneciro nyumbayo momwe bukhulo limbaperekera mitawiro ya m’Bibliya. Mwa ciratizo, mungalewe nkhani inango yakuipa yomwe idalewedwa mu notisiya tsapanopa mucimufotokozera kuti azinji ambakomedwa kubva mitawiro ya mibvunzo yomwe iri pa tsamba 3. Ayai mungalewe kuti munkuzungira anansi wanu kuti muwafotokozere kawonedwe kabwino ka tsogolo. Patsogolo pace, mulatizeni bzithunzi-thunzi bzomwe bziri pa tsamba 4-5 ndipo mubvunzeni kuti: “Kodi ni piciro liponi lomwe mungafune kuwona linkukwanisika?” Njira inango ni kulewa kuti munkuzungira wanthu mwacigwatho kuti muwathandize kugumana mitawiro ya mibvunzo yakufunika kwene-kwene pamoyo. Tenepo latizani mweneciro muiyo mibvunzo yomwe iri pa tsamba 6, ndipo mukumbireni kuti alewe mbvunzo omwe wamudekera.
• Phatisani basa mibvunzo kuti muyambise pfunziro la Bibliya. Mungalewe kuti: “Tinkulatiza anansi wathu momwe limbacitikira pfunziro la Bibliya. Kodi mudawona kale momwe limbacitikira? [Dikhirani atawire.] Penu muna tumphindi tung’ono’-ng’ono, ndingafune kukulatizani momwe limbacitikira mwakuphatisa basa Bibliya lanu.”
Yezerani Kucita Bzimwebzi Mkati mwa Mwezi Wathunthu:
• Khalani na mbali zakuyezezera upalizibu pa kunamata kwanu ninga banja.
• Mukakhala muli mu utumiki, uzanimbo mwanzanuyo bzomwe mun’funa kulewa kuna mweneciro mui. (Mim. 27:17) Cinjani upalizibo mukawona kuti bun’thandiza lini.