Kuthandiza Wale Womwe Wakanati Kukonzekera Kupfunza Bukhu Lakuti Baibulo Limaphunzitsa Chiyani
1. Kodi bukhu lakuti Baibulo Limaphunzitsa Chiyani limbabvumidwa paciyambi na wanthu wense? Fokotozani.
1 Kuti munthu akhale nyakunamata Yahova, an’funika kupfunza bzomwe Bibliya limbapfunzisa. Tsono winango ngwa m’bzipembedzo bzomwe si Bzacikristau ndipo wambaliwona lini Bibliya ninga Fala la Mulungu. Winango wambakhulupira lini Mulungu na pang’onopo ndipo walibe ulemu na Bibliya. Ngaponi mabukhu yomwe ngakuthandiza kwa wale womwe pakuyamba wambafuna lini kubvuma bukhu lakuti Baibulo Limaphunzitsa Chiyani? Nfundo ziri panyansizi n’zakucokera kwa apalizi wa m’madziko 200 yakusiyana-siyana.
2. Penu munthu an’tiuza kuti ambakhulupira lini Mulungu, kodi tingayezere kudziwa ciani? Ndipo thangwe ranyi?
2 Wale Womwe Wambakhulupira Lini Mulungu: Munthu akalewa kuti ambakhulupira lini Mulungu, bziri bwino kudziwa thangwe race. Kodi ni thangwe ra kuti ambakhulupira kuti moyo udacita kusanduka? Kodi iye ataya cikhulupiro kwa Mulungu thangwe ra kusaya cirungamo m’dzikoli ayai thangwe ra cinyengo m’bzipembedzo? Kodi iye ngwa ku dziko lomwe wanthu wambaletsedwa kukhulupira Mulungu? Pinango iye ambalamba lini kuti Mulungu alipo, koma akanati kuwona kufunika kwa kumukhulupira. Apalizi wazinji wambadziwa bzimwebzi mwakubvunza kuti: “Kodi mumbakumbuka tenepoyo nthawe zensenezi?” Mutetekereni, ndipo lekani kumugwata mafala. Tikadziwa thangwe ranyi munthuyo ambakhulupira lini Mulungu, tin’dzadziwa momwe tingamutawirire pabodzi na bukhu lomwe tingamusiyire.—Mimwani [Miyambo] 18:13.
3. Tingalatize tani ulemu kwa munthu pabodzi na bzomwe iye ambakhulupira?
3 Pakutawira, tcenkhani kucitisa kuti munthuyo abve ningati mukutsutsa makumbukidwe yaceyo. Nfundoyi idalewedwa na mpalizi munango wa ku Estados Unidos kuti: “Mpsakufunika kwene-kwene kulemekeza ufulu bwa wanthu bwakusankhula bzomwe wafune kukhulupira. M’mbuto mwa kulinga kuwakonwesa, bziri bwino kucita mibvunzo yomwe ingacitise wathuwo kukumbuka, wacifika pakuwona wokha momwe bzinthu bziriri.” Pambuyo pakutetekera mafala ya mweneciro nyumba, nyakunyang’anira wadera munango, kawiri-kawiri iye ambatawira mwakubvunza kuti: “Kodi mudakumbukambo kale penu bziridi tenepoyo?”
4. Kodi tingathandize tani wale womwe ni Abudista?
4 Nkhani yakulewa bza Mulungu njacilendo kwa wazinji womwe ni Abudista. Apalizi winango wa ku Grã-Bretanha pakupalizira wanthu amwewa, iwo wambaphatisa basa broxura lakuti Paz e Felicidade Eterna—Como Encontrá-las. Pambuyo pakucezerana mafala yakuyambirira, iwo wambacezeranambo gawo lakuti “Existe Realmente Um Grandioso Criador?,” na lakuti “Um Guia Para a Bênção de Toda a Humanidade.” Pambuyo pace, iwo wambakwanisa kulatiza bukhu lakuti Baibulo Limaphunzitsa Chiyani, na kumuuza mweneciro nyumbayo kuti: “Napo penu mumbakhulupira lini Mulungu, n’kwa phindu kupfunza Bibliya thangwe iro lina nfundo zakuthandiza kwene-kwene.” Mpainiya munango wa ku Estados Unidos omwe ankutumikira ku gawo la Maxineji, adati: “Wazinji m’gawo lathu wambafuna kulewenga. Tenepo, kawiri-kawiri iwo wambalewenga bukhu lense pomwe tikanati kuwazungira pomwe kaciwiri. Tsono iwo wambaibvesesa lini nkhani ya kupfunza Bibliya. Tenepo, ndimbafuna kuwapasa broxura lakuti Bzipsa Bzabwino pa ulendo bwakuyamba thangwe iro lidanembedwa mu njira yakulimbisa kufuna kucezerana.” Nyakunyang’anira wadera munango omwe ankutumikira m’dera la cirewedwe ca Cixineji ku Estados Unidos, adalewa kuti mpsakukwanisika kuliratiza bukhu lakuti Baibulo Limaphunzitsa Chiyani pa ulendo bwakuyamba. Tsono bzingakhale bwino kuyamba kupfunza msolo 2, omwe umbalewa bza Bibliya, kuposa kuyamba na msolo 1, omwe umbalewa bza Mulungu.
5. Thangwe ranyi kupirira n’kwakufunika?
5 Bzimbatenga nthawe kuti munthu akhulupire Mulungu, tenepo kupirira nkwakufunika. Maceza yathu yakuyambirira yangacitise lini kuti munthuyo abvume kukhulupira kuti Mulengi alipo. Tsono na nthawe, pinango iye angazindikire kuti bzimwebzi bzingakwanisike, ayai angalewe kuti ankubvesesa thangwe ranyi wanthu ambafika pakutawira kuti Mulengi alipo.
6. Thangwe ranyi wanthu winango wambafuna lini kubva bza Bibliya?
6 Wale Womwe Wan’funa Lini Kubva ayai Wambakhulupira Lini Mulungu: Kawiri-kawiri munthu omwe ambazindikira kuti Mulungu alipo, ambafuna lini kubva bzomwe Bibliya limbapfunzisa thangwe iye ambakhulupira lini kuti iro ni Fala la Mulungu. Pinango iye ambakhala ku dziko lomwe si Lacikristau ndipo ambawona Bibliya ninga bukhu la bzipembedzo Bzacikristau. Ayai pinango iye ambakhala m’dziko lakuwonedwa ninga Lacikristau lomwe limbatenga lini mwa mphanvu bzinthu bza umulungu, tenepo iye ambaliwona lini Bibliya ninga lakufunika kwa iye. Kodi tingawathandize tani wanthuwa kufuna Bibliya, wacimalizira kubzuma pfunziro kucokera m’bukhu lakuti Baibulo Limaphunzitsa Chiyani?
7. Njiponi njira yabwino yakulimbisa munthu kufuna kubva bza Bibliya?
7 Cipinda ca mthambi ca ku Grécia cidanemba kuti: “Njira yabwino yakuthandizira wanthu womwe wambafuna lini kubva bza Bibliya, ndiyo kulifungula, ticiwalatiza bzomwe iro limbalewa. Apalizi wazinji wadawona kuti mafala ya m’Bibliya yana mphanvu kwene-kwene kuposa ciri-cense comwe iwo wangalewe. (Wahebereu 4:12) Kuwona dzina la Mulungu m’Bibliya, kwathandiza wazinji kukuza cikhumbo cawo cakulifufudza Bibliya.” Cipinda ca mthambi ca ku India cidanemba kuti: “Cadidi cakulewa bza moyo na infa, cimbakwewa wazinji wa m’cipembedzo ca Cihindu, bzibodzi-bodzimbo na piciro la Bibliya lakulewa bza dziko lakusaya tsankhulo.” Pakulewa bza mabvuto yakucitisa thupo kwawoko, kawiri-kawiri apaliziwo wambakhala na mpata wakulatiza bzomwe Bibliya limbalewa bzakuti Umambo bwa Mulungu bun’dzalungamiza bzinthu.
8. Kodi tingalewe ciani kwa wale womwe wambalikumbukira kuipa Bibliya thangwe ra bzipembebzo Bzacikristau?
8 Penu munthu ambalikumbukira kuipa Bibliya thangwe ra bzipembedzo Bzacikristau, mufokotozereni kuti bzipembedzobzi bzimbanamizira Bibliya pabodzi na mapfunziso yace. Cipinda ca mthambi ca ku India cidanemba kuti: “Nthawe zinango, bzimbafunika kuwathandiza wanthuwo kuwona kuti magereja yamweya yambakhotcerera lini Bibliya.” Iwo wadalewa kuti wanthu wa cipembedzo ca Cihindu wambadabwa kawiri-kawiri na gawo 4 la m’broxura lakuti Qual é o Objectivo da Vida? Como Encontrá-lo?, lomwe limbafokotoza momwe magereja yadayezera kudzonga Fala la Mulungu. Mpainiya munango wa ku Brasil ambauza wanthu kuti: “Thangwe ranyi mun’saya kudziwa bzizinji bzomwe Bibliya limbalewa? Wazinji wankucita bzimwebzo na makumbukidwe yabwino, mwakusaya kupita na gerejayo. Mungadabwe na bzomwe mupfunzebzo.”
9. Thangwe ranyi tin’funikira lini kuneta penu munthu pakuyamba an’funa lini kubva bzomwe Bibliya limbapfunzisa?
9 Yahova ambawona mtima wa munthu m’bodzi na m’bodzi. (1 Samuweri 16:7; Mimwani 21:2) Iye ankukwewa womwe wana mitima yabwino kuti wamunamate bzacadidi. (Juwau 6:44) Wazinji wa iwo wakanati kupfunzisidwa bza Mulungu ayai pinango wambandodziwa bzing’ono-ng’ono bza Bibliya. Utumiki bwathu bumbawapasa mpata kuti “wapulumuke na kufika pakukhala na cidziwiso caico ca cadidi.” (1 Timotio 2:4) Tenepo, penu pakuyamba winango wanifuna lini kubva bzomwe Bibliya limbapfunzisa, lekani kuneta! Phatisani basa mabukhu yakusiyana-siyana yomwe yalipo m’cirewedwe canu kuti muwalimbise kufuna kudziwa bzizinji. Na kupita kwa nthawe, mungadzacinje, muciphatisa basa bukhu lathu likulu lakucitira nalo mapfunziro ya Bibliya, lakuti Kodi Baibulo Limaphunzitsa Chiyani Kweni-kweni?
[Kwadru pa tsamba 8]
Mweneciro nyumba akalewa kuti ambakhulupira lini Mulungu, yezerani ibzi:
• Kuti mudziwe thangwero, mubvunzeni: Kodi mumbakumbuka tenepoyo nthawe zensenezi?”
• Penu iye ni Budista, phatisani basa broxura lakuti Paz e Felicidade Eterna—Como Encontrá-las, matsamba 9-12.
• Penu iye ambakhulupira kuti moyo udacita kusanduka, ibzi bzingathandize:
Nkhani za Galamukani! zakuti “Kodi Zinangocitika Zokha?”
Vidiyo yakuti As Maravilhas da Criação Revelam a Glória de Deus
Mabroxura yakuti Vida Satisfatória—Como Encontrá-la, gawo 4; A Vida Teve Um Criador?; na A Origem da Vida—Cinco Perguntas Que Merecem Respostas
• Penu iye adataya cikhulupiro kwa Mulungu thangwe ra kusaya cirungamo na kubonera komwe kulipo m’dzikoli, mabukhuya yangathandize:
Bukhu lakuti Existe Um Criador Que Se Importa Com Você?, msolo 10
Mabroxura yakuti Será Que Deus Se Importa Conosco?, msolo 6 na Qual é o Objectivo da Vida?, gawo 6
• Mungacinje, muciphatisa basa bukhu lakuti Baibulo Limaphunzitsa Chiyani pomwe mweneciro nyumbayo wayamba kutawira kuti Mulungu alipo. Bzingakhale bwino kuyamba na msolo 2, ayai na nkhani inango yakumuthemera.
[Kwadru pa tsamba 9]
Penu mweneciro nyumbayo ambakhulupira lini Bibliya, yezerani ibzi:
• Cezani naye misolo 17 na 18 ya m’bukhu lakuti A Vida—Qual é a Sua Origem? A Evolução ou a Criação?
• Kwa Ahindu, phatisani basa broxura lakuti Por que Devemos Adorar a Deus Com Amor e Verdade?
• Kwa Wajuda, phatisani basa broxura lakuti Haverá Um Mundo Sem Guerra?, matsamba 3-11.
• Cezani naye phindu lakuteweza mitemo ya m’Bibliya. Bzomwe mungaphatise basa kuti mulatize phindu la nfundo za m’Bibliya:
Nkhani za Galamukani! zakuti “Nfundo Zothandiza Mabanja”
Vidiyo yakuti A Bíblia—O Poder Dela na Sua Vida
Mabroxura yakuti Bzipsa Bzabwino Bzakucokera kwa Mulungu!, mapfunziro 9 na 11; Um Livro Para Todas as Pessoas, matsamba 22-26; na Vida Satisfatória—Como Encontrá-la, gawo 2
Kwa Abudista, phatisani basa broxura lakuti O Caminho Para a Paz e Felicidade, matsamba 3-7.
Kwa Amwenye, phatisani basa broxura lakuti Verdadeira Fé—A Chave Para Uma Vida Feliz, gawo 3.
Penu munkupalizira m’gawo lomwe wanthu wambalikumbukira kuipa Bibliya, bzingakhale bwino kuleka kuliguma ninga nsansa ya nzeru yomwe munkudziwisa kwa wanthuwo mpaka mutawazungira kazinji-kense.
• Fokotozani momwe mapolofesiya ya m’Bibliya yadakwanisikira. Mungaphatise basa ibzi:
Vidiyo A Bíblia—História Exata, Profecias Fidedignas
Broxura lakuti Um Livro Para Todas as Pessoas, matsamba 27-29
• Mungacinje muciphatisa basa bukhu lakuti Baibulo Limaphunzitsa Chiyani pomwe munthuyo an’funa kudziwa nkhani zakusiyana-siyana za m’Bibliya.
[Kwadru pa tsamba 10]
Mweneciro nyumba akalewa kuti: “Ndimbakhulupira lini Mulungu,” mungalewe kuti:
• “Ndingakufokotozereni pang’ono bzomwe bzidandithandiza kukhulupira kuti Mulengi alipo?” Patsogolo pace, muuzeni nfundo zakucokera m’bukhu la Kukambitsirana, matsamba 84-86, ayai citani makonzedwe yakumubweresera bukhu lomwe mudakomedwa nalo kulilewenga.
• “Tsono bzingadakhala kuti Mulungu alipo, mungadafuna kuti iye akhale Mulungu wa makhalidwe yaponi?” Weneciro nyumba wazinji wambatawira kuti iwo wangadafenderera Mulungu wa lufoyi, cirungamo na wa nsisi, omwe alibe tsankhulo. Mulatizeni kucokera m’Bibliya kuti Mulungu anayo makhalidweya. (Bzingakwanisikembo kuphatisa basa msolo 1 wa m’bukhu lakuti Baibulo Limaphunzitsa Chiyani, muciyambira pa ndime 6.)
Mweneciro nyumba akalewa kuti: Ndimbakhulupira lini Bibliya,” mungalewe kuti:
• “Pana wanthu wazinji womwe wambalewa bzimwebzi. Winango wambakumbuka kuti Bibliya limbabverana lini na siyensiya ayai kuti mitemo ya m’Bibliya si yakuthandiza. Tsono ndiuzeni, kodi mudakhala kale na mpata wakulewenga m’Bibliya? [Dikirani atawire. Patsogolo pace, mulatizeni mafala yakuyambirira pa tsamba 3 ya broxura lakuti Um Livro Para Todas as Pessoas, mucimusiyira broxuralo.] Wazinji wambalikhulupira lini Bibliya thangwe ra kuti bzipembedzo bzidadzonga mapfunziso yace. Pa nthawe inango ndin’funa kudzaceza namwe ciratizo cinango ca m’matsamba 4 na 5.”
• “Wazinji wambakumbuka bzimwebzo. Ndingakulatizeni cinthu cinango comwe cimbacitisa kuti ndidabwe nalo Bibliya? [Lewengani Djobi (Yobo) 26:7 ayai Zaiya 40:22, yakulatiza kuti Bibliya limbalewa cadidi pa nkhani ya siyensiya.] Bibliya linayombo mafala ya nzeru yakuthandiza mabanja. Pa nthawe inango ndin’funa kudzakuwonesani ciratizo cibodzi.”
• “Ndinkutenda thangwe ra kundiuza bzimwebzi. Penu Mulungu angadanembera wanthufe bukhu, mun’kumbuka kuti bukhulo lingadakhala na nkhani zanyi”? Patsogolo pace, mulatizeni munthuyo cinthu cibodzi ca m’Bibliya cakubverana na bzomwe iye alewebzo.