Bzakugumana Nabzo
◼ Australia: John, mwamuna wakupfunza kwene-kwene, akhayenda ku gereja pomwe akhali mwana, koma adadzayamba kukhulupira kuti Mulungu palibe. Mpainiya munango adamusiyira broxura lakuti A Vida Teve Um Criador? ndipo pa ulendo bunango adamusiyira broxura lakuti A Origem da Vida. Mpainiyayo adapitiriza kumbamubweresera marevista, acimbamulatiza nkhani za cirengedwe ayai za mapolofesiya ya m’Bibliya. Pomwe adawona kuti John akhadakonzeka, iye adamupasa bukhu lakuti A Bíblia—Palavra de Deus ou de Homem? Atamala kulirewenga, John adayamba kulewa kuti akhapenukira kuti Mulungu alipo. Patsogolo pace mpainiyayo adamulatiza bukhu lakuti Baibulo Limaphunzitsa Chiyani ndime 8, tsamba 20, na ndime 13-16 za matsamba 23-24. John adadabwa kwene-kwene na mavesi ya pa ndime zimwezi, acirewa kuti: “Pinango bzin’funika ndiripase mpata munango Bibliyali.”
◼ Mexico: Mwamuna munango adalewa kwa mpalizi munango kuti iye akhakhulupira lini kuti Bibliya ndakufulizidwa na Mulungu. Mpaliziyo adabzipereka kuti amulatize umboni bwakuti Bibliya ndakufulizidwa na Mulungu. Watamala kucezerana, munthuyo adayamba kutokonyedwa mu mtima mwace na bzomwe akhapfunza m’Bibliya. Iye adatokonyedwa kwene-kwene pomwe adapfunza bza mitemo ya Mulungu. Iye adauza mpaliziyo kuti: “Pakuyamba pomwe tikhalewenga Bibliya pabodzi, ndikhaliwona ninga bukhu lina liri-lense ndipo likhanditokonya lini. Koma tsapano pomwe tinkulilewengapa, maka-maka bza malango yace yakulewa bza makhalidwe, mtima wangu ukuwawa.”
◼ Estados Unidos: Banja linango pomwe likhacitira umboni pa mbuto yakugumanika wanthu wazinji, iro lidadziwana na mkazi munango wa ku Taiwan omwe akhakhulupira Mulungu, koma akhayesa kuti Bibliya lidathemera wanthu wa madziko ya Kumadokero. Iye adafika pa mbuto yomwe banjalo likhalatiza mabukhu, thangwe akhabziwona wakutaika, napo akhana moyo wabwino. Iye akhadikhira kuti Bibliya lingadamuthandiza kukhala na moyo wa thandauzo. Banjalo lidayamba naye pfunziro mwakuphatisa basa bukhu lakuti Baibulo Limbaphunzitsa Chiyani pabodzi na broxura lakuti Paz e Felicidade Eterna—Onde Encontrá-las. M’mbuto mwakupfunza msolo 2 wa bukhulo, iwo wadaceza naye gawo la broxuralo lakuti “Um Guia Para a Bênção de Toda a Humanidade.” Watamala kucezerana mibvunzo 6 yakuyambirira ya pa gawolo, mkaziyo adalewa kuti akhadabwisidwa na Bibliya pakukhala lakusiyana kwene-kwene na bzakunembedwa bzinango bzacipembedzo. Watamala kucezerana momwe mapolofesiya ya m’Bibliya yadakwanisikira, iye adati: “Palibe bukhu linango lomwe ndingakumbuke kukhala la cairo ninga Bibliya!”
◼ Japão: Napo mweneciro nyumba munango adauza mpalizi kuti akhakhulupira lini Mulungu, mpaliziyo adapitiriza kumbamuzungira mwakusaya kumbakhalisa, acimbaceza naye nkhani za mu Galamukani! zakuti “Kodi Zinangochitika Zokha?” Pang’ono na pang’ono munthuyo adacinja makumbukidwe yace, aciyamba kubvuma kuti Mulengi alipo. Tsapano iye ambakhulupira kuti Mulungu alipo, ndipo mpaliziyo ankupfunza naye mwakuphatisa basa broxura lakuti Bzipsa Bzabwino Bzakucokera kwa Mulungu!
◼ Canadá: Mpfumakazi inango idasiya marevista yatsapano kuna mkazi munango womwe akhacoka m’nyumba kuti akapakire kandere-ndere wace. Pomwe mpfumakazi yathu idadzabwerera patsogolo pace, mkaziyo adamuuza kuti akhafuna lini kubva, ndipo akhakhulupira lini Mulungu. Mpfumakaziyo iribe kuleka kumuzungira, ndipo idamubweresera broxura lakuti Uma Vida Satisfatória—Como Encontrá-la. Pomwe mpfumakazi ire idadzagumana mkaziyo pa mui, idamuuza kuti napo ikhadziwa kuti iye akhakhulupira lini Mulungu, iyo idapitiriza kumukumbukira thangwe ikhadziwa kuti mkaziyo akhalera yekha wana. Iyo idalatiza mkazi ule ndime 6 ya pa tsamba 4 ya broxuralo, yakulewa bza komwe tingagumane malango yabwino. Patsogolo pace, iye adamulimbisa kulewenga nfundo za pa pfunziro 2 zakulewa bza kaleredwe ka wana. Mkaziyo adakomedwa kwene-kwene kutambira broxuralo.