Pfunzisani Mwakuphatisa Basa Broxura la Bzipsa Bzabwino
1. Kodi Broxura la Bzipsa Bzabwino lidakonzedwa tani?
1 Ninga momwe bzidafotokozedwera mu nkhani ya mu Utumiki Bwathu bwa Umambo bwa Julho, cinthu cakufunika kwene-kwene pa bzinthu bzomwe timbaphatisa basa pakupfunzisa ni broxura lakuti Bzipsa Bzabwino Bzakucokera Kwa Mulungu! Mavesi manango yalibe kuphatidwa mafala yace na cakulinga cakuti mweneciro mui akwanise kupfunza kucokera mu Bibliya cairo. Mabukhu yathu mazinji yakupfunzirira yadanembedwa mu njira yakuti nyakuwerenga akwanise kupfunza yekha, koma bukhuli lidakonzedwa kuti limbaphatisidwe basa mwakucita kucezerana na mpfunzisi. Tsono, tikambagawira bukhuli, timbayezere kumulatiza momwe timbacitira pfunziro kuti mweneciro muiyo awone momwe bzimbadekera kupfunza bzipsa bzabwino bza m’Bibliya.—Mat. 13:44.
2. Kodi tingaphatise tani basa broxura la Bzipsa Bzabwino pa ulendo bwakuyamba?
2 Pa Ulendo Bwakuyamba: Mungalewe kuti: “Ndiri pano thangwe wanthu wankucita thupo na komwe dzikoli linkuyenda. Kodi munkukumbuka kuti pa nthawe inango bzinthu bzin’dzakhala bwino? [Dikhirani atawire.] Bibliya lina bzipsa bzabwino bzomwe bzingatipase cidikhiro. Iyi ni minango mwa mibvunzo yomwe Bibliya limbatawira.” Mupaseni mweneciro mui broxuralo, ndipo mukumbireni kuti asankhule m’bvunzo m’bodzi omwe uli kumambuyo kwa broxura. Mulatizeni momwe timbacitira pfunziro mwa kuphatisa basa ndime yakuyamba ya msoloyo. Njira inango ndiyo kubvunza mweneciro mui m’bvunzo omwe ungamudekere wakubverana na msolo omwe mwasankhulayo, mucimulatiza momwe broxuralo lingamuthandizire kugumana mitawiro ya m’Bibliya. Penu msolo umweyo unkubverana na vidiyo ya pa jw.org, apalizi winango ambawonesa mweneciro mui vidiyoyo pakumupalizira.
3. Fotokozani momwe mungacitisire pfunziro mwa kuphatisa basa broxura la Bzipsa Bzabwino.
3 Momwe Mungacitisire Pfunziro: (1) Werengani mibvunzo mipswipisisa yomwe inkuyamba na mulewengo kuti muthandize mweneciro mui kuphatisisa nfundo ikulu. (2) Werengani ndime yomwe inkutewerayo. (3) Werengani mavesi yomwe yadanembedwa mwakupendekayo, ndipo phatisani basa mibvunzo mwaluso kuti muthandize mweneciro mui kuwona momwe mavesi yankutawirira m’bvunzo omwe unkuyamba na mulewengoyo. (4) Penu pana ndime inango pansi pa m’bvunzoyo, bwerezerani pomwe nfundo 2 na 3 zomwe ziri padzuluzi. Penu muna vidiyo yomwe inkubverana na m’bvunzoyo koma imwepo mukanati kumuwonesa mweneciro muiyo, cezeranani nfundozo mkati mwa pfunzirolo. (5) Pakumalizira, kumbirani mweneciro mui kuti atawire m’bvunzo omwe unkuyamba na mulewengo kuti mutsimikize penu iye wabvesesa.
4. N’ciyani cin’dzatithandiza kuphatisira basa broxura lakufunikali mwaluso?
4 Lizolowereni broxurali. Phatisani basa mpata uli-wense omwe mugumanewo. Munati kuyamba pfunziro, kumbukirani bza nyakupfunzayo na njira yabwino ya kumuthandiza kubvesesa mwa kuphatisa basa mavesi ya mu msoloyo. (Mim. 15:28; Mab. 17:2, 3) Pomwe luso lanu linkukula, mungayambe kuwona broxurali ninga cinthu canu cakufunika cakuphatisira basa pakupfunzisira wanthu cadidi.