Kukulisa Luso Lathu mu Utumiki—Kuyambisa Pfunziro la Bibliya pa Nyumba pa Munthu mwa Kuphatisa basa Broxura lakuti Bzipsa Bzabwino Bzakucokera Kwa Mulungu!
Thangwe Ranyi Mpsakufunika: Kuti tithandize wanthu kuti wakhale anyakupfunza, tin’funika kukhala apfunzisi wa Fala la Mulungu. (Mat. 28:19, 20) Tensenefe tingapfunzise cadidi mwakuphata mtima, mwakuphatisa basa bzinthu bzomwe tidapasidwa. Broxura la Bzipsa Bzabwino Bzakucokera kwa Mulungu! lidakonzedwa kuti litithandize kupfunzisa wanthu cadidi. N’cadidi, tingaphatise basa broxurali kuti tiyambise pfunziro la Bibliya na mweneciro nyumba pa ulendo bwakuyamba pa nyumba pace.
Momwe Mungacitire:
• Onani pomwe ciratizo ca upalizi comwe ciri pa kwadruyi.—Onanimbo Utumiki Bwathu Bwa Umambo bwa chichewa bwa Março 2013.
• Ikhani broxura lanu mu pasta yanu ya utumiki bwakumunda. Tsimikizani kuti muna mabroxura yakukwana yakukagawira.
• Cezeranani ndime ibodzi ayai ziwiri ndipo ndocitani kwa mphindi khumi ayai zakucepa.
Yezerani Kucita Bzimwebzi Mkati mwa Mwezi Wathunthu:
• Citani mpembo kuti mukhale na cikhumbo cakucitisa pfunziro libodzi la Bibliya. Ndipo, kumbiranimbo Yahova kuti akuthandizeni kuyambisa pfunziro libodzi la Bibliya na kukhala mpfunzisi wacadidi wakuyenda patsogolo.—Waf. 2:13.
• Pakucita kunamata kwanu kwa banja ayai pfunziro lanu lapamwekha, pambulani nthawe kuti muzolowere ciratizo ca upalizi mu mtima mwanu. Imwepo mungakwanise kulewalewa mwakutsimikiza na kuyambisa pfunziro la Bibliya pa nyumba pa munthu pomwe muli mu utumiki.
[Kwadru pa tsamba 1]
Pakupalizira Nyumba na Nyumba:
“Ine ndiri pano thangwe wanthu wankukhala na thupo na momwe dzikoli liriri. Kodi munkukumbuka kuti bzinthu pa dzikoli bzingacinje lini? [Dikhirani atawire.] Wanthu azinji ambadabwisika pakupfunza kuti Bibliya lina bzipsa bzabwino bzomwe bzingatipase cidikhiro. Iyi ni minango mwa mibvunzo yomwe Bibliya limbatawira.” Mupaseni mweneciro nyumba broxura libodzi, ndipo mukumbireni kuti asankhule mbvunzo ubodzi omwe ungamudekere kwene-kwene omwe uli kunja kwa tsamba lakumalizira. Akasankhula, fungulani mkati mwace pomwe pana msoloyo mucimulatiza pfunzirolo. Citani makonzedwe ya ulendo bwakubwereza kuti mudzacezerane mbvunzo wapatsogolo pace wa mu pfunziro libodzi-bodziro.