Mianmar

Matsamba 104-105

Yahova Adandipasa Mzimu Upsa

WILSON THEIN

GOLE LAKUBADWA 1924

GOLE LAKUBATIZIDWA 1955

MBIRI YACE Akhali mbava kale-kale, tsono adacita nyongo yakucinja unthu bwace. Ankutumikira ninga mpainiya wakupambulika kwa magole 54.

NDIRI mulumbwana, ndidapfunza masenzeka ya kumenyana na mafaiti, masenzeka yakugwesana pansi na manango yakumenyana. Thangwe ra bzimwebzi, ndidakhala waciwembo na wa ukali. Pomwe ndikhana magole 19 yakubadwa, ndidapita m’gulu la mbava, ticiyamba kumbaba na nfuti. Ndipo ndidaphatiwa, ndicifungiridwa m’kawoko magole masere. Ndiri m’mwemo, ndidakumbukira bza moyo wangu wakuipayo, ndicipemba kwene-kwene. Ndidafunisisa kudziwa bza Mulungu.

Nditacosedwa m’kawokomo, ndidayenda kakhala ku mzinda wa Yangon, komwe ndidayamba kutsonkhana na Mboni za Yahova. Patsogolo pace ndidabatizidwa, ndipo ndimbatenda kupirira na thandizo la abale wakusiyana-siyana.

Pambuyo pa kubatizidwa, ndikhaneseka basi kulatiza makhalidwe ya Ukristau. (Wayef. 4:24) Ndikhana msambo wakulewa bzakuphonyeka bza anzangu na kumbakhumudwa nawo kawiri-kawiri. Ndikhafuna kukhala munthu wabwino, tsono bzikhandinesa kuuphata mtima wangu. Ndikhabzibva kukhala mtazi, ndipo nthawe zinango ndikhayenda ku gombe, ndicikalira kumweko maora mazinji.

Mu 1957, ndidakhala mpainiya wakupambulika. Ndidatoma kuyenda katumikira ku Mandalay. Kumweko ndidaphata basa pabodzi na misiyonario munango dzina lace Robert Richards. M’bale Robert akhali ninga baba kwa inepano. Iye adandipfunzisa kumbawona makhalidwe yabwino kwa wanthu na kukumbukira kuperewera kwangu. (Wag. 5:22, 23) Nthawe zense ndikakhala ndidakalipa, ndikhakumbira Yahova kuti andipase ‘mzimu upsa, wakukhazikika,’ wakutsogoledwa na mtendere. (Psal. 51:10) Yahova adatawira mipembo yangu, ndipo na nthawe makhalidwe yangu yadacinja.

Patsogolo pace, ndidapfunza Bibliya na mwamuna munango wa magole 80 yakubadwa, omwe akhali wa Igreja Batista. Wanthu wa m’gereja mwace wadakalipa nane, wacilewa kuti “ndikhawabera” mabira yawo. M’bodzi wawo adandiikha cisu pa khosi, aciti: “Kodi kupha munthu n’pikado?” Ndidadzalidwa na ukali. Pa nthawe ibodzi-bodziyo, ndidacita mpembo kwa Yahova mwakazizizi, ndicimutawira mwakuderekha kuti: “Munkutawira kale mwekha mbvunzo wanuyo.” Munthuyo adandisiya, aciyenda. Ndidatenda Yahova thangwe ra kundithandiza kukhala wakuderekha. Nyakupfunza wangu wacikulire ule adabatizidwa patsogolo pace, ndipo iye adapitiriza kukhala wakukhulupirika mpaka kufa kwace.

Magole yenseneya, ndidatumikira mbuto zakukwana 17 ninga mpainiya wakupambulika, ndicithandiza wanthu 64 kudziwa cadidi. Ndikambakumbukira momwe Yahova ambandikomera mtima, maso yangu yambagwesa misozi. Iye adathandiza munthu wa ciwembo, wa ukali na wakusaya cikondweso, kukhala na mzimu upsa wa mtendere.

[Cithunzi-thunzi pa tsamba 4]

Ndikhabzibva kukhala mtazi, ndipo nthawe zinango ndikhayenda ku gombe, ndicikalira kumweko maora mazinji.

[Tsamba limweri palibe 5, 6]]