Makutu ya Yahova Yambabva Mpembo wa Nyakulungama. (1 Pe. 3:12)—Nkhanizi zacosedwa mu Buku Lapachaka la Mboni za Yehova 2013

Europa

Tsamba 66, ndime 1-3

Iye Adapemba Kuti Athandize

Irene, omwe ambakhala ku Suécia, adanemba kuti: “Ndina magole 80 yakubadwa, ndipo ndimbakwanisa lini kuyenda mu utumiki thangwe ra kuwawidwa m’thupi. Ndidapemba kwa Yahova, ndicimuuza kuti ndingakwanise kuthandiza munthu ali-wense omwe ndidamuzungira kale-kale, ndipo tsapano an’funa kuceza bza m’Bibliya.

“Nsiku inango, mtedwe wathu udalira, ndipo bayangu adautawira. Akhali mkazi munango omwe adati: ‘Pepani, ndimwe mwekha womwe ndakukumbukirani, ndipopa ndakupfuwirani mtedweyu. Kodi akazanu angafune kundizungira kuti tidzaceze bza Mafala ya Mulungu? Ndidapfunza Bibliya magole 15 ayai 20 m’mbuyomu, tsono bayangu akhandiletsa, ndipo ndidasiya kupfunzako.’

“Ndinkukumbukira kuti inepano na mpfumakazi inango, tikhadamuzungira mkaziyo, ticipfunza naye Bibliya. Tsono ndidadabwa kuwona kuti mkaziyo adakwanisa kundikumbukira. Mwakukomedwa, ndidacita makonzedwe kuti ndikagumane naye. Kuyambira pamwepo, ifepano tinkupfunza mdzinga uli-wense. Iye adawonekera pa Cikumbuso na pa nkhani yakupambulika ya pa nyengo ya Cikumbuso. Iye ambayendambo ku mitsonkhano. Ndimbatenda Yahova nsiku zense thangwe ra kutawira mpembo wangu.”