“Tsonkhanisa Mbumba”
1. Kodi mitsonkhano yacigawo na yamadziko, inkundendemera tani na mtsonkhano wakufunika wa Wajirayeri pambuyo pa kucoka ku Edjipito?
1 Mu nthawe ing’onong’ono atacoka ku Edjipito, Yahova adauza Mozeji kuti ‘atsonkhanise mbumba’ pa Phiri la Sinai kuti wabve mafala Yace, tenepo wacikwanisa kumugopa ndipo wacipfunzisambo wana wawo bza njira Zace. (Bzak. 4:10-13) Kodi cikhali lini cakucitika cakusaya kuyebweka na cakulimbisa cikhulupiro? M’minyezi inkubwerayi wanthu wa Yahova wan’dzakhala wankugumana pa mitsonkhano yacigawo na yamadziko kuti wadzapfunzisidwe na Yahova. Kodi tingacite ciani kuti tidzagumane phindu likulu?
2. Kodi tingacite ciani kuti ‘tikhale wakukonzekera’ mtsonkhano wathu?
2 “Khalani Wakukonzeka”: Mulungu adauza Wajirayeri kuti “khalani wakukonzeka” pa m’gumano wakusaya kuyebweka pa Phiri la Sinai. (Kuf. 19:10,11) Na tenepo, kukonzekera n’kwakufunika kuna wense womwe wan’dzagumanika pa mitsonkhanoyi, si kokha kuna wale womwe wan’dzakhala na mbali. Mwaciratizo, wazinji wan’dzafunika kucita makonzedwe yakukumbira kubasa kwawo. Pinango mkhalidwe wanu ngwakundendemera na wa Nehemiya. Iye adafunika kusiya basa lace ninga wakuperekera bzakumwa kuna Mambo Artaxerxe kuti ayende kukathandiza kumanga pomwe mpanda ku Jeruzalemu, koma akhadziwa lini penu bzingadamudekera Mambo. Nehemiya adacita mpembo ndipo pambuyo pace, mwakukhwimika, adalewa mkumbiro wace wakukonzedwa bwino mwaulemu. Mambo adamubvumiza kuyenda acimupasa bzakumangira bzakukathandizira basalo! (Neh. 2:1-9) Kuthumizira pa kukumbira womwe mumbamuphatira basa, kodi mwacita kale makonzedwe ya kayendedwe na komwe munkafikira? Akulu an’dzakondwa kuthandiza womwe wangafunikire kuthandizidwa. Konzani bza kudzafika na nthawe pa cigawo ciri-cense, na kukonzeka kuti “tikhale watceru kwene-kwene kuposa nthawe zense” pa bzomwe tin’dzabva.—Waheb. 2:1.
3. N’ciani cingatithandize kukonzekeresa mtima wathu kuti tidzatetekere bwino mtsonkhano?
3 Cinthu cinango cakufunika pa kukonzekera kwathu ni kukonzekeresa mtima wathu bzomwe bzingacitise kuti tidzatetekere na kupfunza. (Eza. 7:10) Ndondomeko ya mtsonkanoyu in’dzabakaikhidwiratu pa Webisaiti yathu ya jw.org ndipo in’dzakhala na misolo yense ya nkhani pabodzi na vesi libodzi ayai mawiri pa msolo uliwense. Ndondomekoyo in’dzakhala na nfundo zabwino kuti ticezerane pa Kunamata kwathu Ninga Banja pa midzinga yomwe mtsonkhano un’dzakhala unkufendera. Wapalizi winango wambadinda ndondomeko aciphatisa basa kunembera nfundo zacigwatho pa mtsonkhano wacigawo.
4. Kodi wabereki wangaphatise tani basa nfundo za pa mtsonkhano kuti wapfunzise wana wawo?
4 ‘Pfunzisani Wana Wanu’: Cibodzi mwa cakulinga ca mtsonkhano wa pa Phiri la Sinai cikhali cakuti wabereki wa Wajirayeri “wambapfunzisembo wana wawo.” (Bzak. 4:10) Mtsonkhano wacigawo umbapasa mpata wabwino wabereki kuti wacitembo bzibodzi-bodzi. Wabereki wan’dzafunika kukhala pabodzi na wana wawo pa cigawo ciri-cense na kuwathandiza kutetekera. Nsiku iri yense mtsonkhano ukamala, na pa kunamata ninga banja, mungacezerane pabodzi mbali za mtsonkanoyo.
5. Kodi tin’dzagumana phindu liponi tikadzagumanika pa mtsonkhano wacigawo unkubwerayu?
5 Mtsonkhano wakusaya kuyebweka wa pa Phiri la Sinai udathandiza Wajirayeri kutenda mwayi wawo wakukhala wanthu wa Mulungu. (Bzak. 4:7, 8) Mtsonkhano wathu wacigawo omwe unkufenderawu wakonzedwa kuti utithandize mu njira ibodzi-bodziyi. Mu nsiku zitatu tindzakwanisa kucoka m’dziko lakuuma la Sathanili ticidzapfatsa pabodzi na kudzalimbisidwa mwauzimu pa kuphatana kwathu mu Paraizo wauzimu. (Zai. 35:7-9) Na kufendera kwa nsiku ya Yahova, tin’funika lini kusiya kutsonkhana pabodzi kuti tilimbisane!—Waheb. 10:24, 25.