Tsamba Lakucokera ku Bungwe Lakutonga

Wakufunidwa Wanzathu Wapamui:

Tiri wakukondwa kukunemberani pomwe linkuyamba gole lakufunikali! Pa kumala kwa gole la 2014, pan’dzakhala papita magole dzana kutomera pomwe Mambo wathu wakufunika Jezu adayamba kutonga pakati pa anyamadulanthaka wace.​—Psal. 110:1, 2.

Pa kuyamba kwa gole labasa lino, pa mtsonkhano wapagole liri-lense wa Sociedade Torre de Vigia de Bíblias e Tratados de Pensilvânia, Komiti Yakusandulizira idacosa Baibulo la Dziko Latsopano la cingerezi lakusanduliziridwa papsa ndipo ndabwino kwene-kwene kuposa Bibliya liri-lense lomwe lingagumanike kuna wanthu. Yahova waphatisira basa wana wace caiwo wakubadwa na mzimu kuti liwoneke Baibulo la Dziko Latsopano lakuyambirirali. (War. 8:15, 16) Bzimwebzi bzokhabzi bzin’kucitisa kuti kusanduliziraku kukhale kwakupambulika, kodi munkubvuma lini bzimwebzi?

Kwa mwagole mazinji, Komiti Yakunemba ya Bungwe Lakutonga yaikha kusandulizira Bibliya kukhala cinthu cakuyamba. Nsiku zino Baibulo la Dziko Latsopano linkugumanika lense ayai cipande m’bzirewedwe 121. Tinkukulimbisani kuti muwonese kuna Yahova kutenda kwanu kukulu Bibliya lomwe munalo. Nsiku iri-yense mbaliwerengani mucimbakumbukira. Mwanjira imweyi, mun’dzafenderera Munembi wace, Yahova Mulungu.​—Tiy. 4:8.

Timbalimbisidwa tikambabva bza mayezo yomwe abale na mfumakazi zathu zin’kugumana nayo. N’bzakubveka kuti n’thawe zinango bzingawanese iwo kukondwa pabodzi na abale wawo. Mwaciratizo, banja linango ku Asia, tsapanopapa moyo wawo udakhala wakunesa pomwe mai wawo mwadzidzidzi adadwala matenda yakudjedjera thupi. Adotolo wakudziwa bwino basa lawo, walibe kukwanisa kulapa matendayo. N’psakupasa nsisi! Tsapano mwamuna wace nthawe iri-yense ambakhala pafupi na mkazace kuti amusamalire. Mwana wawo m’bodzi wacimuna na wacikazi awiri wankukhala ciratizo cabwino ninga Wakristau ca kulatiza lufoyi lawo pa kuthandiza wabereki. Banja labwinoli, pabodzi na imwe womwe mudakundambo mayezo yakusiyana-siyana mungabve mtsangalazo womwe umbabwera pa kuyezedwa kwa cikhulupiro canu. (Tiy. 1:2-4) Yahova ankutsimikizira wakudzozedwa na wamabira manango kuti tin’dzakondwa kwene-kwene tikapitiriza kupirira pa mayezo, thangwe tin’dzasimbidwa na mphaso ya moyo wamuyaya!​—Tiy. 1:12.

Gole lapitali, womwe wadagumanika pa Cikumbuso wakhali 19.241.252. Mpsakukondwesa kuwona wanthu wazinji wankulemekeza Yahova na Jezu Kristu, mwa kugumanika pa mtsonkhano wapagole wakufunika kwene-kwene kuna wanthu wa Mulungu! Mu nyengo ya Cikumbuso, kutenda kukulu kudacokera kuna bzulu bza womwe wadatumikira ninga apainiya wakuthandiza mu Março na Abril. Mpsakukondwesa kwene-kwene! Kodi mungakondwe lini kudziwa kuti wale womwe anikhala apainiya wakuthandiza mu nthawe yakucezeredwa na nyakunyang’anira wa dera angadzakhalembo pa mtsonkhano wense wa apainiya womwe iye an’dzacitisa napo penu kucezeredwako kun’dzakhala lini mu m’minyezi ya Março na Abril? Adziwi mwauzimu wambabvesesa kufunika kwa kukhala wanyongo pa upalizi na m’mabasa ya m’gwere. Kukhala wa kutangwanika na basali kumbatithandiza kupitiriza kukhala wakulimba na wakusaya kutekenyeka, ticitazisa kuyeza-yeza kwa Sathani kwakufuna kuticosera cikhulupiro cathu na kutipambusa pa njira yakumoyo.​—1 Wak. 15:58.

Kodi mpsakulimbisa lini kuwona kuti m’gole lamalali wanthu, 277.344 wadabzipereka mwa kubatizidwa m’madzi ndipo tsapano wali pa njira yakumoyo pabodzi na abale wawo wapadziko lense? (Mat. 7:13, 14) Watsapanowa wan’funika thandizo lathu kuti wakhale “wakukhazikika m’cikhulupiro.” (Wakol. 2:7) Tipitirize kulimbisana winango na mwanzace mpaka cimaliziro. (Mat. 24:13) “Mutsangalaze anyakusunama, muthandize anyakutepa, mucipirira na wanthu wense.” (1 Wat. 5:14) Pakumalizira, aliwense wa ife ‘ambapembe nthawe zense,’ acimbalewa kuti: “Umambo bwanu bubwere.”​—1 Wat. 5:17; Mat. 6:10.

Taphata minyendo, pfatsani nalo Bukhu Lapagoleli, ndipo dziwani kuti timbafuna aliwense wa imwepo womwe muna lufoyi na Yahova!

Ndife abale wanu,

Bungwe Lakutonga la Mboni za Yahova

[Tsamba limweri palibe 5, 6]]