Khalani na Cizolowezi Cakufika na Nthawe
1. N’ciratizo ciponi comwe Yahova ambatipasa pakulewa bza kusunga nthawe?
1 Nthawe zense Yahova ambasunga nthawe. Mwa ciratizo, iye ambapasa atumiki wace ‘thandizo la pa nthawe yace.’ (Waheb. 4:16) Iye ambaperekambo mwauzimu “cakudya pa nthawe yakuthemera.” (Mat. 24:45) Tsono tin’funika kukhulupira kuti kubwera kwa nsiku ya ukali bwace ‘kun’cedwa lini.’ (Hab. 2:3) Tingagumane phindu na momwe Yahova ambacitira bzinthu pa nthawe yace! (Psal. 70:5) Pakukhala wanthu wakusaya kulungama na wakutanganika, kucita bzinthu pa nthawe yace kungakhale kwakunesa kuna ife. Thangwe ranyi tin’funika kukulisa cizolowezi cakusunga nthawe?
2. Thangwe ranyi kusunga nthawe kumbalemekeza Yahova?
2 Kusunga nthawe kun’funika kukhala pakutoma mu nsiku zakumalizira zino pomwe wanthu wazinji wambabzifuna wokha na wakusaya kubziphata. (2 Tim. 3:1-3) Tsono pomwe Wakristau wan’sunga nthawe pakucita basa, pakuteweza mpangano na pamitsonkhano, wanthu wambawona bzimwebzi ndipo bzimbalemekeza Yahova. (1 Pe. 2:12) Kodi timbafika na nthawe pa basa lakunembedwa koma timbawona kuti tinkufika mwakucedwa pa bzakucitika bzauzimu? Kufika na nthawe pa mitsonkhano Yacikristau, ticiyambira pabodzi nyimbo yakufungulira na mpembo, kumbalatiza kuti timbafuna kutewezera Baba wathu wakudzulu womwe ambacita bzinthu mwakulongosoka.—1 Wak. 14:33, 40.
3. Kodi kufika na nthawe kumbalatiza tani kuti timbakumbukira wanzathu?
3 Kufika pa nthawe yace kumabalatiza kuti timbakumbukira winango. (Waf. 2:3, 4) Mwaciratizo, tikafika na nthawe pa mitsonkhano Yacikristau na pa mitsonkhano yautumiki bwa kumunda, timbaceukisa lini wanamati wanzathu. Mwa njira inango, tikambazolowera kucedwa, timbawonesa kwa winango kuti nthawe yathu njakufunika kwene-kwene kuposa yawo. Kusunga nthawe kumbalatiza kukhulupirika na nyongo yomwe ni makhalidwe yomwe wanthu wakutizungulira wambayasirira.
4. Penu tina cizolowezi cakucedwa, kodi tingacite ciyani kuti timalise bvutolo?
4 Penu kawiri-kawiri mumbacedwa, kumbukirani mathangwe yace. Bzikonzereni ndondomeko yomwe in’dzakuthandizani kucita mabasa pa nthawe yace. (Mpal. 3:1; Waf. 1:10) Kumbirani Yahova kuti akuthandizeni. (1 Ju. 5:14) Kusunga nthawe ni njira ibodzi yakulatizira kuti timbatenda mitemo ya bzakutonga bzikulu bziwiri—Kufuna Mulungu na kufuna wanzathu.—Mat. 22:37-39.