Kupirira Mazunzo Kumbapereka Umboni bwa Bwino Nkhaniyi yacosedwa mu Buku Lapachaka la Mboni za Yehova 2013
Tsamba 124 ndime 1—Miyanmar (Burma)
Itapita nthawe, m’mudzi ung’ono wa Mongpaw, womwe uli pafupi na malire ya dziko la China, thimu la wanthu wa ukali wa gereja ya Baptista lidatentha Nyumba ya Umambo yomwe ikhali m’mphepete mwa mudziyo. Pakuti Mboni za mbuto imweyi ziribe kucita mantha na bzimwebzi, thimuli lidatentha pomwe nyumba ya mpainiya wakupambulika ndipo lidayamba kuyenda ku nyumba za abale na mpfumakazi acimbawaboneresa. Pomwe abale wadakadandaulira mkulu wa mbutoyo, iye adatawirira wanthu wa Baptistawo. Koma pakumalizira pace, boma lidapitira ndipo lidabvumiza abalewo kuti wamange Nyumba ya Umambo yatsapano si kuti ku mphepete komwe kukhana yakale kule koma pakati pa mudziyo.
Tsamba 128 ndime 1-2
Pa xikola inango mu mzinda wa Khampat, yomwe iri kumalire kwa dziko la Burma ku India, wana 23 wa Mboni wadalamba kukotamira bandeira ndipo diretora wa pamwepo adawacosa xikola. Diretorayo adacemeresa akulu wa gwere awiri kuti wakawonane na thimu la akulu-akulu wa boma, pabodzi na nyakutonga mirandu na mkulu wa acikunda. M’bodzi wa akuluwo, akhali m’bale Paul Khai Khan Thang, ndipo adalewa kuti: “Pomwe tikhawafokotozera bzomwe timbakhulupira pa nkhaniyi mwa kuphatisira basa mavesi, bzikhawonekeratu kuti akulu-akulu wan’kalipa nabzo. Patsogolo pace tidawalatiza tsamba la kunembedwa na boma la kulewa kuti pa msinda uliwense wakuphatisira basa bandeira, wa Mboni za Yahova wambandoime mwa ulemu. Akulu-akulu wabomawo wadasaya cakulewa. Tenepo mkulu wa acikunda ule adauza diretora wa xikolayo kuti abvumize wana wakucosedwawo kuyamba pomwe kupfunza. Ndipo diretora wa xikolayo adapereka kopiya la tsamba lakulewa dza kubvumidwa kwa wanawo ku dipatimenti iri-yense ya xikolayo.”
Tin’kulewa pano akulu-akulu wa boma la Miyanmar wambadziwa kuti Mboni za Yahova zimbapitira lini nkhani za ndale. Mwa kupitiriza kuteweza mitemo ya m’Bibliya, atumiki wa Yahova wacitira umboni wabwino ninga momwe Jezu Kristu adalewera.—Luka 21:13
[Tsamba limweri palibe 4-6]