Kodi Ndimbawoneka tani Kuna Yahova?

1. Kodi Bibliya ndakundendemera tani na supedyo?

¹ Kodi mumbabziwona kangasi pa supedyo? Azinji wa ife timbabziwona pa supedyo nsiku iri-yense thangwe bzimbatithandiza kudziwa momwe tinkuwonekera na bzomwe tingafunikire kukonza. Bibliya lidandendemera na supedyo. Kuwerenga Fala la Mulungu kungaticitise kuwona mkati mwathu, umunthu bomwe Yahova ambawona. (1 Sam. 16:7; Tiy. 1:22-24) Fala la Mulungu ‘lingakwanise kuzindikira bzomwe munthu ambakumbuka na bzomwe ambalinga m’mtima mwace.’ (Waheb. 4:12) Kodi kuwerenga Bibliya na kukumbuka nsiku iri-yense kungatithandize tani kuwona mbali zomwe tingafunikire kulimbisa kuti tikhale apalizi wakupita patsogolo?​—Psal. 1:1-3.

2. Kodi Bibliya lingatithandize tani kubziwona tekha?

² Phatisani Basa Bibliya ninga Supedyo: Bibliya limbalewa bza cikhulupiro ca atumiki wa Yahova comwe cimbatipfunzisa makhalidwe yabwino kuna iye. Mwaciratizo, Davide adawonesa nyongo pa dzina la Mulungu. (1 Sam. 17:45, 46) Zaiya adabzipereka mwakukhwimika kuti apalizire mu dera lakunesa. (Zai. 6:8, 9) Lufoyi likulu la Jezu kuna Baba wace wakudzulu lidamucitisa kuwona utumiki ninga cinthu cakum’tsangalaza na cakum’kondwesa m’mbuto mwa kuwona ninga cimtolo cakulemera. (Ju. 4:34) Akristau wa m’magole dzana lakuyamba, adapalizira na nyongo, adathemba Yahova, ndipo adatsimikiza kuleka kubwerera m’mbuyo. (Mab. 5:41, 42; 2 Wak. 4:1; 2 Tim. 4:17) Kukumbukira bziratizo ninga bzimwebzi kumbatithandiza kubziwona tekha na kufuna kukulisa luso mu utumiki bwathu bwakucena.

3. N’thangwe ranyi tin’funika lini kusiyira mangwana kuti ticinje?

³ Citani Ciri-cense kuti Mukonze Bzakuphonyeka: Mwacibadwa, timbabva lini bwino kubziwona pa supedyo ticisiya bzomwe bziri lini bwino. Tingakumbire Yahova kuti atithandize kubziwona tekha na cakulinga ndipo acitithandiza kucinja kwakufunikirako. (Psal. 139:23, 24; Luka 11:13) Pakuti nthawe yomwe yasala yafupika ndipo moyo wa wanthu uli pa ngozi, tin’funika lini kusiyira mangwana kuti tidzacinje.​—1 Wak. 7:29; 1 Tim. 4:16.

4. N’ciyani cingacitikire munthu womwe ambanyang’anisisa mu Fala la Mulungu acicita ninga momwe awonera?

⁴ Mkati mwa munthu—momwe Yahova ambawona—ndimo mwakufunika kwene-kwene kuposa mawonekedwe yakunja. (1 Pe. 3:3, 4) N’ciyani cingacitikire munthu womwe ambanyang’anisisa mu Fala la Mulungu acicita bzinthu ninga momwe awonera? ‘Iye an’dzakhala lini nyakundobva aciyebwa, koma nyakubva acicita, ndipo acikondwa na bzomwe iye ambacita.’ (Tiy. 1:25) Inde, tin’dzakhala wakukondwa na wakubala bzisapo mu utumiki thangwe ‘tiri ninga supedyo yakuwonesa mbiri ya Yahova.’​—2 Wak. 3:18.