Tidalemekezedwa na Khalidwe Lathu Labwino na Kusaya Kupitira M’bzandale—Nkhaniyi yacosedwa mu Bukhu Lapachaka la Mboni za Yehova la 2014
Sierra Leoa na Guiné
Tsamba 120
Ka Kraxa Kadakhala “Pasaporte” yawo
“Mu 1987, wanthu wakupitirira 1.000 wadagumanika pa Mtsonkhano Wacigawo wakuti ‘Khulupirani Yahova’ ku Guékédou, ku Guiné. Pakuti mtsonkhano wacigawo ukhacitikira pafupi na kumalire kwa Sierra Leoa na Libéria, azinji wa m’madzikoya, anyakudzagumanika pa mtsonkhanoyo, wadatsimikiza kumbabwerera kumuyi nsiku iri-yense mtsonkhano ukamala. Natenepo iwo akhalibe bzitupa bzakufunika kuti acitire nabzo ulendo. Tsono abale wa maudindo pa mtsonkhanowo adakacezerana na anyamphanvu za utongi womwe wambakhala mu maboda ndipo adafika pa kubverana. Anyakugumanika pa mtsonkhanowo wakhandofunikira citupa cibodzi basi—ka kraxa kawo ka mtsonkhano! Wamphabvu za utongi wa m’maboda wakawona ka kraxa ka mawonekedwe ya safalauko, akhawabvumiziratu kuti wapite.”—Everett Berry, womwe akhali m’missionario.
Tamba 149
Tidapulumuka ku Acikunda Wakupanduka
Patapita nthawe, nyakutsogolera acikunda wakupandukawo na amuna wace anai, wadapamba nyumba yangu. Iwo wadatingingimira kuti tikhale nawo, na tenepo tidapitiriza kucita mitsonkhano na kumbacezerana vesi la nsiku, nsiku iri-yense pa nyumbapo. Wacikunda winangowo adatiuza kuti: “Imwepo munkuwerenga vesi la nsiku. Bzinkuwoneka kuti ndimwe Mboni za Yahova.” Iwo wakhalemekeza lini Bibliya, koma wakhalemekeza ife.
Nsiku inango mkulu-mkulu wa acikundawo adabwera kudzazungira acikunda womwe akhali mu nyumba mwanguwo. Iye adamusa Mbale Babawo mwa kuwalemekeza ndipo mwakucita kuphatana manja. Natenepo mkulu-mkuluyo adanyang’anisa acikunda wacewo aciwauza mwakukuwa kuti: “Awa mbabwana wangu ndipo mbabwana wanumbo. Muwasamale bwino, akandopwetekeka pang’ono pokha, ayai katsisi kakandocoka mumsolo mwawo na mwa wanthu winangowa, bzin’thandauza mabvuto kuna imwepo. Tabvana?” Iwo adatawira kuti: “Inde bwana!” Bwana mkuluyo adatipasa citsamba cakutonga kuti gulu la Frente Revolucionária Unida lireke kutipweteka thangwe ra ndife nzika za mtendere.
Itapita minyezi minango, mathimu ya acikunda anyakupandukawo yadayamba kumenyana yokha-yokha na tenepo tidathawira ku Libéria. Kumweko tidagumana pomwe na thimu linango la anyakupanduka. Tenepo tidawauza kuti “Ife ndife Mboni za Yahova.” M’bodzi wa iwo adatibvunza kuti: “Kodi Juwau 3:16 ambati ciyani? Pomwe tidafotokoza mafala ya vesilo, iye adatibvumiza kuyenda.
Patsogolo pace, tidagumana pomwe na mkulu winango wa anyakupanduka ndipo adauza M’bale Babawo na ine kuti timuperekeze. Tidacita mantha kuti angadatipha. Ndipo adadzatiuza kuti nkhondoyo inati kuyamba akhapfunzira na Mboni za Yahova. Iye adatipasa kobiri ndipo adatenga tsamba lathu acikapereka kwa abale wa gwere la pafupi. Patandopita nthawe ing’ono-ng’ono, abale awiri adacita ulendo kubweresa cithandizo kuna ife ndipo iwo adayenda nafe ku mbuto yakusungika.
[Tsamba limweri palibe 4-6]