“Magole 100 ya Kudziwisa Umambo!” Nkhaniyi yacokera mu bukhu la Testemunhas de Jeová—Proclamadores do Reino de Deus

Matsamba 259 mpaka 260

Anyakupfunza Bibliya walibe kutsonkhana pa mtsonkhanoyu na cakulinga ca kukonzekera basali, lomwe lingadadzamwazika pa dziko kwa magole yakutsogolo. Na tenepo, iwo wadalewa kuti umweule ungadakhala mtsonkhano wakumalizira “bzipembedzo bzinati kutsudzulidwa . . . kuti akakhale kudzulu mu umambo bwa Mulungu, pabodzi na Mbuya wathu ndipo na Mulungu wathu.” Koma, napo nthawe iwoneke kukhala yakucepa, kuna iwo basa likulu likhali kucita kufuna kwa Mulungu. Na kukumbukira bzimwebzi, nsiku ya Malinkhuma, pa 8 Setembro, M’bale Rutherford adafotokoza nkhani yakusaya kuyebweka yakulewa bza “Umambo.”

Tsono, bzinembo bza ADV bzikhadaikhidwa kale m’mbuto zakusiyana-siyana za mtsonkhanoyo. Pomwe nkhaniyo ikhafotokozedwa, thandauzo la bzinembobzi lidadziwika pomwe mfotokoziyo akhalewa kawiri-kawiri mafala ya kuti: “Khalani mboni za cadidi na zakukhulupirika za Mbuya. Pitirizani kulimbika mpaka Babulo na bzense bzace bzitapfudzidwa. Palizani mafalaya mbuto zense. Dziko lin’funika kudziwa kuti Yahova ni Mulungu ndipo Jezu Kristu ni mambo wa wamambo na Mbuya wa azimbuya. Ino ni nsiku ikulu pa nsiku zense. Onani, Mambo ankutonga! Imwe ndimwe adziwisi wace. Na tenepo, dziwisani, dziwisani, dziwisani, bza Mambo na umambo bwace.” Nthawe ibodzi-bodziyo nguwo ikulu yomwe kutalimpha kwace ni metro 11, idafuthulidwa patsogolo pa abveseri. Pa nguwopo pakhana mafala yakupasa mphanvu yakuti: “Dziwisani [mu Cingerezi Advertise: mafala yakuimiridwa na bzinembo bza ADV] bza Mambo na Umambo bwace.” Idakhala nthawe yacikondweso. Abveseri adawombera m’manja mwakukondwa. M’bale wacikulire dzina lace Pfannebecker, wa m’gulu la anyakuimba na bzakuimbira pa mtsonkhano, adaikha viola yace pamsolo aciiliza ndipo adakuwa na mafala yace yakubvekera ninga cirewedwe ca ci Alemão: “Ach, Ya! And now we do it, no (Oh, inde! Tsapano tin’cita bzimwebzi, nandi)?” Iwo wadacitadi tenepo.

Nsiku zinai patsogolo pace pomwe mtsonkhano ukadacitika, M’bale Rutherford adacita basa lakupalizira bza Umambo ku nyumba na nyumba pabodzi na abale wa pa mtsokhanoyo, mbali ikulu kuzungulira mbuto ya mtsonkhanoyo, yakutalimpha 72 kilometro. Ndipo bzimwebzi bziribe kulekezera pamwepa. Basa lakupalizira Umambo lidacitidwa mwa mphanvu kuzungulira dziko lense. Gole limwero abale wakucita basa na nyongo wakupitirira 17,000 m’madziko yakuposa 58 wadacitambo basa lakupalizira. Patapita magole mazinji, George Gangas womwe akhalipombo pa mtsonkhano ule, ndipo pambuyo pace adadzakhala m’bodzi wa m’Bungwe Lakutonga, adalewa bza mtsonkhano umweule wa ku Cedar Point kuti: “Cidakhala cinthu cakunembedwa mu msolo na mu mtima mwangu, bzomwe bzin’dzayebweka lini pa moyo wangu wense.”

[Tsamba limweri palibe 4-6]