Tewezerani Ciratizo ca Wapolofeta—Naumi
1. Kodi timbapfunza ciyani na bukhu la Naumi?
1 Ninga momwe Naumi akhadaleweratu, matere ya Ninive wakale yambapereka ciratizo cakuti, Yahova ambabwezera anyamadulanthaka Wace ndipo, napo awengiwo atakhala wamphanvu wangakwanise lini kulimbana na Yahova. (Nau. 1:2, 6) Kukhala tceru na mapolofesiya ya Naumi kungatipase pfunziro mu utumiki bwathu.
2. Tingacite tani kuti upalizi bwathu bukhale bwa phindu?
2 Limbapereka Mtsangalazo na Cidikhiro: Mwakusaya kuwona bwino, bukhu la Naumi limbakhala ninga lin’kundolewa bza kupasa nyathwa Ninive, likulu lakale la mzinda wa Asiriya. (Nau. 1:1; 3:7) Tsono, mafala yamweyo yadakhala bzipsa bzabwino kuna wanthu wa Yahova. Naumi, omwe dzina lace limbathandauza “Mtsangalazo,” adapereka mtsangalazo kuna Wajuda wanzace wakuti mwakusaya kucedwa anyamadulanthaka wawo wangadawoneka lini pomwe! Naumi adatsimikiza pomwe kuti Yahova ‘ni mbuto yakukhotcerereka pa nsiku ya matsautso.’ (Nau. 1:7) Tikambapalizira, timbakhala tinkugawanambo na winango bzipsa bzabwino na kuwalimbisa kuthawira kuna Yahova.—Nau. 1:15.
3. Kodi tingamutewezere tani Naumi mwa kuphatisa basa bziratizo?
3 Phatisani Basa Bziratizo: Yahova adafulizira Naumi kuti andendemeze kumala kwa Ninive na kwa mzinda wa Tebes wa ku Edjipito (No-amoni), womwe udapfudzidwa na Asiriya. (Nau. 3:8-10) Tikambalewalewa na wanthu bza kumala kwa mkonzedwe uno wa bzinthu, tingambabvekese mapolofesiya ya m’Bibliya yakuwonesa kuti Yahova ambakwanisa mafala yace mwakusaya kusiya na libodzilo. Mwaciratizo, pomwe Ababulo na Wamediya adabwera kudzapfudza Ninive mu 632 A.E.C., nvula yamphanvu idacitisa kuti madzi yadzale mu Mkulo wa Tigre, bzomwe bzidacitisa kuti mbali inango ya mpanda wakulimba wa nzindayo igwe. Ninive adapfudzidwa mwakusaya kutenga nthawe, ninga momwe Yahova akhadaleweratu.—Nau. 1:8; 2:6.
4. Kodi tingafotokoze tani nfundo zakubveka bwino mu utumiki?
4 Lewalewani Mwakubveka Bwino: Naumi adanemba mapolofesiyayo nfundo ibodzi na ibodzi. Mfundo zace zikhali zakubveka bwino. (Nau. 1:14; 3:1) Mwakundendemera, tin’funika kuphatisa basa mafala yakusaya kunesa kubva. (1 Wak. 14:9) Pa ulendo bwanu bwakuyamba, mufotokozereni thangwe lomwe mwamuzungira. Pa kupfunza Bibliya na wanthu, wathandizeni kuthumizira cikhulupiro cawo mwa Yahova na Mafala yace ndipo na kuwona momwe nkhanizo angaziphatisire basa pawokha.—War. 10:14
5. Koti tingagumane citsimikizo ciponi mu polofesiya ya Naumi?
5 Kukhulupira kwa Naumi pa kukwanisika kwa mafala ya Yahova kumbabveseseka bwino m’bukhu la Bibliya lakudziwika na dzina lace. Pomwe mkonzedwe wa bzinthu wa Sathani wasala pang’ono kumala, ife timbagumana mtsangalazo wakucokera m’Bibliya wakuti: “Pan’dzakhala lini pomwe kutsautsika.”—Nau. 1:9.