Moyo Wacikodweso wa Umisiyonario. (Mim. 10:22) Nkhaniyi yacosedwa mu Buku Lapachaka la Mboni za Yehova la 2014
Tsamba 123 ndime 2 mpaka 127 ndime 4
Amisiyonario Ankuthandiza Kwene-kwene pa Basa Lakupalizira
Kucokera mu magole ya m’ma 1970 amisiyonario azinji wakutambira mapfunziro pa xikola ya Gileadi alimbisa kwene-kwene basa lakupalizira ku Serra Leoa na Guiné. Winango akhadatumikira kale m’mbuto zinango za mu África ndipo adazolowera mwakusaya kucedwa nyengo ya kumweko. Koma winango kukhali kuyamba kufika ku África. Kodi angadakwanisa tani kukhala ku “thenje la azunguku”? Wonani bzomwe winango adalewa.
“Wanthuwo akhali wakubzicepsa na wakufunisisa kupfunza Bibliya. Kuwona cadidi cinkucinja moyo wawo kudandipasa cikondweso cikulu.”—Hannelore Altmeyer.
“Ndikhaneseka thangwe ra nyengo na matenda. Tsono cikondweso ca kuthandiza wanthu kuti atumikire Yahova cikhali cikulu kwene-kwene.”—Cheryl Ferguson
“Ndidapfunza kukhala wakupirira. Pomwe ndidabvunza mpfumakazi ibodzi kuti ni lini pomwe alendo wace wangadafika, iye adatawira kuti: ‘Ih! Angabwere lero. Angabwere mangwana ayai angabwere mkuca.’ Pomwe iye adawona ninga ndiribe kudekedwa, iye adati: ‘Koma iwo wanibwera!’”—Christine Jones
“Tikhakhala amisiyonario 14 mu nyumba ya mamisiyonariyo ku Freetown wakucokera ku bzikhalidwe na miyambo yakusiyana-siyana. Tikhana bzimbudzi bziwiri, mbuto yakusambira ibodzi, mtcini wakufulira m’bodzi na mbuto yakuphikira ibodzi. Cakudya cikhali cakunesa ndipo cikhali cakusaukira. Mphanvu ya magetsi ikhambagwatika kawiri-kawiri ndipo nthawe zinango tikhamala nsiku zizinji tilibe magetsiyo. Azinji wa ifepano tidabonera na malaria pabodzi na matenda manango ya m’madera yakupsa. Napo bzimwebzi bzingadaticitisa kusiya basa lathu, tidapfunza kukhala pabodzi, kukhululukirana na kugumana cikondweso m’nthawe zakunesa. Kupalizira kukhadekeza kwene-kwene ndipo tidakhala pauxamwali bwabwino na amisiyonario anzathuwo.”—Robert na Pauline Landis.
“Nsiku zomwe tidakhala ku Serra Leoa zikhali nsiku zabwino kwene-kwene pa moyo wathu. Tiribe thangwe la kudandaula ne la kung’ung’udza. Comwe tingalewe n’cakuti takusuwa kwene-kwene kumweko.”—Benjamin na Monica Martin.
“Nsiku inango, tikhali ku mui kwa mai winango womwe akhafunisisa kupfunza cadidi ndipo adatipasa cakudya ca maonekedwe yacilendo kuna ife. Pomwe tidagwanankhula, iye adati: ‘Imweyi ni nyoka, ndacosa kale minga. Dyani.’ Mwaulemu ife tidalamba, tsono iye adatingingimira. Bzinthu ninga bzimwebzi bzikhaticitikira kazinji tsono ife tikhatenda mtima wakutambira alendo omwe wanthuwo akhanawo, ndipo tikhawafuna kwene-kwene.”—Frederick na Barbara Morrisey.
“Mkati mwa magole 43 ya utumiki bwa umisiyonario, ndidakhala pabodzi na amisiyonario wakupitirira 100. Ukhali mwayi wakupambulika kudziwana na wanthu wazinji wa makhalidwe yakusiyana-siyana wense acimbaphata basa na cakulinga cibodzi! N’cikondweso cikulu kwene-kwene kukhala anyabasa anzace wa Mulungu na kuwona wanthu ankuciphatisisa cadidi ca m’Bibliya.”—Lynette Pete.
Kuyambira mu 1947 amisiyonario 154 akhadatumikira kale ku Serra Leoa, na 88 ku Guiné. Mboni zizinji zidatumikirambo m’madziko yamweya pakuthandiza basa lakupalizira. Tsapano ku Serra Leoa kuna amisiyonario 44 ndipo ku Guiné kuna 31. Kubzipereka kwawo na nyongo yomwe adailatiza idatokonya mitima ya wanthu wazinji, Alfred Gunn, womwe ankutumikira mu Komiti ya Nthambi kwa nthawe ikulu, adati: “Timbawakumbukira na mtima wense.”