Lufoyi Limbatidziwikisa—Nkhaniyi yacosedwa mu Buku Lapachaka la Mboni za Yehova la 2014
Africa
Tsamba 48, ndime 1, mpaka 49, ndime 2
“Yahova na Wanjo Wan’dzakhala Axamwali Wangu”
Mariya wa ku Kenya wa magole 70, akhali wa cipembedzo ca Presbiteriana pa moyo wace wense. Iye akhathandiza kwene-kwene cipembedzoco kuti cimbagumane kobiri ndipo adathandiza kuti imangidwe nyumba inango ya mapemphero m’dera lace. Mariya alibe kukomedwa, pomwe m’bodzi mwa wana wace adakhala Mboni. Mwanayo akhambamuuza kuti ayende naye ku mitsonkhano tsono Mariya akhalamba ndipo iye akhambalewa kuti angadabva mafala ya m’ Bibliya mu cirewedwe cace ca Kikuyu si kuti mu Ciswahili. Patsogolo pace Mariya adabvuma kuyenda ku mtsonkano wacigawo womwe udacitika mu cirewedwe ca Kikuyu. Kumweko iye adakhala pa mbuto ya wanthu wakukalamba. Iye adadabwisika na momwe wanthu akhambacita naye bzinthu mwalufoyi. Mariya dalewa kuti akhanati kuwona lufoyi ninga limwero mu cipembedzo cace. Iye adatetekera na tceru nkhani zense ndipo adakomedwa na bzomwe adabva. Pomwe munthu winago adamuuza kuti ayambe kupfunza naye broxura lakuti Tetekerani Mulungu, iye adabvumiratu.
Pambuyo pa kupfunza minyezi ming’ono-ng’ono, Mariya adafunisisa kukhala m’bodzi wa Mboni za Yahova, ndipo adagoneka ku cipembedzo cace. Atsogoleri wa cipembedzoco wadakalipa. Iwo wadacemeresa m’busa mbodzi mu mzinda ukulu wa Nairobi, kuti abwere adzacezerane naye. M’busayo adayezera kumungingimira kuti aleke kusiya cipembedzoco, koma Mariya alibe kubvuma. M’busayo adamubvunza kuti “Mbani an’dzakhala azixamwali wanu mukasiya cipembedzoci? Muna axamwali azinji womwe mbanzanu wa cipembedzoci.”
Mariya adatawira kuti: “Yahova na wanjo wan’dzakhala axamwali wangu. Ndipo Mboni zin’dzakhalambo axamwali wangu.”
Pa kuwona kuti watazira kum’bweza Mariya, m’busayo adamusiya. Mariya ankupitiriza kupfunzira Bibliya mwa kuyenda patsogolo ndipo ambagumanika pa mitsonkhano yense Yacikristau, napo ambakhala kutali na komwe imbacitikira. Tsapanopapa, pomwe iye alibe kukwanisa kugumana xapa kuti ikamufikise ku mitsonkhano, iye adamala nthawe ziwiri ankufamba kuti akagumanike pamitsonkhano. Napo ambatsutsidwa na womwe ambakhala nawo pafupi, Mariya ngwakutsimikiza kuti akwanise cikhumbo cace ca kubatizidwa.
Tsamba 69, ndime 1, mpaka tsamba 70, ndime 2
“Kodi Mwabwera pa Mbuto Yakuphonyeka?”
Mkazi winango wa ku Somalia omwe akhali ku Suécia adacemeredwa kuti akagumanike pa mitsonkhano ku Nyumba ya Umambo, ndipo iye adafuna kuyenda. Tsono bzinthu bziribe kufamba bwino. Palibe na m’bodziyo omwe adamutambira; ali-wense akhandomunyag’anisisa. Iye alibe kukhala wakutsudzuka. Pomwe munthu winango adamuwona kuti iye akhalibe kutsudzuka, adamubvunza kuti; “Kodi mwabwera pa mbuto yakuphonyeka?”
Iye adatawira kuti: “Inde ndin’kuona kuti ndasocera!” Patsogolo pace iye adacoka. Pomwe mkaziyo adadzagumana na Mboni zidamucemera kumitsonkhano zire, akhadakhumudwa ndipo adawauza kuti angadadzabwerera lini pomwe ku mitsonkhanoyo. Mbonizo zidadabwa na bzomwe bzikhacitikabzo, pakuti zikhakumbukira lini kuti zidamuwona mu Nyumba ya Umambo. Atacezerana pomwe pang’ono, wensene wadazindikira kuti iye akhadayenda ku cipembedzo cinango!
Mbonizo zidamulimbisa kuti ayezere pomwe kuyenda ku Nyumba ya Umambo. Iye adabvuma, koma adalewa kuti zingadakaptirira lini mphindi 10 penu angadakabzibva kukhala wakusaya kutsudzuka. Na tenepo, pomwe iye adapita mu Nyumba ya Umambo, ali-wense mu gweremo adamutambira mwa lufoyi! Iye adakomedwa kwene-kwene mpaka adakhala wakumalizira kucoka mu Nyumba ya Umambo pambuyo pa mitsonkhano. Kuyambira pamwepo, iye nthawe zense ambagumanika pa mitsonkhano, ndipo iye tsapano ni mpalizi wakubatizidwa.
[Cithunzi-thunzi pa tsamba 4]
Europa
[Cithunzi-thunzi pa tsamba 4]
MADZIKO
47
WANTHU
741,892,871
APALIZI
1,601,915
MAPFUNZIRO YA BIBLIYA
862,555
[Tsamba limweri palibe 5, 6]