Nyimbo Zatsapano Zakunamatira!
1 Pa mtsonkhano ukulu wa pagole wa Watch Tower Bible and Tract Society of Pennsylvania, womwe udacitika pa 4 Outubro, 2014 padaperekedwa cidziwiso ca kukonzedwa pomwe kwa bukhu lathu la nyimbo. Cadidi cimweci cidakhala cakukondwesa kwene-kwene! Abveseri wense wadakumbusidwa bza kufunika kwa kugumanika kwa nyimbo ya Umambo yomwe tin’funika kukhala nayo pa kunamata kwathu.—Psal. 96:2.
2 Imwepo mungabzibvunze kuti, ‘Thangwe ranyi n’bzakufunika kukonza pomwe bukhu la nyimbo?’ Yalipo mathangwe mazinji. Thangwe lakutoma pa yense, ndakuti kubvesesa kwathu mafala ya Mulungu kunkuyenda kucithumizirika, ndipo bzinkutokonyambo mafala ya nyimbo zathu. (Mim. 4:18) Thangwe linango la kukonzedwa pomwe kwa nyimbo: Mafala mazinji yomwe yankuphatisidwa basa mu bukhu la nyimbo yomwe tinkuphatisa basayi yankubverana na Bibliya lakale la Tradução do Novo Mundo. Mafala yace yacinjidwa kuti yabverane na mafala ya Bibliya lomwe lasanduliziridwa papsa. Pakuti padafunika kucita basa likulu la kunemba pomwe mafala ya m’bukhu la nyimboli, padathumiziridwa nyimbo zinango zatsapano m’bukhulo.
3 Kodi tin’dzafunika kudikhirira mpaka bukhu latsapano la nyimbo litadindidwa kuti tidzayambe kuimba nyimbo zatsapanozo? Ne. Tinkukondwa kukuuzani kuti mkati mwa minyezi inkubwerayi, nyimbo zinango za tsapanozo zin’dzaikhidwa mu Webisaite yathu, jw.org. Nyimbo yatsapanoyo ikadzacosedwa, in’dzaikhidwa pakumalizira pa mtsonkhano wa basa pomwe pan’dzakhala na mafala yakuti ‘nyimbo yatsapano.’
4 Momwe Tingapfunzirire Nyimbo za Tsapano: Bzingakhale bzakunesa kupfunza nyimbo yatsapano. Napo bziri tenepo, mwakundendemera na nyakunemba psalymo, ifepano tin’funa kuimba pa mitsonkhano ya gwere ndipo ‘tinkufuna lini kunyamala.’ (Psal 30:12) Kuti mupfunze nyimbo yatsapano, tewezerani njira zakusaya kunesazi:
• Bveserani mwakubwerezera-bwerezera kaimbidwe ka nyimboyo, yomwe idaikhidwa pa Webisaite yathu. Mukatetekera kwene-kwene kaimbidwe kace, bzin’dzapusambo kuti muikumbukire.
• Pfunzani mafala yace, ndipo yezerani kuyakoya mumtima.
• Pomwe munkubveserapo imbanimbo mucimbatewezera mafala yace. Citani bzimwebzo mpaka nyimboyo mutaizolowera.
• Mbapfunzani mu mthawe zing’ono-ng’ono pa Kunamata ninga Banja mpaka banja lanu lidzaizolowere.
5 Mu minyezi yakutsogolo pomwe nyimbo yatsapanoyo in’dzaikhidwa pakumalizira pa mtsonkhano wa basa, gwerelo lin’dzabvesera kabodzi nyimboyo. Patsogolo pace abveseri wan’dzaimba nyimbo yensene, ninga momwe timbacitira na nyimbo zinango.
6 Pomwe munkukumbukira bzimwebzi, kuimba pa mitsonkhano yathu kumbatipasa cikondweso ca kuphatana mu mafala yathu ya kutumbiza Yahova. Na tenepo, tin’funika lini kukhala na cizolowezi ca kumbasiya mbuto zathu mwakusaya thangwe lakubveka pomwe nyimbo inkuyamba pa mitsonkhano yathu Yacikristau.
7 Iripo njira inango yomwe tingalatizire kutenda mwakuthemera nyimbo zathu zakupambulika. Pa mitsonkhano ya dera na yacigawo, pambaikhidwa nyimbo pomwe cigawo ciri-cense cinati kuyamba. Kawiri pagole, abale na mpfumakazi wakubzipereka wakucokera ku mbali zinayi za dziko wambamanga ulendo na kobiri zawo mpaka ku Patterson, Nova York, na cakulinga cakukonza nyimbo zakudekeza kuti ziphatisidwe basa pa kunamata kwathu. Na tenepo, pomwe nyakutsogolera cigawo ciri-cense ankutikumbira kuti tikhale mbuto zathu kuti tibvesere nyimbo zakundobva zomwe zakonzekeredwa, tin’funika kuti timbacite ninga momwe aleweramo. Kucita kwathu bzimwebzo, kun’dzatithandiza kukonzekeresa mitima yathu kuti titambire nfundo zomwe zinfotokozedwa patsogolo pace.—Ezara 7:10.
8 Tin’maliza m’tsonkhano wathu walero uno, na nyimbo ibodzi yatsapano ya msolo wakuti “Ufumu Umene Ukulamulira Kumwamba Ubwere.” Nyimboyi, yomwe idafotokozedwa pa mtsonkhano wapagole wamala tsapanopayu, idakonzedwa mwakubverana na kupita kwa magole 100 ya kubadwa kwa Umambo.
9 Nyimbo zatsapanozi ni “bzinthu bzabwino” bzakucokeradi kwa Yahova. (Mat. 12:35a) Mbatisimikizeni kupfunza nyimbo zatsapanozi na kuziimba kucokera pansi pamtima mwa kupereka citumbizo na ciremekezo kuna Mulungu wathu!—Psal 147:1.