Imbirani Yahova Mwakukondwa!

1. Kodi kuimba kumbatithandiza kucita ciyani?

NYAKUNEMBA nyimbo munango wakudziwika adalewa kuti: “Mafala yambacitisa munthu kukumbuka. Koma nyimbo imbacitisa munthu kukhala wakukondwa.” Tenepo, nyimbo zathu zimbatumbiza Baba wathu wakudzulu Yahova ndipo zimbalatiza lufoyi lomwe tinalo kuna iye. Ndipo zimbaticitisa kukhala wakufenderena naye. Ndipopa bzimbakhala bzakusaya kunesa kubvesesa kufunika kwa nyimbo zimwezi pa kunamata kwakucena, tikambaziimba pomwe tiri tekha ayai tikakhala pabodzi na abale wathu pa mitsonkhano.

2, 3. (a) Kodi abale winango ambabzibva tani pa nkhani ya kuimba mwakukuwa pa mitsonkhano yathu? (b) Kodi ni mibvunzo iponi yomwe tin’cezerana m’nkhani ino?

² Tsono tani pakulewa bza kuimba mwakukuwa pa mitsonkhano yathu? Kodi mumbacita manyazi? M’madziko manango, amuna ambaneseka kuimba mwakutsudzuka pakati pa gulu. Khalidwe limweri lingabwerese bvuto m’gwere, maka-maka penu akulu wa gwere ambazeza kuimba ayai penu ambakhala wakutanganidwa na mabasa manango pomwe nyimbo inkuimbidwa.—Psalymo 30:12.

³ Kuimba ni mbali ya kunamata kwathu Yahova. Tenepo, tin’funika lini kumbafamba-famba pomwe nyimbo inkuimbidwa. Ndipo tingabzibvunze kuti: ‘Kodi kuimba pa mitsonkhano ndimbakuwona tani? Kodi n’ciyani comwe ndingacite penu ndimbaneseka kuimba pa gulu? Ndipo ndingaimbe tani nyimbozo mwakukondwa?’

KUIMBA NI MBALI YAKUFUNIKA KWENE-KWENE PA KUNAMATA KWACADIDI

4, 5. Kodi ni makonzedwe yaponi ya kuimba yomwe yadacitidwa pa tempwlo mu nthawe ya Ajirayeri?

⁴ Kuyambira kale-kale, atumiki wa Yahova akhala ankuphatisira basa nyimbo kuti amutumbize. Ndipo pomwe Ajirayeri akhali wakukhulupirika kwa Yahova, kuimba kukhacita mbali yakufunika kwene-kwene pa kunamata kwako. Mwa ciratizo, pomwe Davide adacita makonzedwe ya kumanga tempwlo, iye adakonzekeresa Alevi wakukwana 4.000 kuti aimbe nyimbo zakutumbiza Yahova. Ndipo pakati pa wanthu amwewa, 288 akhali adziwi ‘omwe akhadapfunzisidwa kuimbira Yahova.’—1 Nkhani 23:5; 25:7.

⁵ Kuimba nyimbo kudacitambo mbali yakufunika kwene-kwene pa msinda wakufungulira tempwlo. Bibliya limbati: ‘Anyakuliza bzimbututu na anyakuimba akhatumbiza na kutenda Yahova mwakuphatana. Ndipo muwira wa bzimbututu, simbi zakuimbira na bzakuimbira bzinango, ukhabvekera pomwe iwo akhatumbiza Yahova, . . . ndipo umbiri bwa Yahova bukhadadzaza nyumba ya Mulungu wacadidi.’ Ndokumbukirani momwe cikhulupiro ca Ajirayeri cidalimbira pa nthawe imweyi!—2 Nkhani 5:13, 14; 7:6.

6. Kodi ni makonzedwe yaponi yomwe Nehemiya adacita pomwe akhatonga Jeruzalemu?

⁶ Nehemiya, omwe adatsogolera Ajirayeri pa kumanga mpanda wa Jeruzalemu, adalinganizambo Alevi kuti aimbe nyimbo zacitumbizo. Ndipo bzimwebzi bzidacitisa kuti msinda wakupereka mpanda ukhale wakukondwesa kwene-kwene. Nehemiya adalinganiza ‘mathimu makulu-makulu mawiri yakuimba nyimbo zakutenda.’ Anyakuimbawo adafamba padzulu pa mpanda wa mzindayo, aciyenda ku mbali ziwiri zakusiyana mpaka kukagumana ku mpanda omwe ukhali pafupi na tempwlo. Iwo akhaimba mwakukuwa kwene-kwene, mwakuti kuimba kwawoko kukhabvekera na kutali. (Nehemiya 12:27, 28, 31, 38, 40, 43) Tinkupenukira lini kuti Yahova adakhala wakukondwa kwene-kwene pomwe adabva atumiki wace ankuimba mwakukondwa nyimbo zakumutumbiza.

7. Kodi Jezu adalatiza tani kuti kuimba ni mbali yakufunika kwene-kwene kuna Akristau?

⁷ Mu nthawe ya Jezu, kuimba kudapitiriza kucita mbali yakufunika kwene-kwene pa kunamata kwacadidi. Ndokumbukirani bzomwe bzidacitika usiku bwakumalizira bwa moyo wace pansi pano. Jezu atamaliza kucita msinda wa ciraliro ca Mbuya pabodzi na anyakupfunza wace, wense pabodzi adaimba nyimbo zakutumbiza Yahova.—Werengani Mateu 26:30.a

8. Kodi akristau wakuyambirira adapereka ciratizo ciponi pa nkhani ya kuimba nyimbo zakutumbiza Mulungu?

⁸ Akristau wakuyambirira adapereka ciratizo cabwino pa nkhani ya kutumbiza Mulungu na nyimbo. Mwakusiyana na Ajirayeri, omwe akhandonamata Yahova akayenda ku tempwlo, akristauwa akhagumana m’manyumba mwawo kuti aimbe. Napo kuti nyumba zawozo zikhali lini zakudeka kwene-kwene tikazindendemeza na tempwlo, abalewa akhaimba na nyongo. Ndipo mpostolo Paulo adauza akristauwa kuti: ‘Pitirizani kupfunzisa na kulimbisana winango na mwanzace na mapsalymo, tumbizani Mulungu na nyimbo zauzimu mwakutenda, muciimbira Yahova m’mitima yanu.’ (Wakoloso 3:16) Tenepo, nyimbo zomwe ziri m’bukhu lathu la nyimbo zin’funika kumbaimbidwa ‘mwakutenda,’ thangwe izo zimbacita mbali ya cakudya comwe ‘kapolo wakukhulupirika na wanzeru’ ambatikonzera ‘pa nthawe yakuthemera.ʼ—Mateu 24:45.

KODI MUNGAIMBE TANI MWAKUKONDWA?

9. (a) N’thangwe ranyi winango ambazeza kuimba na mtima wense pa mitsonkhano yathu? (b) Kodi tingaimbe tani nyimbo zakutumbiza Yahova ndipo mbani omwe an’funika kutsogolera? (Onina cithunzi-thunzi pa tsamba 3.)

⁹ Kodi ni mathangwe manango yaponi yomwe yangakucitiseni kuzeza kuimba? Pinango banja lanu ayai komwe mumbakhala kulibe cizolowezi ca kuimba. Ayai pinango mumbabva manyazi mukabzindendemeza na anyakuimba wakudziwika omwe mumbawabva m’bzikasi bza mphepo ayai mu TV. Tsono tensenefe tin’funika kumbaimba kuti titumbize Yahova. Tenepo pakuimba, mbadzusani bukhu lanu la nyimbo ndipo mbalamusani msolo, muciimba na mtima wense! (Ezara 3:11; werengani Psalymo 147:1.)b Tsapano Nyumba za Umambo zizinji zina matela ayai ma TV yomwe yambalatiza mafala ya nyimbo, ndipo bzimwebzi bzingatithandize kuti mafala yathu yambacoke bwino. Ndipo mpsakukondwesa kuti tsapano nyimbo za Umambo zinkuimbidwambo mu Xikola ya Utumiki bwa Umambo ya Akulu. Bzimwebzi bzinkulatiza kuti akulu wa gwere an’funika kukhala patsogolo pa nkhani ya kuimba pa mitsonkhano ya gwere.

10. Kodi n’ciyani comwe tin’funika kukumbukira penu timbagopa kuimba mwakukuwa?

¹⁰ Wanthu azinji ambagopa kuimba mwakukuwa thangwe ambakumbuka kuti mafala yawo yan’dzabvekera kwene-kwene ayai iwo ambakumbuka kuti alibe fala labwino. Penu bziri tenepo, kumbukirani kuti ‘tensenefe timbaphonya kazinji kense’ tikambalewalewa, koma bzimwebzi bzimbaticitisa lini kuleka kulewalewako. (Tiyago 3:2) Tenepo, kodi tingaleke kuimba nyimbo zakutumbiza Yahova thangwe rakuti tiribe fala labwino?

11, 12. Kodi tingacite ciyani kuti timbaimbe bwino?

¹¹ Pinango tingacite mantha kuimba thangwe ra kusaya kudziwa kaimbidwe ka nyimboyo. Tsono pana bzinthu bzinango bzomwe tingacite kuti timbaimbe bwino.c—Onani mafala ya m’nyansi.

¹² Imwepo mungaimbe mwamphanvu na mwakukuwa mwa kukwewa mphuwe izinji pa kuimbapo. Ninga momwe mphanvu ya magetsi imbagasira maluju, mphuwe ingakupaseni mphanvu palewalewa ayai pakuimba. Imwepo mun’funika kumbaimba mwakukuwa ninga momwe mumbalewalewera ayai mungathumizire fala lanulo. (Onani malango yomwe yali mu bukhu lakuti Pindulani ndi Sukulu ya Utumiki wa Mulungu matsamba 181 mpaka 184, pa kamsolo kakuti “Kapumidwe Koyenera.”) Ndipo napo Bibliya limbalimbisa atumiki wa Yahova kuti ‘ambakuwe mwakukondwa’ pomwe ankuimba nyimbo zacitumbizo.—Psalymo 33:1- 3.

13. Fotokozani bzomwe tingacite kuti timbaimbe mwakukuwa.

¹³ Pa nthawe ya kunamata kwanu ninga banja ayai pa pfunziro la pamwekha, sankhulani nyimbo zomwe mumbazifuna kwene-kwene m’bukhu lanu la nyimbo. Werengani mafala yace mwakukuwa, mwamphanvu na mwakukondwa. Mukamala, kwewani mphuwe izinji mucilewa mafala ya mzere wense mwakukuwa kabodzi na kabodzi. Patsogolo pace, imbani mafala ya mzereyo na mphanvu ibodzi-bodziyo. (Zaiya 24:14) Mukacita bzimwebzi, mun’dzawona kuti mafala yanu pakuimba yan’dzakhala yamphanvu, ndipo bzimwebzi mpsakufunika kwene-kwene. Ndipo lekani kucita manyazi kuimba mwakukuwa!

14. (a) Kodi kufungula kwene-kwene mulomo wanu kungakuthandizeni tani kuimba bwino? (Onani kwadru yakuti “Bzomwe Mungacite Kuti Mumbaimbe Bwino”.) (b) Kodi ni malango yaponi yomwe mwawona kuti njakuthandiza kwa imwepo kuti mumbaimbe bwino?

¹⁴ Kuti fala lanu likhale lamphanvu mukambaimba, imwepo mun’funika kufungula mulomo wanu. Tenepo mukambaimba, fungulani mulomo wanu kuposa momwe mumbaufungulira pomwe munkulewalewa. Tsono n’ciyani comwe mungacite penu fala lanu liribe mphanvu kwene-kwene? Mungagumane malango manango yomwe yangakuthandizeni pa kwadru yakuti “Kuthana ndi Mavuto Ena,” yomwe iri mu bukhu la Pindulani ndi Sukulu ya Utumiki wa Mulungu tsamba 184.

IMBANI NA MTIMA WENSE

15. (a) Kodi ni cidziwiso ciponi comwe cidaperekedwa pa mtsonkhano wa pa gole wa 2016? (b) Kodi ni mathangwe yaponi yomwe yadacitisa kuti bukhu la nyimbo likonzedwe papsa?

¹⁵ Wense omwe adagumanika pa mtsonkhano wa pa gole wa 2016, adakomedwa kwene-kwene pomwe m’bale Stephen Lett wa m’Bungwe Lakutonga, adadziwisa bza kucosedwa kwa bukhu lipsa la nyimbo lomwe lina msolo wakuti Imbirani Yahova Mwakukondwa. M’bale Lett adafotokoza kuti thangwe libodzi lomwe lidacitisa kuti tikhale na bukhu lipsa la nyimbo ni kusanduliziridwa papsa kwa Baibulo la Dziko Latsopano la Malemba Opatulika. Ndipo mafala manango yadacinjidwa thangwe yankugumanika lini pomwe mu Baibulo la Dziko Latsopano. Thangwe linango ndakuti pathumiziridwa nyimbo zipsa zakulewa bza basa lakupalizira na cakulombolera. Ndipo kuthumizira bzimwebzi, pakuti kuimba ni mbali yakufunika kwene-kwene pa kunamata kwathu, Bungwe Lakutonga lidafuna kukonza bukhu la nyimbo lakuwoneka bwino ndipo kunja kwace kucindendemerana na Baibulo la Dziko Latsopano lomwe lidasanduliziridwa papsa.

16, 17. Kodi ni kucinja kunango kuponi komwe kulipo mu bukhu lipsa la nyimbo?

¹⁶ Nyimbo za m’bukhu lipsali zandandalikidwa m’magulu mwakubverana na nkhani zace, kuti likhale lakusaya kunesa kuliphatisa basa. Mwa ciratizo, nyimbo 12 zakuyambirira zinkulewa bza Yahova, ndipo zisere zakutewera zinkulewa bza Jezu na cakulombolera, mpaka kuyenda kutsogolo. Kumayambiriro kwa bukhu la nyimboyi, kuna ndandanda ya nyimbo zense zomwe ziri m’bukhuli ndipo izo zidagawidwa m’magulu. Bzimwebzi bzingathandize m’bale omwe ana nkhani ya wense kusankhula nyimbo yomwe inkubverana na nkhani yaceyo mwakusaya kunesa.

¹⁷ Pakufuna kuthandiza munthu ali-wense kuti aimbe na mtima wense, mafala manango yacinjidwa kuti nfundo za nyimbozo zibveke bwino. Ndipo mafala yomwe yakhali m’bukhu lakale yomwe nsiku zino yankuphatisidwa lini basa, yadacinjidwa. Mwa ciratizo, nyimbo yomwe ikhana msolo wakuti “Kuleza Mtima” tsapano ina msolo wakuti “Khalani Oleza Mtima,” ndipo mafala ya nyimboyi yacinjidwambo. Ndipo nyimbo yomwe ikhana msolo wakuti “Tetezani Mtima Wanu” tsapano ina msolo wakuti “Timateteza Mtima Wathu.” N’thangwe ranyi bzidafunika kucinja? Thangwe ndakuti pomwe munthu akhaimba nyimboyi, bzikhakhala ninga kuti ankuuza winango bzomwe angacite. Tsono bzimwebzi bzingadacitisa wanthu omwe ayamba tsapanopapa kupfunza Bibliya, maswaka pabodzi na mpfumakazi kusaya kubzibva bwino pa mitsonkhano ya gwere, ya dera na ya cigawo. Ndipopa msolo pabodzi na mafala yace yadacinjidwa.

18. N’thangwe ranyi tin’funika kupfunza nyimbo zomwe ziri m’bukhu lipsa la nyimbo? (Onani mafala ya m’nyansi.)

¹⁸ Nyimbo zizinji zomwe ziri mu bukhu la nyimbo lakuti Imbirani Yahova Mwakukondwa ziri ninga mipembo. Tenepo, nyimbozi zingakuthandizeni kuuza Yahova bzomwe bziri mu mtima mwanu. Ndipo nyimbo zinango zin’dzatithandiza kuti timbalimbisane ‘pa lufoyi na pa mabasa yabwino.’ (Wahebereu 10:24) Ndipopa tin’funika kudziwa bwino kaimbidwe ka nyimbo zathuzi na mafala yace. Njira ibodzi yomwe tingacitire bzimwebzi ni kutetekera maaudiyo ya nyimbo zakuimbidwa na abale na mpfumakazi zathu. Maaudiyo yamweya yambagumanika pa webisaite yathu ya jw.org. Mukambapfunza nyimbozi kumui kwanu, mun’dzaziimba mwakukondwa na mtima wense.d—Onani mafala ya m’nyansi.

19. Kodi n’ciyani comwe wense m’gwere angacite kuti anamate Yahova?

¹⁹ Tin’funika lini kuyebwa kuti kuimba ni mbali yakufunika kwene-kwene pa kunamata kwathu. Ndipo ni njira ibodzi yakulatizira Yahova kuti timbamufuna nakuti timbatenda kwene-kwene bzense bzomwe iye ambaticitira. (Werengani Zaiya 12:5.)e Mukambaimba na mtima wense, mumbalimbisa winango kuti acitembo bzibodzi-bodzi. Ndipo bziribe basa penu ndife tswaka, wacikulire ayai tina magole yakucepa m’cadidi, tense tinganamate Yahova mwa njira imweyi pa mitsonkhano yathu. Tenepo, lekani kuzeza kumbaimba na mtima wense. Ndipo mbatewezani malango ya nyakunemba bukhu la psalymo omwe adati: ‘Imbirani Yahova!’ Inde, mbaimbani mwakukondwa na mwakukuwa!—Psalymo 96:1.