Kodi Munkukonzekera Cikumbuso?

Ikhali nsiku 13 ya Nisani mu gole la 33 E.C. pomwe Jezu akhanati kuphedwa akhadziwa kuti akhadandosala na usiku bwakumalizira kuti akhalire pabodzi na azixamwali wace. Iye adacita cikondweso cakumalizira ca Paskwa pabodzi na iwo ndipo patsogolo pace iye adakhazikisa mtemo upsa, womwe umbacemeredwa Cilaliro ca Mbuya. Cakucitika cakufunika ninga cimweci cimbafuna kukonzekera. Na tenepo, iye adauza Pedru na Juwau kuti acite bzinthu mwakusaya kucedwa. (Luka 22:7-13) Kuyambira pamwepo, mpsakufunikira kuna Akristau womwe anacikhumbo cakugumanika pa Cikumbuso kuti gole liri-lense ambakonzekere cakucitika cimweci. (Luka 22:19) Kodi ni cinthu ciponi cakufunika comwe tin’funika kucita kuti tikonzekere Cikumbuso comwe cin’dzacitika pa 3 Abril?

Bzomwe Akulu Angakonzekere:

• Citani makonzedwe ya kuti mudzaphatise basa Nyumba ya Umambo ayai mbuto inango yakuthemera. Mbutoyo in’funika kudzakhala na bzakukhalira bzakukwana icikhala yakungwerewera na m’bvuniko. Citaniletu makonzedwe yakuti mbutoyo idzakhale yakucena.

• Sankhulani mfotokozi wakuthemera, nyakutsogolera na abale kuti adzacite mpembo wa mkate na vinyu.

• Penu magwere mazinji yan’dzacitira cikumbuso pa mbuto ibodzi, panganani bza nthawe za mitsonkhano na makonzedwe ya kapitidwe na kabulidwe pa mbuto yakucitira nkhaniyo na mbuto yakuimisira kanderendere ayai njinga.

• Sankhulani mucilinganiza alatizi na omwe an’dzafambisa mkate na vinyo.

• Citani makonzedwe yakudzakhala na mkate na vinyo wakuthemera, mbale na makopo ya vidro, meza na kanguwo kakufunikiza.

Bzomwe Apalizi Angakonzekere:

• Khalani na makonzedwe yakudzacita mwakukwanira kampanya yakucemerera wanthu ku Cikumbuso.

• Konzani ndandanda ya anyakupfunza wanu wa Bibliya, acibale wanu, anzanu wakuxikola omwe mumbaphata nawo basa na winango omwe mumbadziwana nawo kuti mudzawacemere.

• Werengani na kukumbukira Kuwerengedwa kwa Bibliya pa nyengo Yacikumbuso.

• Bwerani mudakonzekera ku Cikumbuso kuti mudzatambire alendo.