Kodi Imwepo Mukukonzekera Cikumbuso?

Paskwa yakumalizira yomwe Jezu adacita ikhali yakufunika kwene-kwene. Pakuti akhadasala pan’gono kuphedwa, iye adakonzekera kucita Paskwayi pabodzi na anyakupfunza wace. Ndipo adafuna kuyambisa msinda wa Ciraliro ca Mbuya omwe ungadadzambacitidwa gole liri-lentse. Tenepo, iye adatuma Pedru na Juwau kuti akakonze-konze cipinda comwe angadacitira msindayu. (Lu 22:7-13; onani cithunzi-thunzi ca pa tsamba lakuyamba.) Bzimwebzi, bzikutikumbusa kufunika kwa kukonzekera Cikumbuso comwe cin’dzacitika pa ntsiku ya 27 Março. Gwere limbacita makonzedwe ya mfotokozi wa nkhani, bzizindikiro na bzinango. Tsono, n’ciyani comwe ali-wentse payekha angacite kuti akonzekere Cikumbuso?

Konzekeresani mtima wanu. Werengani na kukumbukira mavesi ya pa nthawe ya Cikumbuso. Mungagumane ndondomeko ya kuwerenga Bibliya mu bukhu la Kupfunza Mavesi Ntsiku na Ntsiku. Pa Apêndice B12-A, B12-B mu Bibliya la Tradução do Novo Mundo da Bíblia Sagrada lakusanduliziridwa papsa, pana ndondomeko yakulinganizidwa bwino. (Onanimbo nkhani za mu Kabukhu ka Mitsonkhano ka Moyo na Utumiki ka mwezi wa Abril, 2020.) Mabanja yangagumane nkhani zakulewa bza cakulombolera kuti apfunze pa kunamata kwa pa banja mu Índice das Publicações da Torre de Vigia ayai mu Bukhu Lakufufudzira la Mboni za Yahova.

Cemeranimbo winango kuti adzagumanike pa Cikumbuso. Citani bzentse bzomwe mungakwanise pakucemera wanthu kuti adzagumanike pa Cikumbuso. Kumbukirani wanthu winango omwe mungawacemere ninga maulendo yanu yakubwereza, wanthu omwe mumbapfunza nawo Bibliya, axamwali na abale wanu. Akulu an’funika kuwonesesa kuti acemera wale omwe adasiya kutsonkhana. Kumbukirani kuti penu munthu ambakhala lini mu gawo lanu, imwepo mungadziwe nthawe na mbuto yomwe Cikumbuso cin’dzacitikira komwe munthuyo ambakhala mwa kutinya pomwe padanemba kuti BZA IFE pa jw.org ndipo tinyani pomwe padanemba kuti “Cikumbuso.”

Kodi n’ciyani cinango comwe tingacite pakukonzekera?