Phatisani Bwino basa Nthawe yanu mu Utumiki
Mboni za Yahova zidamala maora 1.945.487.604 mu utumiki mkati mwa gole la basa la 2014—bzomwe bzinkuwonekeratu kuti tatsimikiza kukhala wakutanganika mu basa la Yahova! (Psal. 110:3; 1Wak. 15:58) Pakuti ‘nthawe yomwe yasalayi yafupika,’ kodi n’bzakukwanisika kuphatisa basa nthawe yathu yakufunika mu utumiki kuti tifikire wanthu azinji?—1 Wak. 7:29.
Kuphatisa bwino basa nthawe yathu mu utumiki bzimbafuna kukhala munthu wakukwanisa kucinja. Mwaciratizo, penu nthawe zense mumbamala nthawe ibodzi ayai kupitirira yakusaya kulewalewa na munthu mu utumiki, kodi mungacite makonzedwe yakucinja kuti mugumane wanthu azinji mucilewalewa nawo? Koma bzakucitika bzimbacinja mwakubverana na mbuto. Tenepo, nfundo zinkutewerazi zingakuthandizeni kuphatisa bwino basa nthawe yanu ya utumiki kuti muleke ‘kundomenya mphepo.’—1 Wak. 9:26.
• Kupalizira Nyumba na Nyumba: Kwa magole mazinji, apalizi azolowera kuyamba nsiku yawo mu utumiki mwa kupalizira nyumba na nyumba. Na tenepo, pakuti wanthu azinji ambaphata basa mkati mwa nsiku, mun’sairanyi kuyezera kupalizira nyumba na nyumba kumaulo ayai pomwe kunkuyamba kudoka nthawe zomwe azinji ambakhala ali pamui? Mkati mwa nsiku, mungagumane phindu mwa kupalizira mu misewu ayai mu mbuto za malonda.
• Upalizi Bwapadeca: Mungakhale na Meza na kangolo kakucita kupfuwa mu mbuto zomwe zimbapitidwa na wanthu azinji malire ya mkati mwa gawo la gwere lathu. (Onani Utumiki Bwathu bwa Umambo bwa Julho 2013, tsa. 5.) Penu ku mbuto zakucitira upalizi bwapadeca kunkudzapita lini wanthu azinji, Komiti ya Utumiki ya Gwere ingawone penu mpsakufunika kucinja kuti kangolo kakucita kupfuwa ayai meza ya mabukhu iyende ku mbuto yomwe imbapitidwa na wanthu azinji.
• Maulendo Yakubwereza na Mapfunziro ya Bibliya: Kodi bzingakwanisike kuti mumbacite maulendo yakubwereza ayai mapfunziro ya Bibliya mu nthawe zomwe wanthu ambanesa kuwoneka? Mwaciratizo, penu utumiki bwa nyumba na nyumba bumbafamba bwino mu nsiku za Malinkhuma kumacibese, kodi mungambacite pfunziro lanu la Bibliya nthawe za masikati ayai usiku? Mukambacita maulendo yakubwereza, kodi mungazungire mapfunziro yanu mu gawo libodzi-bodzilo pa nthawe inango?
Napo bzingakhale bzacadidi kuti timbadzonga nthawe yathu nthawe zense pomwe timbakhala tiri mu utumiki, cikondweso cathu cimbakula pomwe basa lathu la utumiki linkuyenda patsogolo. Mukaona kuti njira yomwe munkucitira utumiki bwanu inkuthandiza lini pa nthawe inango, yezerani njira inango. Pembani kuna Yahova, ‘Mweneciro kubvuna,’ kuti akutsogolereni kuti muphatise bwino basa nthawe yanu mu utumiki!—Mat. 9:38.