Njira Yatsapano Yakucitira Upalizi Bwapadeca

1. Kodi magwere yomwe yana mbuto zakupitidwa na wanthu wazinjisa, yankulimbisidwa kucita ciyani?

¹ Magwere yomwe yana mbuto zomwe zimbapitidwa na wanthu azinjisa yankulimbisidwa kucita makonzedwe ya upalizi bwa padeca, mwa kuphatisa basa meza ayai kangolo kakucita kupfuwa. Penu munkuphatisira basa kangoloko, mpalizi m’bodzi angaime ayai kukhala pambali pa kangoloko. Na tenepo, meza ibodzi in’funika kukhala na apalizi awiri. Apalizi womwe wali pameza ayai pakangolopo, wan’funika kucita nyongo yakukhala wakutsudzuka, wa mtima wauxamwali na kukhala wakufikirika. Penu munthu ankunyang’anisisa meza ayai kangoloko, m’bodzi mwa apaliziwo angayambe kuceza naye, pinango mwa kulewa kuti: “Kodi mudabzibvunzambo kale bzomwe Bibliya limbalewa pa nkhaniyi?” Mpalizi winangoyo ayai awiriwo angapitirize kunyang’anira meza ayai kangoloko pomwe upalizibo bwakusaya kulinganizika bunkucitika.

2. Fotokozani cakucitika cakulatiza kufunika kwa kucita upalizi bwapadeca mwakuphatisa basa meza ayai kangolo kakucita kupfuwa.

² Mapfunziro yatsapano ya Bibliya mazinji yankuyambisidwa mwa kuphatisa basa njira imweyi. Mtsikana m’bodzi wa pa xikola ya mapfunziro yapadzulu, adasankhula kunemba bza Mboni za Yahova pa basa lace lakufufudza, koma alibe kukwanisa kugumana Nyumba ya Umambo. Mu m’dzinga wakutewera wace iye adawona mezayo ku mbuto zamapfunzirozo. Pfunziro la Bibliya lidayambika, ndipo tsapano iye ni mpalizi wakubatizidwa ndipo iye ambacitambo njira imweyi yaupalizi.

3. Kodi wanthu winango wambabva tani na njira imweyi yaupalizi bwapadeca?

³ Mpfumakazi inango yomwe idakomedwa na njira ya upalizi bwapadeca imweyi, idati: “Wanthu winango wambaima pana kangoloko wacitenga marevista yakucosedwa tsapanopayo. Winango wambakhala wakanati kubva pakulewa bza Mboni za Yahova. Ndinkukwanisa kuwona kuti na njira imweyi, azinji wankufikiridwa na cadidi.” Mpfumakazi inango idafotokoza kuti: “Njira yatsapano yakucitira upaliziyi njabwino kwene-kwene, thangwe wanthu wambabwera pana imwepopo napo walibe mtima wakufunisisa kubva.”

4. Thangwe ranyi mpsaphindu kukhala na meza ayai kangolo kakupfuwa mu nthawe ibodzi-bodzi na mbuto ibodzi-bodzi mu m’dzinga uli-wense?

⁴ Mpsaphindu kukhala na meza ayai kangoloko pa mbuto ibodzi-bodzi, mu nsiku zibodzi-bodzi, na nthawe zibodzi-bodzi za m’dzinga uli-wense. Bzakutewera bzace, wanthu ambazolowera kuwona mezayo ayai kangoloko ndipo nthawe zinango ambakhala wakutsudzuka kufendera wacicita mibvunzo ayai kutambira marevista. Kodi gwere lanu linayo makonzedwe ya upalizi bwapadeca? Penu n’tenepo, pinango imwepo mungacitembo njira imweyi yakukondwesa na yaphindu kuti ‘mukapalizire Umambo bwa Mulungu kuli-kwense.’​—Luka 9:60.