Momwe Tingaphatisire Basa Meza ya Mabukhu ayai Kangolo Kakucita Kupfuwa
Upalizi bwakuphatisa basa kangolo kakucita kupfuwa ayai meza ya mabukhu bunkukhala bwaphindu kwene-kwene pa kufikira na cadidi wanthu omwe ana mtima wabwino. (Ju. 6:44) Na tenepo, akulu wankulimbisidwa kucita makonzedwe ya upalizi bwapadeca mu dera la gwere lomwe limbapitidwa na wanthu azinji. Pakuti meza ya mabukhu ayai kangolo kakucita kupfuwa ni cinthu lini cakukhazikika mbuto ibodzi, kawiri-kawiri mpsakufunika lini kucita kukumbira ku boma. Mbani angathemere kuphatisa basa bzimwebzi? Ni apalizi omwe ambakumbuka bwino, wa khalidwe lakulemekezeka ndipo omwe ana luso labwino la kuceza. Bzinkutewerabzi ni bzinango mwa bzinthu bzomwe tingacite na bzomwe tingacite lini kuti bzidzathandize apalizi kugumana phindu.
Bzomwe Mun’funika Kucita:
• Khalani wakufikirika, wakutambira bwino na wakuthandiza anyakupita na pamwepowo. Apalizi winango ambatambira munthu mwakukondwa, ambamwetukira na kulewa mafala yabwino ya kumusana. Penu munthu ankupita na pamwepo acimbanyang’anisa mezayo ayai kangolo kakucita kupfuwako, imwepo mungamuuze kuti, “Penu mungafune mungatenge bukhu liri-lense.”
• Imani mbuto yakuthemera pafupi na meza ayai kangolo kakucita kupfuwako. M’mbuto zinango apalizi waluso waona kuti ni phindu kukhala pafupi na meza ayai kangolo kakucita kupfuwako. Winango awona kuti njira imweyi imbacitisa wanthu kuzeza kuima, tenepo iwo ambakhala patali pang’ono acidikhirira kuti munthu afike pomwe pana meza ayai kangolo kakucita kupfuwako. Pomwe munthu wafendera pamwepo yezerani kuceza naye, pinango mwa kumubvunza kuti “Kodi pa nthawe inango mudabzibvunza kale mbvunzoyu?”
• Phatisani basa Bibliya nthawe zense pomwe mukwanisirepo.
• Fotokozani bza makonzedwe ya pfunziro la Bibliya kuna ali-wense omwe angatenge mabukhu yathu yakupfunzirira, ninga bukhu la Kodi Baibulo Limaphunzitsa Chiyani Kwenikweni. Mungamulatize vidiyo yakuti Thangwe Ranyi Tin’funika Kupfunza Bibliya? mu mtedwe ayai m’mcini wanzeru.
• Bzikakwanisika tengani mulewengo wa mtedwe wa omwe ankufunisisa kudziwa bzizinji. Penu munthuyo ambakhala lini mu gawo limwero, dzazani formulario ya Muzungireni Munthuyu (S-43), ndipo mupase munembi mwakusaya kucedwa.
Bzomwe Mun’funika Lini Kucita:
• Kukhala wakunesa, wakukakamiza ayai kuima pafupi ninga mulindiri.
• Kuwona njira imweyi ya upalizi ninga njira yakundogawanisira mabukhu. Pomwe timbakhala tiri mu utumiki, cikhumbo cathu ni kuyambisa mapfunziro ya Bibliya, tenepo bzin’funika timbaceze na munthu ali-wense.
• Kuphingiza meza ayai kangolo kakucita kupfuwako ayai kumala nthawe ikulu munkuceza na mwanzanu. Penu mun’funa kuphatisa basa mtedwe wanu kuti mupfuwire munthu pa nkhani zanu, bzimbakhala bwino kawiri-kawiri kukhala patali na meza ya mabukhu ayai kangolo kakucita kupfuwako.
• Kupitira pa nkhani za anyakutsutsa. Penu nyakutsutsa ankucita bzinthu mwakunyanyira, bzingakhale bwino kucoka muciyenda mbuto inango.