Phatisani Basa Buku Lapachaka la 2015 kuti Mukumbukire Nsiku zakale-kale—Nkhaniyi yacosedwa mu Buku Lapachaka la Mboni za Yehova la 2015
Tsamba Lakucokera ku Bungwe Lakutonga
Wakufunidwa Abale na Mpfumakazi:
‘Nthawe zense timbatenda Mulungu, tikambakugumani mwense m’mipembo yathu, thangwe nthawe zense timbakumbukira mabasa yanu yakukhulupirika, mabasa yanu ya lufoyi, na kupirira kwanu thangwe ra cidikhiro canu mwa Mbuya wathu Jezu Kristu, pamaso pa Mulungu wathu na Baba.’ (1 Wat. 1:2, 3) Yamweya ni mafala yakudeka mwakubverana na momwe timbakukumbukirani! Tinkutenda Yahova thangwe ra imwepo na basa labwino lomwe mumbalicita. Thangwe ranyi?
Gole lidamalali, mukhatanganidwa na kucita ‘mabasa yacikhulupiro’ na ‘mabasa ya lufoyi’ mwakubverana na mabasa ya Umambo. Azinji wa imwepo mukhanyang’ana njira zakuthumizira utumiki bwanu. Winango wa imwepo mukhayenda kukatumikira ku mbuto zinango ayai m’madziko manango komwe kukhafunika apalizi azinji wa Umambo. Winango akhathumizira utumiki bwawo mwa kucita upalizi bwa padeca. Azinji adalimbisidwa kucita upainiya bwakuthandiza pa nyengo yacikumbuso, mwezi omwe akhazungiridwa na nyakunyang’anira wa dera ayai pa nthawe ya kampanya yakupambulika mu Agosto 2014. Napo bzinthu pa moyo wanu bzingacinje, tinkuwona kuti munkuphatisa basa moyo wanu wense kuna Yahova ndipo ife tinkukutendani. (Wakol. 3:23, 24) N’cadidi, basa lanu lacikhulupiro’ ni thangwe lakuticitisa kuti titende Yahova!
Timbakomedwambo kwene-kwene na ‘mabasa ya lufoyi’ yomwe mumbacita mwakubverana na basa la cimango lomwe gulu la Mulungu linkucita kuzungulira dziko lense. Tinkufunadi nyumba zimwezi tsapanopa, thangwe wanthu wa Yahova wankuyenda wacithumizirika. (Zai. 60:22) Kumbukirani, mulewengo wa apalizi wa gole lidamalali ukhali wa 8.201.545, ndipo mapfunziro yathu ya Bibliya ya mulewengo wa kati na kati wa 9.499.933 yakhacitisidwa mwezi uli-wense. Thangwe ra kuthumizirikaku, nyumba zizinji za nthambi zinkufunika kuthumiziridwa ayai kumangidwa pomwe. N’cadidi, bzimwebzi bzinkuthandauza kuti tinkufunika Nyumba za Umambo zizinji. Pa nthawe ibodzi-bodziyi, bzipinda bzakusandulizira bzinkufunika mu mbuto zizinji za padziko ndipo anyakusandulizira wathu wan’funika kukhala na kucitira basa ku mbuto zomwe cirewedwe cawoco cimbalewedwa.
Bzimwebzi bzingaticitise kubzibvunza kuti, ‘N’ciyani comwe ndingacite kuti ndithandizire pa basa limweri lakumanga nyumbazo?’ Winango mwa ife tingakwanise kugawana nawo pa basa lakumangali mwakubzipereka. Ndipo, napo penu tina maluso yakumangamanga ayai tiribe, tensene tina mwayi wakupereka bzinthu bzathu bzakufunika pakuthandizira mabasa yakufunikaya. (Mim. 3:9, 10) Pa nthawe yakumangidwa kwa tendi lakunamatira, Wajirayeri wadapereka bzinthu bzizinji mwakuti kudaperekedwa cidziwiso cakuti waleke kupereka pomwe bzinthu. (Kuf. 36:5-7) Mwakusaya kupenukira, ciratizo ca m’Bibliyaci cimbatokonya mitima yathu na kutilimbisa. ‘Mabasa ya lufoyi’ yomwe munkucita pa mbali zakufunika za utumiki bwakucenabu ni thangwe linango kuna ife lakuticitisa kutenda Yahova!
Tina thangwe lakupambulika la kuti tikondwe pa kuwona kupirira mwakusaya kutekenyeka kwa abale wathu. Mwa ciratizo, kumbukirani bza abale wathu ku Coreia do Sul. Kuyambira mu 1950, abale wacitswaka mu dziko limweri adapasidwa nyathwa ya kukhala mu kawoko kwa nthawe itali thangwe ra kubvera mitemo Yacikristau mwa kusaya kupitira mu bza ndale. Kwa magole mazinji abale wathu ambaboneresedwa mwa njira imweyi koma iwo ambabwerera lini m’mbuyo. Kupirira kwawo kumbalimbisa cikhulupiro cathu!
Ku Eritrea, abale wathu atatu wali m’kawoko kwa magole yakupitirira 20. Winango, kuphatanidza mpfumakazi zathu na wana wawo, adaikhidwa mu kawoko kwa nthawe zakucepa. Pankucitika nyongo ikulu kuti iwo atsudzulidwe, koma bzinkukwanisika lini. Abale wathu alibe kutaya kukhulupirika kwawo. Iwo adapitiriza kukhala wakukhulupirika napo pomwe akhali pa bzineso bzikulu-bzikulu. Timbayebwa lini wanthu wakukhulupirikawa mu mipembo yathu.—War. 1:8, 9.
N’cadidi kuti azinji wa imwepo muli lini mu kawoko thangwe ra cikhulupiro canu. Na tenepo, azinji wa imwepo munkulimbana na ukalamba, matenda makulu pa moyo, kutsutsidwa na anzanu ayai wacibale wanu wakusaya kukhulupira ndipo na bzineso bzinango bzomwe mumbabzidziwa mwekha. Napo n’tenepo, imwepo munkupitiriza kutumikira Yahova mwakukhulupirika! (Tiy. 1:12) Tinkukutendani. Kupirira kwanu mwacikhulupiro ni thangwe linango lakuticitisa kutenda Yahova.
Inde, mabasa yanu yakukhulupirika, mabasa yanu ya lufoyi na kupirira kwanu kumbaticitisa kukhala na mathangwe yabwino ‘yakutenda Yahova thangwe iye ngwabwino.’ (Psal. 106:1) Kulewa cadidi, timbakufunani mwensenemwe ndipo timbapemba kuti Yahova akulimbiseni, akuthandizeni na kukusimbani kuti mumutumikire mwakusaya kumala.
Ndife Abale wanu,
Bungwe Lakutonga la Mboni za Yahova
[Tsamba limweri palibe 7]