Momwe Tingatokonyere Mtima wa Wale Womwe Timbawapfunzisa
1. Kodi cipfunziso ca Jezu cidatokonya tani mitima ya abveseri wace?
1 Jezu Kristu adatokonya mitima ya abveseri wace. Pa nthawe inango, mitima ya ateweri wace ‘idatetemera’ pambuyo pa kuwafotokozera bzinembo mwakubveka bwino. (Lu. 24:32) Pakuwona kuti kubvera Mulungu kun’funika kucokera mu mtima, kodi tingacite ciyani kuti titokonye mitima ya wale womwe timbawapfunzisa kuti akwanise kucinja bzinthu pa moyo wawo?—War. 6:17.
2. Kodi kuphatisa basa luso na kukhala wakuzindikira kungatithandize tani kuti titokonye mtima wa munthu?
2 Phatisani Basa Luso Ndipo Khalani Wakuzindikira: Kwa wanthu azinji kundowauza bzomwe mpsabwino na bzomwe mpsakuipa bzingawathandize lini kuti acinje. N’cadidi, kutsutsa bzomwe wanthu ambakhulupira bza cipembedzo cawo mwa kuphatisa basa mavesi mazinjisa kungawacitise kusaya kufuna kutibvera. Kuti titokonye mtima wa munthu, cakuyamba tin’funika kuzindikira mathangwe yomwe yadamucitisa kukhulupira na kucita bzomwe ambakhulupirabzo. Mwa luso, kusankhula bwino mibvunzo kun’dzamulimbisa kuti alewelewe makumbukidwe yace. (Mim. 20:5) Patsogolo pace tingasankhule nkhani za mu Fala la Mulungu zomwe zingatokonye mtima wace. Na tenepo, tin’funika kulatiza mtima wa thupo ticikhala wakupirira. (Mim. 25:15) Kumbukirani kuti wanthu ambakula mwauzimu mu njira zakusiyana-siyana. Lekererani kuti pang’ono na pang’ono mzimu wakucena wa Yahova utsogolere makumbukidwe na bzicito bzawo.—Mar. 4:26-29.
3. Kodi tingathandize tani wale womwe timbawapfunzisa kuti akulise makhalidwe yabwino?
3 Wathandizeni Kukulisa Makhalidwe Yabwino: Nkhani za m’Bibliya zomwe zimbalatiza ubwino bwa Yahova na lufoyi lace zingathandize wale womwe timbawapfunzisa kukulisa makhalidwe yabwino. Tingaphatise basa mavesi ninga Psalymo 139:1-4 ayai Luka 12:6, 7 kuti tilatize momwe Mulungu ambakumbukira munthu ali-wense payekha. Pomwe wanthu aniyamba kutenda kudeka mtima kukulu kwa Yahova, lufoyi lawo na kubzipereka kwawo kuna Mulungu kun’dzakula. (War. 5:6-8; 1 Ju. 4:19) Kuthumizira bzimwebzi, pomwe iwo an’pfunza kuti makhalidwe yawo yambatokonya Yahova payekha, bzingawathandize kuti ayambe kucita bzinthu mu njira yomwe imbakondwesa na kulemekeza Yahova.—Psal. 78:40, 41; Mim. 23:15.
4. Kodi tingalemekeze tani ufulu bwakusankhula bwa wanthu, pomwe tinkuwapfunzisa mu utumiki mwathu?
4 Yahova ambakakamiza lini ali-wense kuti abvere mitemo yace. M’mbuto mwace, iye ambakumbira wanthu mwa kuwalatiza nzeru za kutewera malango yace. (Zai. 48:17, 18) Timbatewezera Yahova tikambapfunzisa mu njira yomwe ingathandize wanthu kuwona wokha ubwino bwa kutewera mitemoyo. Pomwe wanthu ambafika pakuwona wokha kufunika kwa kucinja bzinthu pa moyo wawo, bzakutewera bzace bzimbakhala bzakusaya kumala. (War. 12:2) Bzimwebzi bzimbawacitisa kuti wafendererane pafupi na Yahova ‘omwe ambapenda mitima.’—Mim. 17:3.