Napo Penu Ndimwe Mwana Ayai Mkulu, Khalani Ciratizo Cabwino Kuna Winango—Nkhaniyi yacokera mu Buku Lapachaka la Mboni za Yehova la 2015
Europa
Baba Omwe ni Ciratizo Cabwino
Tsamba 71, ndime 2 mpaka tsamba 72 ndime 5
Jemima omwe ambakhala ku Espanha, akhapfunza cadidi pomwe akhali m’ng’ono. Tsono pomwe iye akhana magole 7 moyo wace udacinja. Mai wace adasankhula kuleka kukhala pomwe Mboni ya Yahova ndipo adalambana na baba wace. Pomwe akhana magole 13, Jemima adaleka kuphatana na Mboni ndipo akhalamba thandizo liri lense lauzimu lomwe babace akhamupasa.
Pomwe Jemima akhakula, iye akhacita mbali ya ndale ndipo akhalinga kuti wanthu wambacitiridwe “cirungamo.” Na kupita kwa nthawe, iye adasaya basa ndipo baba wace, a Domingo, adamuuza kuti ambaphate naye basa la kupintari.
Nsiku inango pomwe iwo akhaphata basa pabodzi, a Domingo adamukumbira kuti ambacite naye pfunziro la Bibliya. Iye adalamba ndipo adawauza kuti akanati wakhala na mtima wakufunisisa ndipo akadzafuna an’dzawauza. A Domingo akhatetekera ma audio ya kuwerengedwa kwa Bibliya na marevista pomwe akhakhala ankupintari, koma mwana wawoyo akhambafuna kutetekera nyimbo za mtundu wa pop.
Mu Novembro 2012, a Domingo, omwe akhadalowola pomwe, adatambira mcemo kuti akacite mapfunziro pa Xikola ya Bibliya ya Mabanja. Jemima adadabwisika kubva kuti baba wace angadayenda katambira mapfunziro pa Xikola ya Bibliya kwa minyezi miwiri na kuti akamaliza angadasiya ciri-cense aciyenda kuli-kwense komwe angadatumidwa. Jemima adazindikira kuti cadidi cikhadazikika mu mtima mwa baba wace ndipo iye adafunisisa kudziwa thangwe race.
Jemima adaleka kumbatetekera nyimbo zomwe akhambafuna zire ndipo adayamba kumbatetekera ma audio yomwe baba wace akhambatetekera. Iye adayamba kumbacitambo mibvunzo. Nsiku inango pomwe a Domingo akhali padzulu pa matambiko acimbapintari, Jemima adalewa kuti: “Kodi munkukumbukira pomwe ndidalewa kuti ndikadzafuna kupfunza Bibliya ndin’dzakuuzani? Tsapano nin’funa.
A Domingo adakomedwa kwene-kwene pomwe adabva bzimwebzi. Mu mwezi wa Janeiro 2013, iwo adayamba kumbapfunza pabodzi kawiri pa mdzinga uli-wense. Xikolayo idayamba mu Abril, ndipo iwo adapitiriza kumbapfunza mwakuphatisa basa vidiyo ya pa interneti. Jemima adagumanikambo pa msinda wakumalizira wa mapfunziro ya baba waceyo ndipo adakomedwa kwene-kwene na msindayo. Jemima adabatizidwa pa 14 Dezembro, 2013.
Jemima adalewa kuti “Yahova adapirira nane kwene-kwene, ndipo ndin’dziwa kuti iye an’dzandisiya lini. Iye wandipasa axamwali wacadidi omwe ndingadawagumana lini mu dzikoli. Ubale bwa pa dziko lense bumbandicitisa kutenda kwene-kwene lufoyi likulu la Yahova.”