Oceania

Ni Wana Ang’ono-ang’ono kuti Wapalizire

Tsamba 76-78

Nsiku inango macibese, Teariki, mulumbwana wa magole 7 ku ntsuwa ya Tarawa, yomwe ni mbali ya ku Kiribati, akhapalizira pabodzi na baba wace, a Tueti, mu utumiki. Pomwe wadapita mu nyumba inango, iwo wadagumana thimu la wanthu khumi, amuna na akazi wa magole ya mkati mwa 20. Pomwe baba wa Teariki adamala kupalizira thimulo bzipsa bza Umambo, m’bodzi wa iwo adalewa kuna Tueti kuti: “Timbawona azinji wa imwepo munkupalizira na wana ang’ono-ang’ono. Thangwe ranyi mumbawaboneresa tenepa? Iwo ni wana ang’ono-ang’ono kuti wapalizire bza Mulungu.”

A Tueti adatawira kuti: “Kodi mungafune kuwona penu iye angakwanise kupalizira? Inepano ndingabakaime panjapa ndipo imwepo mubvesere bzomwe iye ati alewe.” Wensewo wadatawira kabodzi na kabodzi kuti: “Inde, bulani tiwone.”

Pomwe a Tuetiwo adabula panjapo, Teariki adabvunza thimulo kuti: “Kodi mumbalidziwa dzina la Mulungu?”

M’bodzi pa thimulo adatawira kuti “Inde ni Jezu!” ndipo munango adati “ni Mulungu” ndipo munango pomwe adati “ni Mbuya.”

Teariki adati: “Bwerani tiwone bzomwe Bibliya limbalewa. Tifungule pa Zaiya 42:5 ndipo tiwerenge pabodzi.” Pomwe adamala kuwerenga, iye adawabvunza kuti: “Mbani omwe ankulewedwa mu vesiri?”

M’bodzi adatawira kuti: “Mulungu.” Na tenepo Teariki adati: “Inde, ni Mulungu wacadidi. Tikawerenga pa vesi 8 n’ciyani comwe Mulungu wacadidi ankutiuza? Iye ankuti: ‘Ine ndine Yahova. Limweri ndiro dzina langu; Ndipo mbiri yangu ndin’dzapasa lini munango.’ Kodi mwawona kuti Mulungu dzina lace ni mbani?”

Wanthuwo wadatawira kuti: “ni Yahova.”

Tsapano wense wakhatetekera mwatceru, ndipo Teariki adawabvunza kuti: “Kodi kuphatisa basa dzina la Mulungu la kuti Yahova kuna phindu lanyi? Tingafungule Mabasa 2:21 kuti tigumane mtawiro. Pambati: ‘Ali-wense omwe anicemera dzina la Yahova, an’dzapulumuka.’” Iye adawabvunza pomwe kuti: “Kodi kuphatisa basa dzina la Mulungu kuna phindu liponi?”

M’bodzi pa thimupo adati: “Kuti tidzapulumuke.”

Pomwe akhalewa nfundo imweyi baba wa Teariki adabwerera pomwe m’nyumbamo. Iye adabvunza thimulo kuti: “Kodi munkuwona tani? Wana wathu wambakwanisa kupalizira? Kodi mpsakuthemera lini kuti timbafambe nawo?” Thimulo mwakuphatana lidabvuma kuti mwanayo ambakwanisa ndipo ngwakuthemera kuti ambacitembo basa lakupalizira. A Tueti adadzati: “Mukapfunza Bibliya, imwepo mungapfunzisembo winango cadidi ninga momwe Teariki wacitiramu.”

[Tsamba limweri palibe 5, 6]]