Khalidwe Labwino Limbapereka Mpata wa Kubzala Njere za Cadidi—Nkhaniyi yacosedwa mu Buku Lapachaka la Mboni za Yehova la 2015
África
Tsapano Mbusa ule Ankubvesera
Tsamba 49, ndime 3 mpaka tsamba 51 ndime 3
Ku África do Sul, m’busa wa cipembedzo cinango cakudziwika bwino adalewa kuti: “Ndin’dzaluza lini pomwe Cikumbuso.” Kodi n’ciyani comwe cidacitisa m’tsogoleri wa cipembedzoyu kuti akagumanike pa cikumbuso ca mu Abril 2014? Bzense bzidacitika pomwe abale awiri wa mtundu wakusiyana womwe wakhapalizira pabodzi wadagogodza msuwo wace. Iwo akhadziwa kuti m’busayo kuyambira kale-kale akhafuna lini kulewalewa nawo. Adaine, omwe ni m’bodzi mwa abalewo adalewa kuti: “Tidadabwisika kuwona iye ankufungula msuwo ndipo adatiuza kuti tipite. Tidamala nthawe zizinji tinkuceza. Iye adadabwisika kuwona mzungu ankupalizira m’dziko la asenzi acimbalewalewa cirewedwe cawo. M’busayo adayamba kukhala na pfunziro la Bibliya lakukhazikika.”
Adaine adapitiriza kulewa kuti: “Munthu umweyu adakhala m’misionario ndipo adakhalambo m’busa kwa magole 40, koma pokhapokha pomwe akhana magole 80 ndipo pomwe adagumana mitawiro yense ya mibvunzo yomwe iye akhanayo. Iye ambafuna bukhu lakuti Tsanzirani Chikhulupiriro Chawo. Tikambapfunza naye, iye ambakoya mu mtima nfundo zinango ndipo ambakaziphatisira basa pakufotokoza nkhani yace mu gereja mwace. Iye adalatiza wanthu womwe ambapemba nawo bukhu lakuti Kodi Bibliya Limbapfunzisa Ciyani Maka-maka?” Iye adawauza kuti: “Wa Mboni za Yahova wakabwera kumui kwanu na bukhuli, watambireni ndipo mutetekere bzomwe iwo wanilewa thangwe bukhuli lidadzala na cuma cauzimu.”
M’busayo adafotokozera Adaine kuti adatsimulidwa na akulu-akulu wa cipembedzo caceco kuti aleke kulewalewa pomwe bza Mboni za Yahova mu cipembedzomo. M’busayo akhadziwa lini bzomwe angadacita. Adaine adakumbukira nkhani inango yakulewa bza m’busa munango, yomwe adaibva mu Buku Lapachaka la Mboni za Yehova la 2013. Pomwe Adaine adawerenga nkhaniyo, m’busayo adalewa kuti: “Nkhani imweyi inkundendemerana na yanguyi! Ndin’funika kucita cakusankhula cikulu kwene-kwene mwakamfulumize.”
M’busayo adagumanika pa Cikumbuso ca pa 14 Abril, 2014 ndipo adalewa kuti an’dzaluza lini pomwe Cikumbuso. Iye adafotokoza mwakutsimikiza kuti anilekeratu cipembedzo cakunama.