República Dominicana

Basa la Kumanga Nyumba za Umambo Linkuyenda Patsogolo

Tsamba 140, ndime 3, mpaka tsamba 141 ndime 3

Thangwe ra kuwanda kwa anyakupfunza watsapano, padafunikira Nyumba za Umambo zizinji. Tenepo, mu Novembro m’gole la 2000, abale ku República Dominicana adayamba kumanga Nyumba za Umambo mwakuthandizidwa na makonzedwe ya cimango yomwe yambaperekedwa m’madziko yakusauka. Na cithandizoci, gwere libodzi lingakwanise kumanga Nyumba ya Umambo ibodzi kwa minyezi miwiri yokha. Pa kufika mwezi wa Setembro 2011, magulu mawiri ya cimango yakhakwanisa kumanga ayai kukonza pomwe Nyumba za Umambo zakukwana 145.

Nyumbazi pabodzi na wakumangawo, wambapereka umboni bwa mphanvu. Mwa ciratizo, mu ka mzinda kanango m’dzikolo abale wadagumana mbuto yabwino yomwe wangadamangira Nyumba ya Umambo ipsa. Mpainiya m’bodzi wakupambulika adakabvunza penu mweneciro mbutoyo angadaigulisa. Munthuyo adatawira kuti: “Lekani kutaya nthawe yanu, ine ndinkugulisirani lini penu mun’funa kumanga gereja.”

Mwakusaya kucedwa, mweneciro mbutoyo adayenda kukazungira m’bale wace ku Puerto Plata omwe akhaduwala ndipo iye ni m’bodzi wa Mboni za Yahova. Pomwe adafika, iye adazindikira kuti banja linango la Mboni za Yahova lidamutenga licikhala naye pabodzi kuti limbamusamalire. Banjalo likhambayenda naye kwa dotolo, ku mitsonkhano na mu utumiki. Munthuyo adabvunza m’bale waceyo kuti iye akhapereka kobiri zingasi kuti banjalo limusamalire. Iye adatawira kuti: “Palibe comwe ndimbapereka. Iwo mbabale wangu.”

Mwamunayo adadabwisika na kudeka mtima kwa Mboni za Yahova ndipo adapfuwira mtedwe mpainiya wakupambulika omwe adaceza naye bza mbuto ule ndipo adamuuza kuti wacinja nzeru ndipo adafuna kumugulisira mbuto ire. Abale wadagula mbutoyo ndipo wadayamba kumanga Nyumba ya Umamboyo. Pakuyamba, mkazi wa mweneciro mbutoyo akhafuna lini Mboni za Yahova. Koma, pomwe mkaziyo adawona momwe abale akhaphatira basa pabodzi pa mbutoyo, iye adati: “Ndikanati kuwona wanthu wakubverana kwene-kwene ninga amwewa.”

[Tsamba limweri palibe 5,  6]