Mareferensiya ya Kabukhu ka Mitsonkhano ka Moyo Wathu na Utumiki
3-9 DEZEMBRO 2018
CUMA CA M’FALA LA MULUNGU | MABASA 9-11
“Munthu Omwe Akhazunza Kwene-kwene Akristau Adadzakhala Mpalizi wa Nyongo”
(Mabasa 9:1, 2) Tsono Saulo adapitiriza kugopswa anyakupfunza wa Mbuya na kufuna kuwapha, na tenepo adayenda kwa mkulu wa ansembe 2 kukakumbira matsamba yakumubvumiza kuti ayende ku masinagoga ya ku Damasko, kuti akakagumana ali-wense wakutewera Njirayo, mwamuna ayai mkazi, akabwere nawo ku Jeruzalemu adamangidwa.
(Mabasa 9:15, 16) Koma Mbuya adamuuza kuti: “Muka uyende, thangwe munthu umweyu ni combo cangu cakusankhulidwa kuti anyamule dzina langu aciyenda nalo kwa mitundu, kwa wamambo na kwa wana wa Jirayeri. 16 Pakuti ine ndin’dzamuwonesa bwino-bwino bzakuwawa bzense bzomwe iye ati adzabonere nabzo thangwe ra dzina langu.”
Kutenda Yahova Ninga Nyakutiumba Wathu
4 Yahova akambawona wanthu, iye ambanyang’anisa lini mawonekedwe ya kunja. M’mbuto mwace iye ambawona mu mtima, mkati mwa munthu. (Werengani 1 Samuweri 16:7b.) Cadidi cimweci cidawonekera pomwe Mulungu adakhazikisa gwere Lacikristau. Iye ambakwewera wanthu kwa iye na mwana wace, wanthu womwe angawoneke ninga wakusaya kufunika. (Ju. 6:44) M’bodzi mwa wanthu ninga amwewa ni m’Farizeu wakucemeredwa Saulo omwe akhali ‘wakunyoza, wakuzunza na wakusaya ulemu.’ (1 Tim. 1:13) Yahova, ‘nyakupenda mitima,’ alibe kuwona Saulo ninga dongo lakusaya phindu. (Mim. 17:3) M’mbuto mwace, Mulungu adawona kuti iye angadakhala ninga dongo lomwe ndakubvuma kuumbika licikhala combo cakufunika—inde, ‘combo cace cakusankhulidwa’ kuti acitire umboni kwa ‘wanthu wa mitundu inango, pabodzi na kwa wamambo na wana wa Jirayeri.’ (Mab. 9:15) Winango omwe Mulungu adawawona kuti angadadzakhala bzombo ‘bzakulemekezeka’ adaphatanidza wanthu omwe akhali bzidakwa, wa makhalidwe yakuipa na mbava. (War. 9:21; 1 Wak. 6:9-11) Pomwe iwo akhakhala na cidziwiso ca m’Fala la Mulungu na kulatiza cikhulupiro, adabvuma kuumbidwa na Yahova.
(Mabasa 9:20-22) ndipo nthawe imweyoletu adayamba kupalizira bza Jezu m’masinagoga kuti iye ni Mwana wa Mulungu. 21 Wense omwe akhamubvesera, akhadabwa kwene-kwene ndipo akhambalewa kuti: “Kodi ngumweyu lini omwe akhaboneresa kwene-kwene wanthu thangwe ra kucemera dzina limweri ku Jeruzalemu? Kodi alibe kubwera kuno na cakulinga cakuti adzawamange kuti akawapereke kwa akulu-akulu wa ansembe?” 22 Koma Saulo akhapitiriza kugumana mphanvu, ndipo Ajuda omwe akhakhala ku Damasko adamala naye nzeru, pakuti iye adawafotokozera nfundo zakubveka bwino zakutsimikizira kuti Jezu ndiyedi Kristu.
Kufufudza Cuma Cauzimu
(Mabasa 9:4) na tenepo iye adagwa pansi, ndipo adabva fala lomwe lidati: “Saulo, Saulo, thangwe ranyi unkundizunza?”
(Mabasa 10:6) Munthuyo ali kumui kwa Simau, nyakufukuta makhanda omwe ambakhala pafupi na nyanza.”
Nfundo yakuthumizira pa Mab 10:6 mu nwtsty
Simau, nyakufukuta makhanda: Munthu nyakufukuta makhanda akhaphata basa na makhanda ya bzirombo, ndipo iwo akhaphatisa basa mtoto kuti acose tunyama twakusalirira kukhandako pabodzi na mafuta. Patsogolo pace, akhalipalanga mowa wamphanvu kwene-kwene, ndipo na makhandayo akhakonza bzinthu bzakusiyana-siyana. Kufukuta makhanda kukhafunika madzi mazinji thangwe rakuti makhandayo yakhambanunkha kuipa, pinango bzimwebzi ndibzo bzidacitisa Simau kukhala pafupi na nyanza pinango kunja kwa Jope. Mwakubverana na Cakutonga ca Mozeji, munthu omwe akhaphata basa na bzirombo bzakufa akhali wakupswipa. (Mwam 5:2; 11:39) Ndipopa Ajuda azinji akhawona kuti anyakufukuta makhanda akhali wanthu wakunyozeka ndipo akhambakhala lini nawo pafupi. Na kupita kwa nthawe bukhu linango lakucemeredwa Talmud lidadzalewa kuti anyakufukuta makhanda akhali wakunyozeka kuposa omwe akhambaphata basa na ndowe za bzirombo. Tsono Pedru alibe kulekerera kuti tsankhulo limucitise kukhala kutali na Simau. Bzomwe Pedru adacitabzi bzidadzamuthandiza pa basa lomwe adadzapasidwa kutsogolo, lomwe likhali kupalizira wanthu omwe akhali lini Ajuda. Ndipo adziwi winango ambalewa kuti fala lacigirego lakuti ‘nyakufukuta makhanda’ (byr·seusʹ) lidadzakhala dzina linango la Simau.
10-16 DEZEMBRO
CUMA CA M’FALA LA MULUNGU | MABASA 12-14
“Barnaba na Paulo Akhapalizira m’Mbuto Zakutali”
(Mabasa 13:2, 3) Pomwe akhatumikira Mulungu na kucita mcepswo, mzimu wakucena udati: “Ndipambulireni Barnaba na Saulo kuti aphate basa lomwe ndidawacemerera.” 3 Tenepo, pambuyo pakucita mcepswo na kupemba, adaikha manja yawo pa iwo ndipo adawasiya kuti ayende.
(Mabasa 13:12) Pomwe adawona bzomwe bzidacitikabzo, mtongiyo adayamba kukhulupira, pakuti adadabwa kwene-kwene na bzomwe akhadapfunza pakulewa bza Yahova.
(Mabasa 13:48) Pomwe wanthu wa mitundu inango adabva bzimwebzi, adakondwa acilemekeza fala la Yahova. Ndipo wense omwe akhana makumbukidwe yabwino yomwe yangadawathandiza kukagumana moyo wakusaya kumala adakhala anyakukhulupira.
(Mabasa 14:1) Tsapano ku Ikoniyo iwo adapita pabodzi mu sinagoga ya Ajuda, ndipo adalewalewa mwakuti thimu likulu la wanthu, la Ajuda pabodzi na Agirego, adakhala anyakukhulupira.
(Mabasa 14:21, 22) Pambuyo pa kupalizira bzipsa bzabwino mu mzinda ule na kucita anyakupfunza azinji, adabwerera ku Listra, Ikoniyo na ku Antiokeya. 22 Kumweko, iwo adalimbisa anyakupfunza kuti apitirize kukhala na cikhulupiro, aciti: “Tin’funika kupita mu Umambo bwa Mulungu mwa matsautso mazinji.”
Kufufudza Cuma Cauzimu
(Mabasa 12:21-23) Nsiku inango, Herode adabvala bzakubvala bzace bza Umambo ndipo adakhala pa mpando mu nyumba yakuyeruzira mirandu aciyamba kufotokoza nkhani kwa wensewo. 22 Pomwe wanthu omwe akhadakonkhanawo adabva bzimwebzo adakuwa kuti: “Yamweya ni mafala ya mulungu sikuti ya munthu!” 23 Pa nthawe imweyoletu anjo wa Yahova adamukantha, thangwe alibe kupasa mbiri Mulungu. Ndipo adadyedwa na nkhonye aciferatu.
(Mabasa 13:9) Tenepo Saulo, wakucemeredwambo kuti Paulo, adadzazidwa na mzimu wakucena, ndipo adamunyang’anisisa
Nfundo zakuthumizira pa Mab 13:9 mu nwtsty
Saulo, wakucemeredwambo kuti Paulo: Pa nkhani imweyi kuyenda kutsogolo, Saulo omwe ankulewedwayu ni Paulo. Mpostoluyu akhali m’hebereu koma akhali nzika ya Roma. (Mab 22:27, 28; Waf 3:5) Pinango kuyambira ali mwana akhadziwika na madzina mawiriya, lacihebereu lakuti Saulo na laciroma lakuti Paulo. Mu nthawe imweyire, cikhali lini cizolowezi ca Ajuda, munthu kukhala na madzina mawiri, maka-maka kwa wale omwe akhakhala kunja kwa Jirayeri. (Mab 12:12; 13:1) Adzinza winango wa Paulo akhana madzinambo mawiri, laciroma na lacihebereu. (War 16:7, 21) Ninga ‘mpostolo wa mitundu yense’, Paulo adatumidwa kuti akapalizire bzipsa bzabwino kwa wanthu omwe akhali lini Ajuda. (War 11:13) Pinango iye adacita kufuna kuphatisa basa dzina laciromali, kuti abvumidwe na wanthu. (Mab 9:15; Wag 2:7, 8) Wanthu winango ambalewa kuti iye adadzaphatisa basa dzina laciromali kuti alemekeze Serjio Paulo. Tsono bzimwebzi bzinkuwoneka kuti mpsacadidi lini, thangwe Paulo akhapitiriza kudziwika na dzinali napo pambuyo pakucoka ku Chipre. Ndipo winango akhalewa kuti Paulo akhatcenkha kuphatisa basa dzina lace lacihebereu, thangwe kalewedwe ka dzinali kakhabveka ninga fala la Cigirego lomwe limbakhala linkulewa bza munthu (ayai cirombo) omwe ambakhala ankufamba mwakusamwa ayai mwakubzikuza mu njira.—Onani mafala yakuthumizira pa Mabasa 7:58.
Paulo: M’Bzinembo Bzacigirego Bzacikristau, dzina lakuti Pauʹlos, lomwe mu Cilatini ni Paulus, limbathandauza “kang’ono”, ndipo limbaphatisidwa basa maulendo 157 likakhala linkulewa bza mpostolo Paulo ndipo likhambalewambo bza Serjio Paulo omwe akhali nduna ya ku Chipre.—Mab 13:7.
17-23 DEZEMBRO
CUMA CA M’FALA LA MULUNGU | MABASA 15-16
“Mwakubverana Adacita Cakusankhula Mwakuphatisa Basa Fala la Mulungu”
(Mabasa 15:1, 2) Amuna winango adapolika kucokera ku Judeya, acikayamba kupfunzisa abale kuti: “Mukasaya kugwatidwa mwakubverana na cakutonga ca Mozeji, mun’dzapulumuka lini.” 2 Tsono Paulo na Barnaba alibe kubverana nabzo, ndipo adatsutsana nawo kwene-kwene. Tenepo, iwo adasankhula Paulo na Barnaba, na winango wa iwo kuti ayende kwa apostolo na akulu wa ku Jeruzalemu kuti akawauze bza kutsutsanako.
(Mabasa 15:13-20) Pomwe iwo adamala kulewalewa, Tiyago adatawira aciti: “Amunamwe, abale wangu, nditetekereni. 14 Simiyoni wafokotoza bwino momwe Mulungu adakumbukira wanthu wa mitundu inango pa nthawe yakuyamba, kuti mwa iwo atenge wanthu wakudziwika na dzina lace. 15 Ndipo bzimwebzi bzinkubverana na mafala ya Apolofeta, ninga momwe bzidanembedwera kuti: 16 ‘Pambuyo pa bzimwebzi ndin’dzabwerera ndicidzaimisa pomwe tendi ya Davide yomwe idagwa; Ndin’dzakonza-konza pomwe bzakudzongeka ndipo ndin’dzaibwezeresa, 17 Ndin’dzacita bzimwebzi kuti wanthu wakusalirawo amulinge Yahova na mtima wense. Amupsage pabodzi na mitundu yense ya wanthu, wanthu wakucemeredwa na dzina langu, alewa tenepo Yahova omwe akucita bzinthu bzimwebzi, 18 bzakudziwika kuyambira kale-kale.’ 19 Tenepo, comwe ndakumbuka n’cakuti tileke kuwanesa wanthu omwe ankucokera ku mitundu inango, omwe ankutendeukira kwa Mulungu, 20 koma mbatiwanembereni kuti watcenkhe bzinthu bzakuipisidwa na bzifanikiso, unzazi, bzakupongonyoledwa na mulopa.
(Mabasa 15:28, 29) Pakuti mzimu wakucena pabodzi na ife tawona kuti bziri bwino tileke kukusenzesani mtolo wakulemera, kupambula bzinthu bzokhabzi bzakufunika, bzomwe ni 29 kupitiriza kutcenkha bzinthu bzakuperekedwa ninga nsembe kwa bzifanikiso, mulopa, bzakucita kuponyongoledwa, na upombo. Mukambabzitcenkha bzinthu bzimwebzi, bzin’dzakufambirani bwino. Tinkukufunirani bzabwino bzense!”
(Mabasa 16:4, 5) Ndipo iwo akhapitiriza kuyenda m’mizinda, acimbapereka bzakutonga bzomwe bzikhafunikira kutewezedwa, bzakucokera kwa apostolo na akulu omwe akhali ku Jeruzalemu bziciyenda kuna atawiri omwe akhagumanika m’mizindayo. 5 Tenepo, magwere yakhambalimbisidwa m’cikhulupiro, ndipo mulewengo wace ukhambathumizirika nsiku na nsiku.
Kufufudza Cuma Cauzimu
(Mabasa 16:6-9) Iwo adapita na ku Firigiya na m’dziko la Galatiya, thangwe mzimu wakucena ukhadawaletsa kulewalewa fala m’cigawo cense ca Asia. 7 Kuthumizira bzimwebzi, pomwe adapolikira ku Miziya, adayezera kupita na ku Bitiniya, koma mzimu wa Jezu ulibe kuwabvumiza kucita bzimwebzo. 8 Na tenepo, adapita na ku Miziya ndipo adakafika mpaka ku Trowa. 9 Ndipo usiku Paulo adawona m’matsomphenya, munthu m’bodzi wa ku Masedoniya adaima acimbakumbira kuti: “Bwerani ku Masedoniya kuno kuti mudzatithandize.”
(Mabasa 16:37) Koma Paulo adawauza kuti: “Iwo adatipfumbula pamaso pa wanthu mwakusaya kutitonga mulandu napo kuti ndife Aroma ndipo adatithusira m’kawoko. Koma tsapano ankuticoseranyi mwakabise-bise? Nee, abwere iwo wokha kudzaticosa momuno.”
Nfundo yakuthumizira pa Mab 16:37 mu nwtsty
ndife Aroma: Amwewa akhali nzika za Roma. Ndipo bzinkuwoneka kuti Paulo na Sila akhalimbo nzika za Roma. Ku Roma kukhana lamulo lakuti mzika za kumweko nthawe zense zikhafunika kutongedwa bwino zikaphonyesa cinthu, ndipo zikhafunika lini kupasidwa cirango pakati pa wanthu. Kukhala mzika ya Roma kukhapasa munthu ufulu na maudindo kuli-kwense komwe angadayenda mu umambobo. Mzika ya Roma ikhafunika kubvera malamulo ya ku Romako sikuti lamulo la mizinda ming’ono-ming’ono. Munthu omwe ni mzika ya Roma akakhala na mulandu, angadabvuma kutongedwa mulanduyo; napo bzikhali tenepoyo iye akhana ufulu bwa kubvedwa na Nyumba ya Mphala ya ku Romako. Napo akakhala na mulandu wa cirango cakufunika kuphedwa, munthu akhana ufulu bwa kukumbira kuti mulandu waceyo utongedwe pomwe na mambo wa Roma. Mpostolo Paulo adapalizira kwene-kwene mu umambo bwense bwa Roma. Iye adaphatisa basa ufulu bwace ninga mzika ya Roma maulendo matatu yomwe yadanembedwa m’Bibliya. Kakuyamba ni ku Firipo pomwe iye adafotokozera nduna ya ku Firipoko kuti akhalibe kulemekeza ufulu bwace pakumumenya.—Kuti muwone maulendo mawiri manango yomwe iye adaphatisa basa ufulu bwace ninga mzika ya Roma onani nfundo zakuthumizira pa Mabasa 22:25; 25:11.
24-30 DEZEMBRO
CUMA CA M’FALA LA MULUNGU | MABASA 17-18
“Tewezerani Mpostolo Paulo Pakupalizira na Pakupfunzisa”
(Mabasa 17:2, 3) Paulo, mwa cizolowezi cace, adapita mu sinagogamo aciyamba kulewalewa nawo, ndipo adamala nsiku zitatu za Malinkhuma ankuceza nawo mwakuphatisa basa Bzinembo. 3 akhambafotokoza na kumbawatsimikizira, kucokera mu bzomwe bzikhadanembedwa, kuti bzikhali bzakufunika kuti Kristu azunzidwe na kuti alamusidwe kwa anyakufa, acimbati: “Uyu ndiye Kristu, Jezu omwe ndinkukupalizirani.”
Nfundo zakuthumizira pa Mab 17:2, 3 mu nwtsty
ankuceza: Paulo akhandolini kuwauza bzipsa bzabwino bzokha. Iye akhawafotokozera na kuwalatiza umboni bwa bzomwe akhalewabzo kucokera m’Bzinembo, bzomwe ni Bzinembo Bzacihebereu bzakufuliziridwa. Iye adacita bzizinji m’mbuto mwakundowerenga Bzinembobzo; iye akhacezerana nawo na kucinja-cinja njira za macezayo mwakubverana na wanthu omwe akhamubvesera. Fala lacigirego lakuti di·a·leʹgo·mai lingathandauze “kucezerana.” Falali limbalewa kucezerana na wanthu. Fala lacigiregoli limbaphatisidwambo basa pa Mabasa 17:17; 18:4, 19; 19:8, 9; 20:7, 9.
kumbatsimikizira, kucokera mu bzomwe bzikhadanembedwa: Mu cigirego fala lace cairo ni “kundendemezera.” Bzimwebzi bzinkuthandauza kuti Paulo akhandendemezera mwakusamala kwene-kwene mapolofesiya yakulewa bza Mesiya yomwe yali m’Bzinembo Bzacihebereu na bzakucitika bza moyo wa Jezu, na kulatiza momwe Jezu adakwanirisira mapolofesiyayo.
(Mabasa 17:17) Tenepo pomwe iye akhali mu sinagoga, adayamba kuceza na Ajuda pabodzi na wanthu winango wakunamata Mulungu. Ndipo nsiku na nsiku, iye akhambacezerana na wanthu omwe akhambagumanika pa msika.
Nfundo yakuthumizira pa Mab 17:17 mu nwtsty
msika: Ukhagumanika ku NO da Acrópole, msika wa ku Atena (m’Cigirego ágora) ukhali ukulu pafupi-fupi 50.000 metros ao quadrado. Ku msikayu kukhacitiwa bzinthu bzizinji sikuti malonda yokha. Ikhali mbuto yomwe akhacitira bzinthu bza malonda bza ndale na kucezerana bza cikhalidwe ca wanthu. Wanthu wa ku Atena akhafuna kwene-kwene kuyenda mbuto zimwezi kuti akacezerane bzinthu bza mapfunziro yapadzulu.
(Mabasa 17:22, 23) Tsono Paulo adaima pakati pa bwalo la Arewopago acilewa kuti: “Imwe amuna wa ku Atena, ndawona kuti pa bzinthu bzense imwepo mumbagopa kwene-kwene mirungu kuposa momwe winango ambacitira. 23 Mwa ciratizo, pomwe ndikhapita na kunyang’anisisa bzifanikiso bzomwe mumbanamata, ndawona mphatso yomwe idanemba kuti: ‘Kwa Mulungu Wakusaya Kudziwika.’ Tsono inepano ndikupalizira bza Mulungu wakusaya kudziwika omwe munkumunamatayo.
Nfundo yakuthumizira Mab 17:22, 23 mu nwtsty
Kwa Mulungu Wakusaya Kudziwika: Fala lacigirego lakuti A·gnó·stoi the·oí likhali mbali ya mafala yomwe yakhadanembedwa pa mphatso inango ya ku Atena. Wanthu wa ku Atena akhalatiza kuti akhagopa mphanvu za mirungu mwa kumanga templo na mphatso zizinji, ndipo akhakonzambo mphatso za mirungu yakusaya kudziwika ninga mulungu Mbiri, mulungu Kubzicepswa, mulungu Mphanvu, mulungu Kukonwesa na mulungu Nsisi. Pinango iwo akhagopa kuti angadasiya kumbali mulungu m’bodzi, bzicicitisa kuti mulunguyo akalipe nawo ayai asiye kuwafuna. Ndipopa iwo adakonzambo mphatso yomwe akhaiphatisa basa pakunamata ‘Mulungu Wakusaya Kudziwika.’ Na mphatso imweyo, wanthuwo akhabvuma kuti Mulungu alipo, koma akhamudziwa lini. Tenepo, mwa luso, Paulo adaphatisa basa mphatso zomwe adawonazo ninga ciyambi ca upalizi bwace kuti alewe bza Mulungu wacadidi omwe iwo akhamunamata kale mwakusaya kudziwa.
Kufufudza Cuma Cauzimu
(Mabasa 18:18) Tsono, pambuyo pa kukhala kumweko nsiku zizinji, adagonekana na abalewo ndipo adapitiriza ulendo bwace bwakuyenda ku Siriya na ngalawa. Pa ulendobu, iye adayenda pabodzi na Akila na Prisila. Paulo adasenga tsisi lace ku Senkereya thangwe ra piciro lomwe akhadacita.
(Mabasa 18:21) ndipo iye adawagoneka aciti: “Yahova akafuna, ndin’dzabwera pomwe kudzakuwonani.” Tenepo adaguduka ku Efezo pa ulendo bwa m’nyanza
Nfundo yakuthumizira pa Mab 18:21 mu nwtsty
Yahova akafuna: Ni mafala yomwe yambatsindika kufunika kwa kuikha kufuna kwa Mulungu patsogolo pomwe tinkucita ayai kukonzekera cinthu ciri-cense. Mpostolo Paulo adapitiriza kukumbukira kwene-kwene mtemo umweyu. (1Wak 4:19; 16:7; Waheb 6:3) Nyakupfunza Tiyago adalimbisambo anyakuwerenga kuti: “Yahova akafuna, tin’khala na moyo na kucita bzakuti-bzakuti.” (Tiy 4:15) Mafala yamweya ni mafala lini yomwe yangadandopita papezi; munthu ali-wense omwe angalewe na mtima wense kuti ‘Yahova akafuna’, akhafunika kucita bzinthu mwakubverana na kufuna kwa Yahovayo. Mafalaya yambafunika lini kulewedwa mwakukuwa nthawe zense, koma kawiri-kawiri yangalewedwe mu mtima.—Onani nfundo zakuthumizira pa Mabasa 21:14; 1Wakolinto 4:19; Tiyago 4:15 na Apêndice A5 mu Tradução do Novo Mundo da Bíblia Sagrada.
31 DEZEMBRO–6 JANEIRO
CUMA CA M’FALA LA MULUNGU | MABASA 19-20
“Bzinyang’anireni Mwekha Pabodzi na Gulu Lense la Mabira”
(Mabasa 20:28) Bzinyang’anireni mwekha pabodzi na gulu lense la mabira lomwe mzimu wakucena wakuikhani ninga anyakunyang’anira, kuti muuse gwere la Mulungu, lomwe iye adagula na mulopa wa mwana wace caiye.
(Mabasa 20:31) “Tenepo, khalani maso ndipo kumbukirani kuti kwa magole matatu, usiku na masikati, ndiribe kuleka kucenjeza ali-wense wa imwe na misozi.
(Mabasa 20:35) M’bzinthu bzense ndakuwonesani kuti mwakuphata basa mwakulimbika m’bzinthu bzimwebzi, muthandize wanthu wakutepa, mucikumbukira mafala ya Mbuya Jezu, pomwe adati: ‘Kupasa kumbabweresa cikondweso cikulu kuposa kutambira.’”
Kufufudza Cuma Cauzimu
(Mabasa 19:9) Pakuti winango akhalamba kukhulupira ndipo akhailewa mafala yakuipa Njirayo pakati pa thimu la wanthu, iye adawasiya acicosa anyakupfunzawo pakati pawo. Ndipo nsiku na nsiku akhambafotokoza nkhani mu nyumba ya mitsonkhano ya pa xikola ya Tirano.
(Mabasa 19:19) Cadidi, azinjisa omwe akhambacita bza matsenga adabweresa mabukhu yawo, aciyatentha pa maso pa wense. Ndipo atalewenga mtengo wace, adadziwa kuti ukhali wa kobiri 50.000 za siliva.