Kukulisa Luso Lathu Mu Utumiki​—Momwe Tinganembere Matsamba Yabwino

THANGWE RANYI MPSAKUFUNIKA: Bukhu la 1 Wakolinto ni libodzi mwa matsamba 14 yomwe mpostolo Paulo adanembera Akristau anzace kuti awalimbise. Pomwe munthu ankunemba tsamba, iye ambakhala na nthawe yakusankhula bwino mafala yace, ndipo iro limbakawerengedwa mwakubwereza-bwereza na omwe anitambirayo. Kunemba tsamba ni njira yabwino yakupalizira adzinza wathu na wanthu omwe timbawadziwa. Ndipo ni njirambo yabwino yakupalizira wanthu omwe timbakhala lini na mwayi wakulewalewa nawo maso na maso. Mwa ciratizo, mungadziwane na munthu omwe an’funa kudziwa bzizinji koma bzicinesa kumbamugumana pamui. Pinango mu gawo lathu timbaneseka kufikira wanthu thangwe rakuti ambakhala m’nyumba zakukhotcereredwa kwene-kwene ninga zomwe zina mbwaya za ukali, litsito la magetsi na nyumba zomwe zimbabvumizidwa lini kufika munthu ali-wense ayai midzi yakutali. Kodi ni bzinthu bziponi bzomwe tin’funika kukumbukira pomwe tinkunembera tsamba munthu omwe tinimudziwa lini?

MOMWE MUNGACITIRE:

• 

  Nembani bzomwe mungadalewa mungadakhala kuti munkulewalewa na munthuyo maso na maso. Kumayambiriro kwa tsambalo nembani dzina lanu na thangwe lomwe munkunembera tsambalo. Pinango munganembe mbvunzo omwe ungacitise munthuyo kukumbukira, ndipo muuzeni bza webisaite yathu. Mukamala, muuzeni bza pfunziro la Bibliya la fovolo ayai lewani inango mwa misolo yakucokera mu libodzi mwa mabukhu yathu yomwe timbapfunzisira. Bzinthu ninga kakhadi ka jw, mcemo na katsamba, bzingaphatisidwembo basa

• Nembani mwacigwatho. Tcenkhani kunemba bzinthu bzizinji kuti nyakuwerengayo aleke kuneta kuwerengako.—Onani momwe munganembere tsamba pa tsamba 8

• Onesesani kuti bzense bzomwe mwanembabzo bzinkuwoneka bwino nakuti kabvekedwe kace ni kauxamwali nakuti mwainemba mwakusamala