Momwe Tingayambisire Maceza mwa Kuphatisa Basa Tumatsamba

Kuyambira mu Jeneiro 2018, pa tsamba lakuyamba la Kabukhu ka Mitsonkhano ka Moyo na Utumiki, pakhana bziratizo bza upalizi bza momwe tingayambisire maceza mu utumiki. Tidalimbisidwa kumbaceza na wanthu m’mbuto mwakumbandowapasa mabukhu. Pakufuna kuthandiza apalizi kucita bzimwebzi, mavidiyo ya bziratizo bza upalizi yakhala yakulatiza momwe tingayambisire maceza mwakuphatisa basa Bibliya lokha basi. Kodi bzimwebzi bzin’funa kulewa kuti tin’funika lini kumbaphatisa basa mabukhu pomwe tikupalizira nyumba na nyumba? Nee, n’tenepo lini. Mwa ciratizo, tumatsamba, n’twabwino kwene-kwene kuti tiyambisire maceza. Tingaphatise basa njira zakutewerazi pomwe tinkugawira katsamba kali-kentse:

1. Bvunzani mbvunzo omwe uli kumayambiriro kwa katsambako.

2. Latizani mtawiro omwe ukugumanika mu cinembo comwe ciri pa tsamba laciwiri padzaulu. Penu munthuyo akana nthawe, werengani mucicezerana naye nfundo zinango zomwe zikugumanika mkati mwa katsambako.

3. Perekani katsambako kwa mwenekaciro nyumba ndipo mulimbiseni kuti awerenge mbali zinango za m’katsambako pa nthawe inango.

4. Mukanati kuyenda, mulatizeni mbvunzo omwe uli pa mbali yakuti “Kuti Mukumbukire” ndipo panganani naye kuti mudzacezerane bza mtawiro wakucokera m’Bibliya pa ulendo bwakubwereza.

Paulendo bwakubwereza, tawirani mbvunzo omwe mudasiya ndipo siyani pomwe mbvunzo unango kuti mudzatawire pa ulendo bwakutewera. Imwepo mungasankhule mbvunzo wa mu webisaite yathu ayai wakucokera m’bukhu lomwe likulatizidwa kumbuyo kwa katsambako. Pa nthawe yakuthemera, mulatizeni broxura lakuti Bzipsa Bzabwino Bzakucokera Kwa Mulungu! ayai bukhu liri-lentse la mu Bzinthu Bzomwe Timbapfunzisira.