Momwe Tingaphatisire Basa Bziratizo bza Upalizi

Kucokera mu Janeiro 2018, timbakhala na bziratizo bza upalizi mu kabukhu ka Mitsonkhano ka Moyo Wathu Wacikristau na Utumiki. Kodi bziratizobzi bzingaphatisidwe tani basa?

Mukapasidwa Mbali ya anyakupfunza: Mungaphatise basa mbvunzo, cinembo, na mbvunzo wakuti mudzacezerane wa mu ciratizo ca upalizi. Koma bzimwebzi bzinfuna lini kulewa kuti imwepo mun’funika kulewa mafala ndendende ninga momwe bziriri mu vidiyo ya ciratizo ca upalizi. Imwepo mungaphatisembo basa ciratizo cakusiyana mwakubverana na nkhani na momwe bzinthu bziriri. Imwepo mungagawirembo mabukhu ya m’Bzinthu Bzomwe Timbapfunzisira, napo palibe kuperekedwa malango ya bzinthu bzomwe bzingaphatisidwe basa pa mbaliyo.

Pomwe muli mu Utumiki: Bziratizo bza upalizi bzidakonzekeredwa kuti bzipereke njira yabwino ya momwe tingapalizirire. Penu mwagumana munthu omwe akufunisisa kudziwa bzizinji, mungapitirize kuceza naye, pinango mwakuphatisa basa ciratizo ca upalizi ca ulendo bwakubwereza. Imwepo mungacinjembo ciratizo ca upalizico ayai mungaphatisembo basa njira inango iri-yentse ya upalizi. Kodi pana nkhani inango ayai cinembo comwe cidakhala cakuphata mtima kwa wanthu wa m’gawo lanu mwezi wamalayi? Kodi wanthu wa m’gawo lanu, ambafuna kwene-kwene kubva notícia zomwe zacitika tsapanopapa? Pa nkhani yakuphatisa basa bziratizo bza upalizi mu njira zakusiyana-siyana, cakulinga cathu cin’funika kukhala ca kugawana bzipsa bzabwino ‘na winango.’—1Wak 9:22, 23.