“Lekani Kunamata Mirungu Yacirendo”

Djakobo akhadziwa kuti Yahova ndiye yekha omwe an’funika kunamatidwa napo Yahovayo akhanati kukhazikisa lamulo la kuletsa kunamata bzifanikiso. (Kuf 20:3-5) Kokha pambuyo pa Djakobo kuuzidwa na Yahova kuti abwerere ku Beteli, ni pomwe iye adadzauzambo wentse wa m’banja mwace kuti ambaleke kunamata bzifanikiso. Ndipo patsogolo pace adataya bzifanikiso bzentse kuphatanidzambo bzinthu bzinango bzomwe pinango-pentse akhambabvala ninga bzithumwa. (Ciy 35:1-4) Mwakusaya kupenukira, Yahova adadekedwa kwene-kwene na bzomwe Djakobo adacita.

Kodi ntsiku zino, tingalatizembo tani kuti tinkunamata Yahova yekha? Njira ibodzi ni kuleka kucita mbali pa bzinthu bzomwe bzimbabverana na kunamata bzifanikiso ayai mizimu. Bzimwebzi bzimbaphatanidza kutaya bzinthu bzentse bzomwe bzimbabverana na mizimu. Ndipo tin’funikambo kupenda mwakusamala penu bzomwe timbasenzeka nabzo bzinkucita mbali ya kunamata mizimu. Nthawe zinango tin’funika kumbabzibvunza kuti: ‘Kodi nimbadekedwa kusenzeka na bzinthu ninga mabukhu ayai kuwona mavidiyo yomwe yambalatiza bzinthu ninga bziphoko, mavampiro ayai bza matsenga? Kodi bzinthu bzomwe nimbasenzeka nabzo bzimbalatiza bzinthu bza matsenga, bzinthu bzakutemberera ayai bzinthu bzinango bzakusaya kuthemera?’ Tin’funika kukhala kutali na bzinthu bzomwe Yahova ambanyantsidwa nabzo.—Psal 97:10.

ONANI VIDIYO YA MSOLO WAKUTI ‘MUTSUTSENI DYABU,’ NDIPO MUKAMALA BVUNZANI MIBVUNZO YAKUTEWERAYI:

• 

  Kodi Palesa akhagumana na bvuto liponi pa moyo wace?

• 

  Thangwe ranyi tin’funika kumbakumbira thandizo la akulu penu ifepano, munthu omwe timbamudziwa ayai munthu omwe timbapfunza naye Bibliya ankulimbana na bvuto la bza mizimu?

• 

  Kodi ni bzinthu bziponi bzomwe wale omwe an’funa kukhotcereredwa na Yahova an’funika kutalikirana nabzo?

• Kodi ni cinthu ciponi cakufunika kwene-kwene comwe Palesa adasankhula kucita?

• Mwa kubverana na ku mbuto komwe mumbakhala, kodi ni njira ziponi zomwe mungaziphatise basa kuti mutcenkhe kubverana na madimonyo?