KUKHALA NA MOYO WACIKRISTAU
Kodi Tingapfunze Ciyani na Wale Omwe Ankutumikira Yahova kwa Magole Mazinji?
M’magwere timbagumana wale omwe ankutumikira Yahova kwa magole mazinji. Ndipo tingapfunzembo bzizinji na cikhulupiro cawo kwa Yahova. Tingawabvunze bza mbiri ya gulu la Yahova na bzineso bzomwe iwo agumana nabzo na momwe Yahova awathandizira kupirira na kukunda bzinesobzo. Tingacite bzimwebzi mwa kucemerera abalewa kumui kwathu pa usiku bwa kunamata kwathu kwa banja, ticiwauza kuti atifotokozere bzinthu bzakulimbisa bzomwe adagumana nabzo pa moyo wawo.
Penu imwepo mukutumikira Yahova kwa magole mazinji, mbauzanimbo maswaka yacikristau bzomwe bzidakucitikirani mkati mwa magole yamweya. Djakobo na Zuze adauza mbadwe zawo bzomwe Yahova akhadawacitira. (Ciy 48:21, 22; 50:24, 25) Na kupita kwa nthawe Yahova adadzauza amuna kuti ambapfunzise wana wawo bza mphanvu zace zikulu. (Bzak 4:9, 10; Psal 78:4-7) Mu ntsiku zathu zinombo abereki na akulu-akulu winango angapfunzisembo maswaka bza bzinthu bzomwe iwo adawona Yahova akucita m’gulu lace.
ONANI VIDIYO YA MSOLO WAKUTI TIDAPITIRIZA KUKHALA WAKUPHATANA POMWE BASA LATHU LIKHADALETSEDWA, NDIPO MUKAMALA CITANI MIBVUNZO YAKUTEWERAYI:
Kodi mthambi ya ku Áustria idathandiza tani abale wathu wa m’madziko yanango yomwe basa lathu likhadaletsedwa?
Kodi abale wa m’madziko yamweya adapitiriza tani kukhala na cikhulupiro cakulimba?
Thangwe ranyi apalizi azinji ku Romênia adasiya gulu la Yahova, ndipo kodi n’ciyani comwe cidawacitisa kuti abwerere pomwe?
Kodi cakucitikaci cikulimbisa tani cikhulupiro canu?
Pfunzani bzinthu bzizinji na abale na mpfumakazi omwe ankutumikira kwa magole mazinji omwe angakuthandizeni kulimbisa cikhulupiro canu kwa Yahova!