Pfunzani Kucokera kwa Apalizi Waluso

Ifepano timbalemekezadi apalizi waluso mu gwere. Winango wankutumikira Yahova mwakukhulupirika kwa magole mazinji. Winango angakhale kuti adagumana maluso yabwino ya utumiki tsapanopapa. Apaliziwa ankuwona momwe Jezu ankutsogolera gwere Lacikristau nsiku zino zakumalizira mwa kuthumizirika kwa basa lakupalizira na kuthandiza wanthu kuti akhale anyakupfunza. (Mat. 28:19, 20) Mwa kucita basa lakupalizirali, iwo adatambira ‘mphanvu yakuposa yacibadwa’ pomwe akhagumana na bzineso na mabvuto yawo. (2Wak. 4:7) Pana bzizinji bzomwe tingapfunze kucokera kuna apalizi walusowa. Iwo akapasidwa mpata, ambakomedwa na kupfunzisa winango bzomwe iwo adapfunza. (Psal. 71:18) Tenepo, tin’funika kunyang’ana mpata kuti tipfunze nawo. Kodi tingacite tani bzimwebzi?

Mu Utumiki: Bzimbafunika kukonzekera kuti Apalizi watsapano ayai omwe alibe luso agumane phindu mu utumiki. Tingapfunze bzizinji mwa kumbanyang’anisa momwe apalizi wakukhwima ambacitira mu utumiki bwawo. (Onani nkhani ya mu Nsanja ya Olonda ya 15 Fevereiro, 2015 ya msolo wakuti “Kodi Tingatani Kuti Tizikondabe Kulalikira?” ndime yacitatu yomwe iri pansi pa kamsolo kakuti “Tizithandiza Atsopano.”) Kodi mudagumana phindu liponi thangwe ra kuphata basa na wanthu ninga amwewa mu utumiki?

Kodi mungakumbire mpalizi wakuthemera kuti aphate basa na imwepo mu utumiki? Penu mpaliziyo ankuduwala, pinango mwakabodzi-kabodzi mungambacitise pfunziro na m’bodzi mwa mapfunziro yanu ya Bibliya pamui pace. Mukamala pfunzirolo, kumbirani mpaliziyo kuti akuuzeni momwe iye awonera acikupasani malango yakufunikira.

Pambulani Nthawe Yanu Kuti Mukhale Nawo: Wadziweni apalizi wa luso mwa kupambula nthawe yanu kuti mukhale nawo. Cemerani m’bodzi wawo kuti mukhale naye pa kunamata kwanu kwa banja ndipo muciteni mibvunzo yakusiyana-siyana. Penu mpaliziyo ankuduwala, kodi mungacite makonzedwe ya kunamata kwanu kwa banja kuti mukacitire kumui kwace? Bvunzani momwe iye adazindikirira cadidi. Kodi ni bzisimbo bziponi bzomwe iye adagumana? Kodi ni kucinja kuponi komwe iye wawona mu dera lino? Ni cikondweso ciponi comwe iye wagumana mwa kutumikira Yahova?

Khalani wakuzindikira mucindendemeza na bzomwe imwepo munkudikhirira kuti mucite. Mwakundendemerana na tensenefe, omwe akhala apalizi kwa nthawe itali ambagumana maluso yakusiyana-siyana. (War. 12:6-8) Winango mbakukalamba ndipo iwo wangakwanise lini kumala nafe nthawe izinji. Na tenepo, tingapfunze kwene-kwene na luso lawo pa kutumikira Yahova mwakukhulupirika.