Kukulisa Luso Lathu mu Utumiki—Thandizani Apalizi Watsapano
Thangwe Ranyi Mpsakufunika: Anyakupfunza watsapano wa Jezu wan’funika kupfunza ‘kusunga bzinthu bzense’ bzomwe iye adatiuza, bzomwe bzimbaphatanidza kupfunzisa winango cadidi. (Mat. 28:19, 20) Wanthu azinji watsapano mu gwere mbakuthemera kale kutengambo mbali mu Xikola ya Utumiki bwa Mulungu ndipo wangapalizire wanthu wa m’banja mwawo ayai azixamwali. Tsono, pomwe iwo wankukuza cikhumbo cawo ca bzomwe wankupfunza wacifika pa kudziwa kuti Yahova an’funa wanthu wense wabve bzipsa bzabwino, iwo wangakhale na cikhumbo cakugawanambo na winango mu utumiki bwakumunda. (War. 10:13, 14) Pomwe wanthu watsapano wabvumidwa kukhala apalizi wakusaya kubatizidwa, kuwapfunzisa bwino kungawathandize kukhala wakutsimikiza, pomwe wankucita ciri-cense kuti wakule mwauzimu.—Luka 6:40.
Momwe Mungacitire:
• Muthandizeni mpalizi watsapanoyo kuti akhale na mabukhu yomwe iye angafunikire pa kupalizira na kupfunzisa. Mulatizeni momwe imwepo mumbakonzekerera pasta yanu ya utumiki bwakumunda, ndipo muuzeni cakulinga ca bukhu liri-lense lomwe muninyamula.
• Mwensene pabodzi, sankhulani ciratizo ca upalizi comwe cimbagumanika mu Utumiki Bwathu bwa Umambo ndipo muciyezezere. Limbisani munthu watsapanoyo kuti ciratizo ca upalizico acifotokoze mwa mafala yace. Yezezerani ciratizoco mwakuphatisa basa malango yomwe yali mu bukhu la Sukulu ya Utumiki pa tsamba 82, pa bzomwe mpsakubverana na gawo lanulo. Mutsimikizireni bwino kufunika kwa kubvala bwino na kuwoneka bwino.—2 Wak. 6:3, 4.
• Pitirizani kumupfunzisa. Mulatizeni mpalizi watsapanoyo khadi la gawo ndipo mupfunziseni momwe angacitire na bzomwe ambanemba pa kucita upalizi bwa nyumba na nyumba. Mulatizeni momwe anganembere wanthu womwe mbakufunisisa. Mupfunziseni momwe iye angaphatisire basa Webisaite ya jw.org mu utumiki na kabukhu kakuti Uthenga Wabwino wa Anthu a Mitundu Yonse. Muthandizeni kuthumizira cikhumbo comwe iye ankukhala naco.—1 Wak. 3:6.
• Khalani wakupirira ndipo mbamutendani. (Mim. 25:11) Khalani ciratizo cabwino. Nyongo pabodzi na thupo lomwe munalo pa iye bzin’dzakhala bzakuthandiza m’magole yakutsogolo.
Yezerani Kucita Bzimwebzi Mkati mwa Mwezi Wathunthu:
• Citani utumiki bwa nyumba na nyumba pabodzi na nyakupfunza wanuyo, ndipo ndokoni naye ku ulendo bwakubwereza ayai pfunziro la Bibliya. Penu mulibe pfunziro la Bibliya, kumbirani apalizi omwe walibe luso mu utumiki kuti muphate nawo basa.