Phatisani Basa Mabukhu ya Khalani na Moyo Wakukondwa Mpaka Kale-kale! mu Utumiki

Tikufunisisa kwene-kwene kukhala na broxura na bukhu lipsa kuti timbapfunzisire wanthu! Timbapemba kwa Yahova kuti asimbe nyongo yathu kuti tikwanise kupfunzisa wanthu azinji. (Mat 28:18-20; 1Wak 3:6-9) Tsono tingaphatise tani basa bzinthu bzipsabzi?

Pakuti pfunziro lomwe lin’dzacitika na bukhuli lin’dzakhala lakucezerana, iro lina njira zipsa zakupfunzisira zomwe mun’funika kuziteweza pomwe mukukonzekera na pomwe mukucitisa pfunziro, ninga momwe malango yali panyantsiya yakulatizira.a

• Werengani nkhaniyo, mukamala cezeranani mibvunzo

• Werengani bzinembo bzomwe bzidanemba kuti “werengani”, ndipo mukamala thandizani nyakupfunzayo kubvesesa momwe angabziphatisire basa

• Onani na kucezerana mavidiyo, mwakuphatisa basa mibvunzo yomwe iri pamwepoyo

• Citani nyongo kuti mumalize pfunziro liri-lentse

Mukakhala muli mu utumiki, yambani kupereka broxura kuti muwone penu munthuyo akufuna kupfunza ayai ne. (Onani kwadru ya msolo wakuti “Bzomwe Tingacite Pakufuna Kupereka Mabukhu Yakuti Khalani na Moyo Wakukondwa Mpaka Kale-kale! mu Utumiki pa Ulendo Bwakuyamba”.) Mukamala kupfunza broxurali ndipo nyakupfunzayo akafuna kupitiriza, mungapereke tsapano bukhulo, muciyamba kupfunza naye pa pfunziro 04. Mukakhala kuti mukupfunza kale na mwamuna mwakuphatisa basa mabukhu yomwe timbapfunzisira, mungayambe kupfunza na mwamunayo bukhu lakuti Khalani na Moyo Wakukondwa Mpaka Kale-kale! Ndipo imwepo ndimwe mungawone pomwe mungafunike kuyambira pfunzirolo.

ONANI VIDIYO YA MSOLO WAKUTI MUKUTAMBIRIDWA KU PFUNZIRO LA BIBLIYA, MUKAMALA BVUNZANI ABVESERI KUTI:

• Kodi n’ciyani comwe anyakupfunza an’dzapfunza m’bukhu lipsali?

• Kodi thangwe ranyi imwepo mun’funika kulatiza vidiyoyi kwa omwe akuyamba kupfunza Bibliya?

• Kodi ni Bzinthu bziponi bzomwe nthawe zentse imwepo mun’funika kulimbikisa anyakupfunza wanu kuti abzikwanirise?—Onani mbali yakuti “Bzomwe Mun’funika Kucita pa Cipande Ciri-centse”