Khulupirani Kuti Mun’dzapulumuka Pakupfudzidwa kwa Dzikoli

Tsapanopapa, Yahova anisiya kupirira na dzikoli. Magereja yakunama yanipfudzidwa, ciphatano ca mitundu ya wanthu cin’dzafuna kupha wanthu wa Mulungu ndipo Yahova an’dzapfudza wanthu wakuipa pa Armagedo. Akristau wentse akudikhirira kudzawona bzinthu bzimwebzi bzikucitika.

N’cadidi kuti ifepano tikudziwa lini bzentse bzomwe bzin’dzacitika pa citsautso cikulu. Tikudziwa lini nthawe yomwe cin’dzayamba. Tikudziwa lini comwe cin’dzacitisa kuti atongi wa dzikoli apfudze magereja yakunama. Tikudziwa lini bzomwe bzin’dzacitika pakuphindukiridwa na mitundu ya wanthu ayai bzomwe bzin’dzacitika pakutiphindukirapo. Ndipo tikudziwambo lini kuti Yahova an’dzaphatisa basa ciyani kuti awapfudze pa nkhondo ya Armagedo.

Tsono Bibliya limbatiuza bzomwe tin’funika kucita kuti tidzakhale wakukhwimika pa mabvuto yomwe tin’dzagumana nayo kutsogolo. Ifepano tikudziwa kale kuti tikukhala mu “ntsiku zakumalizira.” (2Ti 3:1) Tikudziwa kuti kupfudzidwa kwa magereja yakunama kun’dzacitika mu ‘ntsiku zakucepa’ kuti atumiki wa Yahova aleke kudzapfudzidwambo. (Mat 24:22) Tikudziwa kuti Yahova an’dzapulumusa wanthu wace. (2Pe 2:9) Ndipo tikudziwambo kuti Yahova adasankhula Jezu omwe ngwakulungama na wamphanvu kuti adzapfudze wanthu wakuipa pa Armagedo na kupulumusa thimu likulu.  —  Apo 19:11, 15, 16.

Wanthu “an’dzakomoka na mantha” thangwe ra bzinthu bzomwe bzin’dzacitika kutsogoloku. Tsono tikambawerenga m’Bibliya nkhani zakulatiza momwe Yahova adapulumusira wanthu wace, bzomwe an’dzacita kutsogolo na kumbakumbukira bwino-bwino nkhani zimwezi, ‘tin’dzaima pulu ticidjiguma’ thangwe tin’dzadziwa kuti cipulumuso cathu cafendera.  —  Lu 21:26, 28.