Mareferentsiya ya Kabukhu ka Mitsonkhano ka Moyo Wathu na Utumiki
© 2023 Watch Tower Bible and Tract Society of Pennsylvania
1-7 JANEIRO
CUMA CA M’FALA LA MULUNGU | DJOBI 32-33
Tsangalazani Wale Omwe Akucita Thupo
it-1 tsa. 710
Eliu
Eliu akhalibe tsankhulo ndipo akhapereka lini ulemu bwakunyanyira kwa munthu ali-wentse. Iye akhadziwa kuti mwakundendemerana na Djobi, iye adakonzedwa na dongo ndipo akhadziwambo kuti Mulungu Wamphanvu zentse ndiye Mulengi wace. Eliu alibe kulalewa na Djobi mu njira ya kumugopswa, mbuto mwace adalewalewa naye mwa uxamwali, mwakuphatisa basa dzina lace mwakusiyana na bzomwe Elifazi, Bilidadi na Zofari adacita. — Djb 32:21, 22; 33:1, 6.
w14 15/6 tsa. 25 ndi. 8-10
Kodi Mumbawona Wanthu Wakuwofoka Mwauzimu Ninga Momwe Yahova Ambawawonera?
8 Tingakwanise kubvesesa bwino abale wanthu tikambakumbukira mabvuto yomwe iwo akugumana nayo. Winango akuduwala, winango adalowodwa na munthu omwe ambatumikira lini Yahova ndipo winango akucita thupo kwene-kwene. Pinango ntsiku inango ifepanombo tingadzagumane na mabvuto ninga yamweya. Pomwe Ajirayeri akhali ku Edjipito akhali wakusauka na wakuwofoka. Ndipo pomwe akhanati kupita mu Dziko Lakupiciridwa, adakumbusidwa kuti aleke ‘kuumira mtima’ abale wawo omwe akhabonera. Yahova akhafuna kuti iwo aleke kumbanyoza wanthu wakusauka koma ambawathandize. — Deuteronomiyo 15:7, 11; Levitiko 25:35-38.
9 Tin’funika kulimbikisa wanthu omwe akugumana na mabvuto sikuti kuwalewa kuipa ayai kuwapenukira. (Djobi 33:6, 7; Mateu 7:1) Tindendemezere kuti munthu wacita asidente pa mseu ndipo wayenda ku xipitali. Kodi adotolo ambayamba afufudza kuti adziwe penu omwe acitisa asidenteyo ndiye? Ne, iwo ambayamba kumuthandiza mwakamfulumize. Mpsibodzi-bodzimbo na Mkristau mwanzathu omwe awofoka thangwe ra mabvuto yomwe akugumana nayo. Mwakamfulumize tin’funika kuyamba kumulimbikisa. — Werengani 1 Atesalonika 5:14.
10 Kukumbukira kwene-kwene bza mabvuto yomwe abale wathu akugumana nayo kungatithandize kuti timbawone bzakuphonya bzawo mu njira yakuthemera. Mwa ciratizo, kumbukirani bza mpfumakazi zomwe zikutsutsidwa na amuna wawo kwa magole mazinji. Napo kuti izo zingawoneke ninga zakuwofoka, koma izo zina cikhulupiro cakulimba ndipo zimbapirira. Kodi imwepo mumbabva tani mukawona mpfumakazi yomwe ikulera yokha wana ikubwera ku mitsonkhano pabodzi na wana wacewo? Kodi mumbaitenda thangwe ra cikhulupiro cace na nyongo yomwe imbalatiza? Kodi mumbabva tani mukambawona maswaka yakupitiriza kukhala yakukhulupirika napo kuti yambagumana na mabvuto ku xikola? Kukhala wakubzicepesa kungakuthandizeni kuzindikira kuti wanthu omwe ambawoneka ninga wakuwofoka angakhale “wakudala m’cikhulupiro” mwakundendemerana na wanthu omwe akuwoneka kuti bzinthu bzikuwafambira bwino. — Tiyago 2:5.
Pana ‘Nthawe Yakunyamala na Nthawe Yakulewalewa’
17 Mwamuna wa cinai omwe adazungira Djobi, akhali Eliu wa dzinza la Abalahamu. Pomwe amuna atatu wale akhalewalewa na Djobi, Eliu akhandotetekera. Ndipopa pomwe idafika nthawe yakuti alewelewembo, Eliu adakwanisa kupereka malango yabwino, yomwe yadathandiza Djobi kucinja makumbukidwe yace yakuphonyeka. (Djobi 33:1, 6, 17) Cinthu cakufunika kwene-kwene comwe Eliu akhafuna, cikhali cakutumbiza Yahova, sikuti kubzitumbiza iye yekha ayai munthu winango. (Djobi 32:21, 22; 37:23, 24) Bzomwe Eliu adacitabzi, bzikutipfunzisa kuti pana nthawe yomwe tin’funika kunyamala na nthawe yakutetekera. (Tiyago 1:19) Ndipo tikupfunzambo kuti tikambapereka malango, tin’funika kumbakumbukira kuti cinthu cakufunika kwene-kwene ni kutumbiza Yahova sikuti kubzitumbiza tekha.
18 Tikambateweza malango ya m’Bibliya yomwe yambalewa momwe tingalewelewere na nthawe yomwe tingafunike kulewalewa, tin’dzalatiza kuti tikutenda mphaso yakulewalewa. Mambo Salomau adanemba kuti: ‘Mafala yakulewedwa pa nthawe yakuthemera yali ninga cisapo ca maçã ya oro mu mbale za siriva.’ (Mimwani 25:11) Tenepo, tikambatetekera bzomwe winango akulewalewa na kukumbuka tikanati talewa cinthu, mafala yathu yan’dzakhala ninga cisapo ca maçã ya oro yomwe njakufunika kwene-kwene na yakudeka. Na tenepo, bziribe basa kuti talewalewa kwene-kwene ayai pang’ono, mafala yathu yabwino yan’dzalimbisa kwene-kwene winango ndipo Yahova an’dzakomedwa nafe. (Mimwani 23:15; Wayefezo 4:29) Njira imweyi njabwino kwene-kwene thangwe imbatithandiza kulatiza kutenda mphaso yomwe Mulungu adatipasa!
Cuma Cauzimu
w13 15/1 tsa. 19 ndi. 10
Pitirizani Kumufenderera Yahova
10 Mpsabwino kumbakumbukira bza mawonekedwe yathu. Tsono mpsabwino lini kundombakhalira kukumbukira bzomwe tingacite kuti tibise kukalamba kwathuko. Kukalambako kungalatize kuti ndife wanzeru, wakulemekezeka na kuti unthu bwathu bwa mkati n’bwakudeka. Bibliya limbalewa kuti: “Invi zikagumanika mu njira yacirungamo ni korowa yakudeka.” (Mimwani 16:31) Ni momwe Yahova ambatiwonera ndipo ifepano tin’funika kumbabziwonambo mu njira ibodzi-bodziyo. (Werengani 1 Pedru 3:3, 4.) Tsono kodi ni bwino kucita operasau ayai kuphatisa basa mankhwala na cakulinga cakuti tipitirize kukhala wakudeka? “Cikondweso comwe Yahova ambapereka” ndico comwe cimbadekesa munthu napo kuti ngwakukalamba ayai akuduwala thangwe cimbacokera mu mtima. (Nehemiya 8:10) Mu dziko lipsa ndimo momwe tin’dzakhala na thanzi labwino ndipo tin’dzadeka ninga kamwana. (Djobi 33:25; Zaiya 33:24) Pomwe tikudikhirira nthawe imweyo, bwerani ticite bzinthu bzanzeru na kukhala na cikhulupiro cakulimba. Kucita bzimwebzi kungatithandize kukhala pa uxamwali na Yahova na kukhalambo na moyo wabwino ntsiku zino. — 1 Timotio 4:8.
8-14 JANEIRO
CUMA CA M’FALA LA MULUNGU | DJOBI 34-35
Tikacitiridwa Bzinthu Bzakusaya Cirungamo
Kodi Mulungu Adakhala Tani?
Mulungu ambacita bzinthu bzabwino nthawe zense. Bibliya limbati: ‘Mulungu wacadidi angacite lini bzakuipa na pang’onopo, ndipo Wamphanvu zense angacite lini bzinthu bzakusaya kulungama!’ (Djobi 34:10) Ciyeruzo ca Mulungu n’cakulungama, ndipo pakulewa bza Yahova, nyakunemba bukhu la Salimo adati: ‘Mun’dzayeruza wanthu mwacirungamo.’ (Salimo 67:4) Pakuti ‘Yahova ambawona bzomwe bziri mu mtima’ mwathu, iye ambapumpsidwa lini na cinyengo, koma ambakwanisa kuzindikira cadidi cathu, acipereka ciyeruzo cakuthemera. (1 Samuyeli 16:7) Kuthumizira bzimwebzi, Mulungu ambawona cinthu ciri-cense cakusaya kulungama na cinyengo comwe ciripo pa dziko la pansi pano. Ndipo iye wapicira kuti tsapanopapa ‘anyakuipa an’pfudzidwa pa dziko la pansi.’ — Mimwani 2:22.
N’ciyani Cin’dzacitika Umambo bwa Mulungu Bukadzafika?
5 Kodi Yahova an’dzacita ciyani? Tsapano Yahova ankupereka mpata wakuti wanthu wakuipa acinje. (Zaiya 55:7) Napo kuti dzikoli lin’pfudzidwa tsapanopa, iro linati kutambira ciyeruzo cakumalizira. Tsono n’ciyani comwe cin’dzacitikira wale omwe ankulamba kucinja na omwe ambathandizira dziko lomwe linkuthamangira ku citsautso cikulu? Yahova wapicira kupfudza wanthu wense wakuipa pa dziko la pansi. (Werengani Salimo 37:10.) Ntsiku zino, wanthu azinji ambabisa bzakuipa bzomwe iwo ambacita, ndipo kawiri-kawiri iwo ambalangidwa lini. (Djobi 21:7, 9) Koma Bibliya limbatikumbusa kuti: ‘Maso ya Mulungu yambanyang’anisisa njira za munthu, ndipo Iye ambawona mafambidwe yace yense. Palibe mdima ne mdima wamphanvu kuti wanthu omwe ambacita bzakuipa abisalikire.’ (Djobi 34:21, 22) Tenepo, palibe mbuto yakubisalira Yahova. Iye ambawona cinthu ciri-cense comwe wanthu wakuipa ambacita. Pambuyo pa Armagedo, tin’dzanyang’ana mbuto yomwe wakuipa akhakhala, koma tin’dzawawona lini. — Salimo 37:12-15.
Lekani Kubvuma Kuti Cinthu Ciri-centse Cikutaziseni Kutewera Jezu
19 Kodi ntsiku zino timbagumanambo na bvuto ninga limweri? Inde. Wanthu azinji ntsiku zino ambakomedwa lini nafe thangwe rakuti timbapitira lini nkhani za ndale. Iwo ambafuna kuti tiyende ku kavota, tsono ifepano timbadziwa kuti tikasankhula munthu kuti akhale mtongi wathu, timbakhala tikulamba Yahova. (1 Samuyeli 8:4-7) Pinango wanthu angakumbukembo kuti tin’funika kumbamanga maxikola, kumanga maxipitali na kucitambo mabasa yomwe yangathandize wanthu wa komwe timbakhala. Iwo ambaipidwa thangwe rakuti timbaikha basa lakupalizira pa mbuto yakuyamba pa moyo wathu, sikuti kuyeza kumalisa mabvuto ya dzikoli.
20 Kodi n’ciyani cin’dzatithandiza kuleka kuluza cikhulupiro cathu? (Werengani Mateu 7:21-23.) Cinthu cakufunika kwene-kwene kuna ifepano ndico kucita basa lomwe Jezu adatiuza kuti ticite. (Mateu 28:19, 20) Tin’funika lini kutanganidwa na nkhani za ndale za m’dzikoli. Timbafuna wanthu ndipo timbafuna kuwathandiza akakhala akugumana na mabvuto. Tsono timbadziwa kuti njira yabwino yakuthandizira anzathu ndiyo kuwapfunzisa bza Umambo bwa Mulungu na kuwathandiza kuti akulise uxamwali bwawo na Yahova.
Cuma Cauzimu
Tumbizani Yahova na Mzimu Wanu Wakubzipereka!
3 Pomwe amuna atatu wale akhalewalewa na Djobi, Eliu akhatetekera, ndipo iye akhali mng’ono na atatuwo. Atamala kulewalewako, Eliu adabvunza Djobi bza Yahova kuti: ‘Kodi iwepo ucikhala wakulungama, un’dzamupasa ciyani [Mulunguyo]? N’ciyani comwe iye angatambire kwa iwepo?’ (Djobi 35:7) Kodi na mafalaya Eliu akhafunambo kulewa kuti nyongo yomwe timbacita kuti titumikire Yahova njakusaya phindu? Ne! Nfundo yomwe Eliu akhafuna kubvekesa ikhali yakusiyana na ya anzace wale. Iye akhafuna kulewa kuti Yahova ngwakukwana kale, ndipo napo timunamate ayai ne, ifepano tingamudaze lini ne kumuthumizira mphanvu. Ndipopa Yahova alibe kutsimula Eliuyo ninga momwe adacitira na amuna atatu wale. Tenepo, makhalidwe yabwino ayai luso liri-lense lomwe tingakhale nalo, timbapasidwa na Yahovayo, ndipo iye ambawona momwe timbaliphatisira basa.
15-21 JANEIRO
CUMA CA M’FALA LA MULUNGU | DJOBI 36-37
Mathangwe Yomwe Yangakucitiseni Kukhulupira Piciro la Mulungu la Moyo Wakusaya Kumala
w15 1/10 tsa. 13 ndi. 1-2
Kodi Tingakwanise Kumugumana Mulungu?
MULUNGU ALIBE CIYAMBI NE CIMALIZIRO: Bibliya limbalewa kuti Mulungu akhala alipo “kucokera kwa nthawe yakusaya kumala” ndipo an’dzakhala alipo “mpaka kwa nthawe yakusaya kumala.” (Salimo 90:2) Bzimwebzi bzin’funa kulewa kuti Mulungu alibe ciyambi ne cimaliziro. Wanthufe tingakwanise lini kubvesesa bzimwebzi thangwe “magole yace yambawerengeka lini.” — Djobi 36:26.
Thangwe ranyi kudziwa bzimwebzi n’kwakuthandiza? Mulungu adalewa kuti an’dzatipasa moyo wakusaya kumala tikamudziwa na kucita bzomwe iye ambafuna. (Juwau 17:3) Kodi bzingadakhala bzakubveka kuti Mulungu apicire moyo wakusaya kumala bzingadakhala kuti iye an’dzakhala lini mpaka kale-kale? Ni “Mambo wa nthawe zentse,” yekha omwe angapicire bzimwebzi. — 1 Timotio 1:17.
Kodi Imwepo Mumbatenda Mphaso Zomwe Yahova Ambatipasa?
6 Pa dziko la pantsi pana madzi thangwe rakuti dzuwa liri patali na madziyo. Bzingadakhala kuti dzuwalo liri pafupi na madzi, pa dzikoli pangadakhala palibe madzi ne camoyo ciri-centse. Ndipo bzingadakhala kuti dzikoli liri patali kwene-kwene na dzuwa, madzi yangadaphatana, ndipo lingadakhala cibola cikulu cakuuma (gelo). Tsono pakuti Yahova adaikha dziko la pantsi pa mbuto yakuthemera, madzi yambafamba ndipo yambathandiza camoyo ciri-centse. Kodi bzimbacitika tani? Kutentha kwa dzuwa kumbacitisa madzi ya m’nyanza, m’mikulo na m’mathawale kukwira m’mlenga-lenga yacikakonza mitambo. Masiyentista yambalewa kuti pa gole liri-lentse, madzi yomwe yambakwira m’mlenga-lenga thangwe ra kutentha kwa dzuwa, m’mazinji kwene-kwene kuposa madzi yomwe yambagumanika m’mathawale (lagos) yomwe yali pa dziko la pantsi. Ndipo madzi yomwe yambakwira m’mlenga-lengamo yambakakhala kumweko ntsiku khumi, pambuyo pace yambagwa mwa kucita kubvumba ayai mwakucita pfulere. Madziyo yakagwa yambabwerera pomwe m’nyanza, m’mikulo na m’mathawale ndipo yakamala yambakwira pomwe m’lenga-lenga. Yahova adakhazikisa njira imweyi ya kafambidwe ka madzi kuti dziko la pantsi likhale na madzi nthawe zentse, ndipo bzimwebzi bzikulatiza kuti Yahovayo ngwanzeru na wamphanvu kwene-kwene. — Djobi 36:27, 28; Mpalizi 1:7.
Pitirizani Kulimbisa Cidikhiro Canu
16 Cidikhiro cakudzakhala na moyo wakusaya kumala ni mphaso yakucokera kwa Mulungu. Ifepano tikudikhirira nthawe yomwe bzimwebzi bzin’dzacitika ndipo tikudziwa kuti bzin’dzacitikadi. Cidikhiro cimweci ciri ninga ndangula thangwe cimbatithandiza kupirira mabvuto, kukhala wakukhulupirika pomwe tikuzunzidwa na kulimbika napo wanthu acifuna kutipha. Ndipo cidikhiroci cirimbo ninga kapaseti thangwe cimbatithandiza kutcenkha nzeru zakuipa kuti ticite bzinthu bzabwino. Cidikhiro cathuci cimbatithandiza kumudziwa bwino Mulungu ndipo cimbatithandizambo kudziwa kuti iye ambatifuna kwene-kwene. Ndipopa tingalewe kuti timbagumana phindu tikalimbisa cidikhiro cathu.
Cuma Cauzimu
it-1 tsa. 492
Bzidziwiso
Kale-kale wanthu akhambauzidwa nkhani na bzidziwiso mu njira zakusiyana-siyana. Kawiri-kawiri, wanthuwo akhambauzidwa nkhanizo na pa mulomo. (2Sa 3:17, 19; Djb 37:20) Wanthu azinji omwe akhacita ulendo akhambafotokoza nkhani za m’madziko yanango pomwe akhaima kuti adye, amwe madzi na kucita bzinthu bzinango mu mzinda. Dziko la Palestina ndakubvekera kwene-kwene thangwe rakuti wanthu akhambapita na kumweko pakuyenda ku Ásia, África na Europa. Bzimwebzi bzikhacitisa kuti wanthu omwe akhakhala ku Palestinawo bzileke kuwanesa kubva nkhani za m’madziko manango. Wanthu angadakwanisa kubva nkhani zakusiyana-siyana ku bazali la mu mzindayo.
22-28 JANEIRO
CUMA CA M’FALA LA MULUNGU | DJOBI 38-39
Kodi Imwepo Mumbapambula Nthawe Kuti Muwone Cirengedwe?
Kodi Ndimwe Wakukonzeka Kudikhirira Yahova?
7 Bibliya likambafotokoza momwe Yahova adakonzera dzikoli, iro limbalewa bza ‘mphimo yace,’ kuzika kwa ‘tsinde lace’ na momwe adafuthulira ‘mwala wace wa pakhona.’ (Djobi 38:5, 6) Napo Yahovayo adapambula nthawe kuti adinge mabasa yace. (Genesesi 1:10, 12) Kumbukirani momwe anjo akhabvera pomwe akhawona Yahova akulenga cinthu cipsa. Iwo akhambakomedwa kwene-kwene! Thangwe ra bzimwebzi, iwo ‘adayamba kuwombera m’manja.’ (Djobi 38:7) Kodi tikupfunza ciyani? Padatenga magole mazinji kuti Yahova alenge dziko, nyenyezi na bza moyo bzentse. Tsono pomwe Yahova adanyang’anisa bzinthu bzentse bzomwe iye adalenga, adalewa kuti ‘bzikhali bwino kwene-kwene.’ — Genesesi 1:31.
Nkhani Yakulamusidwa Kwa Anyakufa Imbalatiza Lufoyi, Nzeru na Kupirira Kwa Mulungu
2 Pakuyamba, Yahova adalenga Mwana wace Jezu kuti ambaphate naye basa. Ndipo mwa Jezuyo ‘bzinthu bzinango bzentse bzidalengedwa’, kuphatanidzambo wanjo. (Akolose 1:16) Ndipo Jezu adakomedwa kwene-kwene na mwayi omwe adakhala nawo wakuphata basa pabodzi na Baba wace. (Mimwani 8:30) Ndipo wanjo akhanayombo mathangwe yakubveka yakukhalira wakukondwa. Iwo adakhala na mwayi wakuwona Yahova na Jezu pomwe akhalenga kudzulu na dziko la pantsi. Kodi wanjowo adatokonyedwa tani na bzimwebzo? Iwo ‘adayamba kuwombera m’manja’ pomwe dziko likhakonzedwa, ndipo iwo akhapitiriza kucita bzimwebzi Yahova akamaliza kulenga cinthu ciri-centse. Bzikuwoneka kuti wanjo adakomedwa kwene-kwene pomwe Yahova adadzamaliza na kulenga munthu pa dziko la pantsi. (Djobi 38:7; Mimwani 8:31) Cakulengedwa ciri-centse cidalatiza lufoyi na nzeru za Yahova. — Salimo 104:24; Aroma 1:20.
Pfunzani bza Yahova Kucokera m’Cirengedwe
8 Tin’funika kumbamukhulupira Yahova. Yahova adathandiza Djobi kuti apitirize kumbamukhulupira. (Djobi 32:2; 40:6-8) Pomwe Yahova akhaceza na Djobi, iye adaphatisa basa bzinthu bzizinji bza m’cirengedwe ninga nyenyezi, mitambo na bziphaliwali. Ndipo iye adalewambo bza bzirombo, ninga ng’ombe ya m’thengo na kavalo. (Djobi 38:32-35; 39:9, 19, 20) Bzentsenebzi bzimbalatiza kuti Yahova ngwanzeru, ana mphanvu ndipo ana lufoyi. Maceza yamweya yadacitisa kuti Djobi amukhulupire Yahova na mtima wentse. (Djobi 42:1-6) Ifepanombo tikambawona bzinthu bza m’cirengedwe, timbakwanisa kudziwa kuti Yahova ngwanzeru ndipo ana mphanvu kwene-kwene kuposa ifepano. Ndipo iye angamalisembo mabvuto yathu yentse. Bzimwebzi bzingatithandize kuti timukhulupire kwene-kwene Yahova.
Cuma Cauzimu
it-2 tsa. 222
Nyakupereka Malamulo
Yahova Ninga Nyakupereka Malamulo. Yahova ndiye yekha Nyakupereka Malamulo wacadidi pa dziko lentse la pantsi. Bzinthu bzentse bza moyo na bzakusaya moyo ndiye omwe adabzikonza kuti bzimbacite bzinthu mwakubverana na momwe iye adabzikonzera (Djb 38:4-38; Sl 104:5-19), (Djb 39:1-30). Munthu ninga cakulengedwa ca Mulungu iye adakonzedwambo kuti ambabvere malamulo yakusiyana-siyana yomwe Mulunguyo adaikha. Malamuloyo yambamucitisa kuti ambakumbuke bwino, akhale wakukhwima mwauzimu na kukhala wakubvera. (Aro 12:1; 1Ak 2:14-16) Mulungu adapasambo malamulo bzakulengedwa bzauzimu bzomwe ni anjo. — Sl 103:20; 2Pe 2:4, 11.
Malamulo ya Yahova yan’funika nthawe zentse kumbabveredwa. (Jer 33:20, 21) Pa dziko lentse la pantsi malamulo yace yakulewa bza bzinthu bzakusiyana-siyana bza m’cilengedwe njakulondoza ndipo napo masiyentista yambatawirizambo bzimwebzi. Munthu omwe ambabvera lini malamulo yaceyo bzinthu bzimbamufambira lini bwino. Ndipopa malamulo ya Mulungu yangacinjidwe lini ndipo munthu angasaye lini kubvera malamuloyo acileka kugumana na mabvuto. Napo kuti munthuyo angalangidwe liniletu pa nthawe imweyo, imbadzafika nthawe yomwe ambadzalangidwa basi. “Mulungu angapumpsidwe lini. Pakuti comwe munthu an’bzala, ndico comwe an’dzabvuna.” — Aga 6:7; 1Ti 5:24.
29 JANEIRO–4 FEVEREIRO
CUMA CA M’FALA LA MULUNGU | DJOBI 40-42
Kodi Tingapfunze Ciyani na Bzomwe Bzidacitikira Djobi?
w10 15/10 matsa. 3-4 ndi. 4-6
“Mbani Angafike Pakudziwa Makumbukidwe ya Yahova?”
4 Tikambakumbukira bzinthu bzizinji bzomwe Yahova ambacita tin’funika kumbatcenkha kukhala ticimbamulewa kuipa ninga momwe wanthu winango ambacitira. Bzimwebzi bzimbafotokozedwa m’fala la Yahova pa Salimo 50:21. Cinemboci cimbati: “Ukhakumbuka kuti inepano nin’khala ninga iwepo.” Bzimwebzi mpsakundendemerana na bzomwe mdziwi munango wa nkhani za m’Bibliya adalewa magole 175 m’mbuyomu. Iye adalewa kuti: “Wanthu ambafuna kumulewa kuipa Mulungu pa momwe iwo ambawonera bzinthu ndipo iwo ambakumbuka kuti Mulunguyo ngwakumangika pa malamulo yomwe wanthuwo ambayawona kuti njakuthemera kuyateweza.”
5 Tin’funika kutcenkha kwene-kwene kumbakumbuka kuti Yahova an’funika kumbacita bzinthu mwakubverana na bzomwe ifepano timbafuna. Thangwe ranyi bzimwebzi mpsakufunika? Tikambapfunza nkhani zinango za m’Bibliya tingakumbuke kuti Yahova alibe kutonga bwino nkhani zinango. Tingakhale na makumbukidwe yamweya thangwe tikudziwa lini bzinthu bzizinji bza nkhaniyo ndipo ndife wakuperewera. Ajirayeri akhanayombo makumbukidwe yamweya ndipo akhawona ninga kuti Yahova akhacita lini bwino bzinthu pakati pawo. Onani bzomwe Yahova adawauza. Iye adati: “Imwepo mun’dzalewa kuti: ‘Njira za Yahova n’zakusaya cirungamo.’ Tetekerani imwe wa m’nyumba ya Jirayeri. Kodi njira zangu ndizo zakusaya cirungamo? Kodi njira zanu ndizo lini zomwe n’zakusaya cirungamo?” — Ezekiyeli 18:25.
6 Cinthu cakufunika kwene-kwene kuti tileke kumbakhala na makumbukidwe ya kumbalewa kuipa Mulungu mwakubverana na momwe ifepano timbawonera bzinthu, ni kuzindikira kuti ifepano timbadziwa lini bzinthu bzizinji ndipo nthawe zinango timbakhala na makumbukidwe yakuphonyeka. Bzimwebzi ndibzo bzomwe Djobi akhafunika kudziwa. Pomwe Djobi akhabonera, nzeru zidamumalira ndipo adayamba kumbabzikumbukira yekha. Iye akhawona lini bzinthu bzikulu-bzikulu bzakufunika, koma Yahova adamuthandiza kuti awone bzinthu mwakuthemera. Yahova adamubvunza Djobi mibvunzo yakukwana 70 ndipo iye adatazira kutawira. Pakucita bzimwebzi, Yahova adathandiza Djobi kuti azindikire kuti iye akhadziwa lini bzinthu bzizinji. Na tenepo Djobi adabzicepesa acicinja momwe iye akhawonera bzinthu. — Werengani Djobi 42:1-6.
Pitirizani Kuikha Makumbukidwe Yanu pa Cinthu Cakufunika Kwene-Kwene
12 Kodi momwe Yahova adalewalewera na Djobi tingalewe kuti kukhali kumuumira mtima? Ne. Ndipo ne Djobiyo alibe kukumbuka tenepo. Iye adabvera malango yomwe Yahova adamupasa. Djobi adati: ‘Ndikubweza bzomwe ndidalewa bzire, ndipo ndinkukungula m’pfumbi na m’dotha.’ (Djobi 42:1-6) Eliu, omwe akhali tswaka, adathandizambo Djobi kucinja makumbukidwe yace yakuphonyekayo. (Djobi 32:5-10) Djobi adabvera malango ya Yahova acicinja makumbukidwe yace. Tenepo, Yahova adacitisa kuti wanthu awone kuti iye akhakomedwa na kukhulupirika kwa Djobi. — Djobi 42:7, 8.
“Dikhirira Yahova”
17 Djobi ni m’bodzi mwa atumiki wa Yahova omwe adapitiriza kukhala wakukhwimika na wakulimba pa nthawe yomwe akhagumana na mabvuto. Mu tsamba lomwe mpostolo Paulo adanembera Ahebereu, iye adalewa kuti atumiki azinji wa Mulunguwa ni ‘mtambo ukulu wa mboni.’ (Ahebereu 12:1) Iwo adagumana na mabvuto makulu kwene-kwene; koma adapitiriza kukhala wakukhulupirika kwa Yahova. (Ahebereu 11:36-40) Kodi kupirira na nyongo yawoyo bzidandoyenda papezi? Ne, n’tenepo lini! Napo kuti pomwe akhana moyo alibe kuwona bzinthu bzomwe Mulungu adawauza kuti an’dzacita, iwo adapitiriza kukhala na cidikhiro. Pakuti akhakhulupira kuti Yahova akhakomedwa nawo, iwo adakhulupira kuti bzomwe Mulungu adawauzabzo bzin’dzacitika ndipo iwo an’dzabziwona na maso yawo. (Ahebereu 11:4, 5) Bzomwe iwo adacitabzi bzikutilimbikisambo tentsenefe kuti tipitirize kudikhirira Yahova.
18 Ifepano tikukhala mu dziko lomwe bzinthu bzikuyenda bziciipiratu. (2 Timotio 3:13) Sathani akadapitiriza kuyeza wanthu wa Mulungu. Napo kuti tingadzagumane na mabvuto kutsogoloku, bwerani tipitirize kuphatira basa Yahova na nyongo ticimbakhulupira kuti “timbaikha cidikhiro cathu kwa Mulungu wamoyo.” (1 Timotio 4:10) Kumbukirani kuti mabaibai yomwe Mulungu adapasa Djobi yadalatiza kuti “Yahova ngwa lufoyi likulu na wantsisi.” (Tiyago 5:11) Tikatewezera Djobi mwakukhala wakukhulupirika kwa Yahova, tingakhale na citsimikizo centse cakuti iye ‘an’dzabaira wanthu omwe ambamulinga na mtima wentse.’ — Werengani Ahebereu 11:6.
Cuma Cauzimu
it-2 tsa. 808
Kunyoza
Djobi ni munthu omwe adapitiriza kukhala wakukhulupirika napo kuti akhanyozedwa kwene-kwene. Tsono iye adawona bzinthu mwakuphonyeka ndipo adaphonya mwakuti adatsimulidwa. Pakulewa bza Djobiyo, Eliu adati: “Kodi ni mwamuna uponi omwe ali ninga Djobi, omwe ambamwa kunyozedwa ninga madzi?” (Djb 34:7) Djobi adacita thupo kwene-kwene na kulungama kwace m’mbuto mwa Mulungu, ndipo iye akhabziwona kuti akhali wakulungama kwene-kwene kuposa Mulungu. (Djb 35:2; 36:24) Pomwe akhanyozedwa kwene-kwene na “axamwali wace” atatu wale, Djobi akhawona kuti omwe akhanyozedwayo ndiye sikuti Mulungu. Mwakucita tenepoyo bzikhali ninga kuti iye akhakomedwa na bzinthu bzakusaya cirungamo ndipo bzimwebzi bzikhali ninga kuti iye akumwa madzi yakunyozedwa. Pakumalizira Mulungu adauza Djobi kuti bzomwe anyakunyozawo akhalewa pakulewa bza iye bzikhali bzakunama. (Djb 42:7) Yahova adauza mpolofeta Samuyeli bzibodzi-bodzibzi pomwe Ajirayeri adamuuza kuti akhafuna mambo. Iye adati: “Iwo alibe kulamba iwepo, koma alamba ine kuti ndikhale mambo wawo.” (1Sa 8:7) Ndipo Jezu adauza ateweri wace kuti: “Wanthu an’dzakuzunzani na kukuphani, ndipo mun’dzawengedwa na mitundu yentse ya wanthu [sikuti thangwe ra dzina lanu, koma] thangwe ra dzina langu.” (Mat 24:9) Kukumbukira bzimwebzi kungathandize Mkristau kuti apirire pomwe akunyozedwa, kubziwona mwakuthemera ndipo bzimwebzi bzin’dzacitisa kuti iye asimbidwe thangwe ra kukhulupirika kwaceko. — Lu 6:22, 23.
5-11 FEVEREIRO
CUMA CA M’FALA LA MULUNGU | MASALIMO 1-4
Khalani ku Mbali ya Umambo bwa Mulungu
‘Nin’dzatekenyesa Mitundu Yentse’
8 Kodi wanthu ambacita ciyani akabva mafala yamweya? Azinji ambakomedwa lini nayo. (Werengani Salimo 2:1-3.) Mitundu ya wanthu ikucita phiringu. Iwo akulamba kubvuma Mtongi omwe Yahova adamusankhula. Iwo ambawona lini kuti mafala ya Umambo yomwe ifepano timbapalizira ni ‘mafala yabwino.’ Ndipopa maboma manango yakuletsa basa lakupalizira! Napo kuti atongi azinji ambalewa kuti ambatumikira Mulungu, iwo akufuna lini kusiya utongi bwawobo. Tenepo ninga momwe adacitira atongi wa mu nthawe ya Jezu, atongi wa ntsiku zinombo ambanyoza Anyakudzozedwa wa Yahova mwa kuboneresa atumiki wace wakukhulupirika. — Mabasa 4:25-28.
Pitirizani Kukhala Wakusaya Kupitira m’bza Ndale m’Dziko Lakugawanikali
11 Kufunisisa bzinthu bza kuthupi. Tikambafunisisa bzinthu bzakuthupi, timbakhala pa ngozi ya kupswa mpangano wathu wa kusaya kupitira mu ndale tikakhala pa mayezo. Ruth, wa ku Malawi, adawona kazinji kense Mboni zinkucita bzimwebzi pomwe zikhazunzidwa m’magole ya 1970. Iye adalewa kuti: ‘Iwo angasiye lini moyo wawo wabwino. Winango adayenda nafe pabodzi ku ukapolo, koma patsogolo pace adadzaphatana na cipani ca ndale ndipo adadzabwerera kumui thangwe akhafuna lini kukhala na moyo wakusauka ku mbuto ya anyakuthawa nkhondo.’ Mwa kusiyana na bzimwebzi, atumiki azinji wa Mulungu ambapitiriza kuleka kupitira mu ndale napo kuti ambagumana na mabvuto yakusaya cuma ayai kuluza bzense bzomwe ambakhala nabzo. — Ahebereu 10:34.
Cuma Cauzimu
it-2 tsa. 425
Mungu
Ni mabade yomwe mkati mwace mumbakhala mpunga ayai mapira. Napo kuti Bibliya likambalewa bza mungu limbalewa mwakuyezezera, koma bzomwe limbalewabzo ndibzo bzomwe bzikhacitika mu nthawe za m’Bibliya wanthu akambapula phoso la m’munda. Wanthu akamala kubvuna, iwo akhambapula kuti acose mabade yamweya yomwe yakhalibe basa. Ndipopa Bibliya limbaphatisa basa mungu umweyu pakufotokoza bzinthu bzakusaya basa bzomwe bzikhafunika kupfudzidwa.
Cakuyamba, kupulako kukhacitisa kuti bzomwe bzikhali mkati mwa mungu bzicoke. Ndipo akayenda kukapepeta, munguyo ukhacoka ucimbuluka na mphepo. Bzimwebzi bzikulatiza momwe Yahova ambacosera apanduki pakati pa wanthu wace na kucosa wanthu wakuipa na omwe ambamuphindukira. (Djb 21:18; Sl 1:4; 35:5; Zai 17:13; 29:5; 41:15; Oze 13:3) Umambo bwa Mulungu bun’dzapeya anyamadulanthaka wace acikhala tubzinthu tung’ono-tung’ono kuti adzamwazike mwakusaya kunesa ninga momwe bzimbacitikira na mungu. — Dan 2:35.
Pakuti munguyo ukhalibe basa, iwo ukhagwezekedwa mbuto ibodzi ucitenthedwa, kuti uleke kumbuluka na conzi ucidzasanganikana pomwe na mpungayo ayai mapirayo. Mwakundendemerana na bzimwebzi, Juwau Batista adalewa kuti magereja yakunama yangadadzapfudzidwa na Jezu Kristu omwe an’dzakonkhobza tirigu, “ndipo mungu an’dzamutentha pa moto omwe palibe angauthimise”. — Mat 3:7-12; Lu 3:17.
12-18 FEVEREIRO
CUMA CA M’FALA LA MULUNGU | MASALIMO 5-7
Khalani Wakukhulupirika Napo Kuti Winango Akucita Lini Bzinthu Bzabwino
Kodi Kuwerenga Bibliya Kungakuthandizeni Tani Kupirira Mabvuto?
7 Kodi xamwali ayai munthu wa m’banja mwanu adakucitirani bzinthu bzomwe bzidakuwawani? Penu mukuti inde, cinthu comwe cingakuthandizeni, ndico kupfunza bzomwe bzidacitika na Mambo Davide pomwe mwana wace Abisalomu adacita bzinthu bzomwe Davideyo adawawidwa nabzo, aciyezera kumutengera umambo. — 2 Samuyeli 15:5-14, 31; 18:6-14.
8 (1) Kupemba. Pomwe mukukumbukira nkhaniyo, pembani kwa Yahova ndipo mufotokozereni momwe mukubvera na bzinthu bzakuipa bzomwe munthu adakucitirani. (Salimo 6:6-9) Muzimbulireni bzinthubzo, ndipo mukamala mukumbireni Yahovayo kuti akuthandizeni kugumana nfundo zomwe zingakuthandizeni kuwona bzomwe mungacite pa bvutolo.
Tsimikizirani Kuti Bzomwe Mumbakhulupira Mpsacadidi
3 Cikhulupiro cathu cin’funika lini kundocokera pa lufoyi lacikristau lomwe liripo pakati pa wanthu wa Mulungu. Thangwe ranyi? Tiyezezere kuti m’bale, mpainiya ayai mkulu wa gwere wacita pikado ikulu. Ayai n’ciyani comwe mungadacita bzingadakhala kuti m’bale ayai mpfumakazi acita bzinthu bzomwe mulibe kukomedwa nabzo? Ayai mungadabzibva tani bzingadakhala kuti mukubva nyakupanduka akulewa kuti mukupfunza lini cadidi imwe. Kodi mungadacita ciyani? Kodi mungadakhukhumudwa mucisiya kutumikira Yahova? Mpsakufunika kukumbukira ibzi: kumangira cikhulupiro canu pa cikhulupiro ca winango m’mbuto mwa kucimangira pa uxamwali bomwe munabo kuna Yahova, kun’dzacitisa kuti cikhulupiro canu cikhale cakusaya kulimba. Cikhulupiro canu cin’funika lini kumangidwa kokha na bzinthu bzakusaya kulimba ninga, makumbukidwe yanu na momwe mumbabvera. Koma mun’funika kucimanga na bzinthu bzakulimba, ninga kukhala na umboni bwakukwanira pabodzi na kufufudza kuti mutsimikizire kuti bzomwe mukupfunzabzo mpsacadidi. Imwepo mun’funikambo kukhala na umboni bwakuti Bibliya lina cadidi cakulewa bza Yahova. — Aroma 12:2.
4 Jezu adalewa bza wanthu omwe angadadzabvuma cadidi ‘mwakukomedwa,’ koma na kupita kwa nthawe angadadzaluza cikhulupiro pa nthawe ya mayezo. (Werengani Mateu 13:3-6, 20, 21.) Pinango bzimwebzi bzimbacitika thangwe ra kusaya kubvesesa kwawo kuti kutewera Jezu kumbaphatanidza kulimbana na mayezo pabodzi na mabvuto. (Mateu 16:24) Pinango iwo akhakumbuka kuti Mkristau ambabonera lini, koma ambakhala na moyo wakudzala na bzisimbo. Tsono mu dziko lakuipali tentse timbagumana na mabvuto. Ndipo bzinthu bzinango bzikacinja pa moyo wathu, tingaluze cikondweso. — Salimo 6:6; Mpalizi 9:11.
Cuma Cauzimu
it-1 tsa. 995
Thenje
Pa Aroma 3:13, mpostolo Paulo adafotokoza mafala ya pa Salimo 5:9, adandendemezera ngololo za wanthu wakuipa na wakunama na “thenje lakufunguka”. Ninga momwe thenje lakufunguka limbadzazidwira na wanthu wakufa, ngololo zawo zimbafunguka na maceza yakupha. — Onani Mat 15:18-20.
19-25 FEVEREIRO
CUMA CA M’FALA LA MULUNGU | MASALIMO 8-10
“Nin’dzakutumbizani na Mtima Wangu Wentse, Imwe Yahova”!
Mbalemekezani Mbuto Yomwe Munayo m’Banja la Yahova
6 Yahova adatikonzera mui wabwino kuti tikhale. Kale-kale pomwe Yahova akhanati kulenga munthu wakuyamba, iye adakonza dziko la pantsi kuti wanthu adzakhale m’mwemo. (Djobi 38:4-6; Jeremiya 10:12) Pakuti Yahova ngwakudeka mtima na wakupasa, iye adalenga bzinthu bzizinji bzabwino kuti timbakomedwe nabzo. (Salimo 104:14, 15, 24) Nthawe zinango, iye akhakumbukira bzinthu bzomwe adalenga ndipo ‘adawona kuti bzikhali bwino.’ (Genesesi 1:10, 12, 31) Iye adalemekeza wanthu mwakuwapasa mphanvu kuti ambatonge bzinthu bzakudeka bzomwe adalenga pa dziko la pantsi. (Salimo 8:6) Bzomwe Mulungu akufuna mpsakuti wanthu wakulungamiratu apfantse pomwe akuwonerera bzinthu bzabwino bzomwe iye adalenga mpakana kale-kale. Kodi imwepo mumbatenda Yahova kawiri-kawiri thangwe ra bzinthu bzabwino bzomwe iye akufuna kuti mudzacite kutsogolo?
Kodi Imwepo Mumbatenda Mphaso Zomwe Yahova Ambatipasa?
10 Pana njira zakusiyana-siyana za momwe tingalatizire kutenda mphaso ya kulewalewa yomwe Mulungu adatipasa. Njira ibodzi ni kufotokozera wale omwe ambakhulupira kuti bzinthu bzidacita kusandulika, mwa kuwauza thangwe race ifepano timbakhulupira kuti Mulungu ndiye omwe adalenga bzinthu bzentse. (Salimo 9:1; 1 Pedru 3:15) Wale omwe ambalimbikisa kuti bzinthu bzidacita kusandulika, ambafuna kuti ifepano timbakhulupire kuti dziko pabodzi na cinthu ciri-centse ca moyo comwe ciri m’dzikoli, bziribe kucita kulengedwa. Tsono mwakuphatisa basa Bibliya na nfundo zinango zomwe ziri mu nkhani ino, tingakwanise kukhotcerera Baba wathu wakudzulu na kufotokozera wale omwe akufunisisa kutetekera thangwe lomwe limbaticitisa kukhulupira kuti Yahova ni Mulengi wa kudzulu na dziko la pantsi. — Salimo 102:25; Zaiya 40:25, 26.
Kodi Ndimwe “Ciratizo Cabwino . . . Pakulewalewa”?
13 Imbani na mtima wentse. Tikambaimba nyimbo za Umambo, cinthu cikulu ni kutumbiza Yahova. Mpfumakazi yakucemeredwa Sara imbawona kuti iribe madu ya kuimba. Napo bziri tenepo, iyo imbafuna kutumbiza Yahova mwa kuimba. Kuti ikwanise kucita bzimwebzi, iyo imbakonzekera nyimbozo kumui, ninga momwe imbacitira na kukonzekera mbali zinango za mitsonkhano. Mpfumakaziyo imbapfunza kuimba nyimbo zomwe zin’kaimbidwa pa mitsonkhano ndipo imbawona kubverana komwe kulipo pakati pa bzomwe nyimboyo ikulewa na bzomwe tin’kapfunza pa mitsonkhano. Iyo idati: “Bzimwebzi bzimbandithandiza kukumbukira kwene-kwene bzomwe nyimboyo ikulewa sikuti kukhala na madu ya kuimba.”
Cuma Cauzimu
it-1 tsa. 832
Cala
Mwakuyezezera, Mulungu akulewedwa kuti akucita mabasa yace na “cala” ninga kunemba Malamulo Khumi pa tumatabwa twa minyala (Eki 31:18; Deu 9:10), kucita bzakudabwisa (Eki 8:18, 19) na kulenga kudzulu (Sl 8:3). “Cala” ca Mulungu comwe cikulewedwa pa nkhani ya kulenga, cimbathandauza mzimu wakucena ayai mphanvu ya Mulungu yomwe imbafotokozedwa pa Genesesi pakulewa bza cirengedwe, pomwe pambalewa kuti mphanvu ya Mulungu (“mzimu”) ikhafamba-famba padzulu pa madzi. (Gen 1:2) Bzinembo bza Cigerego bza Cikristau bzimbafotokoza mwakubveka bwino thandauzo la fala lakuyezezerali. Bukhu la Mateu limbafotokoza kuti Jezu akhacosa bziwanda mwakuphatisa basa ‘mzimu wakucena wa Mulungu’ ndipo Luka akutiuza kuti Jezu akhacosa bziwanda na “cala ca Mulungu.” — Mat 12:28; Lu 11:20.
26 FEVEREIRO–3 MARÇO
CUMA CA M’FALA LA MULUNGU | MASALIMO 11-15
Bziyezezereni Kuti Muli mu Dziko Lipsa la Mtendere
w06 15/5 tsa. 18 ndi. 3
Mafala ya Yahova Njamoyo. Nfundo Zikulu-zikulu za Cigawo Cakuyamba ca Bukhu la Masalimo
11:3 — Kodi ni aliserse ziponi zomwe zikupfudzidwa? Ni bzinthu bzomwe bzimbacitisa kuti wanthu akhale wakubverana, bzomwe ni malamulo, kukhazikisa mkhomeko na cirungamo. Bzinthu bzimwebzi bzikakhala kuti palibe, pambakhala kusaya kubverana pakati pa wanthu ndipo pambakhala palibe cirungamo. Bzimwebzi bzikacitika, ‘munthu ali-wentse wakulungama’ an’funika kuthemba Mulungu na mtima wace wentse. — Salimo 11:4-7.
wp16.4 tsa. 11
Kodi Ciwembo Cin’dzamala pa Dziko la Pantsi?
Bibliya limbalewa kuti tsapanopapa Mulungu animalisa ciwembo centse pa dziko la pantsi. Ndipo limbatsimikizira kuti wanthu wentse omwe ambafuna ciwembo an’dzaphedwa pa “ntsiku yakutongedwa na kupfudzidwa kwa wanthu wakuipa.” (2 Pedru 3:5-7) Pa nthawe imweyo pan’dzakhala palibe wanthu omwe ambaboneresa anzawo. Tsono tingatsimikizire tani kuti Mulungu akufunisisa kudzamalisa ciwembo?
Bibliya limbalewa kuti Mulungu “ambawenga kwene-kwene ali-wentse omwe ambafuna ciwembo.” (Salimo 11:5) Mulengi wathu ambafuna mtendere na cirungamo. (Salimo 33:5; 37:28) Ndipopa an’dzalekerera lini kuti wanthu omwe ambacita ciwembo akhale mpaka kale-kale.
Kodi Muna Mtima Wakupirira?
15 N’thangwe ranyi Davide akhali wakukonzeka kudikhira mwakupirira? Iye ambapereka mtawiro m’bukhu la Salimo mu kapitulo 13 yomwe timbagumanambo mbvunzo omwe iye adaucita kanai kense wakuti: ‘Mpaka lini?’ Iye adalewa kuti: ‘Koma ine, ndimbakhulupira lufoyi lanu lakukhulupirika; mtima wangu un’dzakondwa thangwe ra mabasa yanu ya cipulumuso. Ndin’dzaimbira Yahova, pakuti iye wandipasa mabaibai mazinjisa.’ (Salimo 13:5, 6) Davide akhadziwa kuti Yahova akhamufuna nakuti iye angadamuthandiza nthawe zense. Iye akhakumbukira bza momwe Yahova akhadamuthandizira mu nthawe za m’mbuyo na kumbakumbukira mabaibai yomwe angadadzatambira pambuyo pa Yahova kumalisa mabvuto yomwe akhagumana nayo. Davide akhadziwa kuti bzikhali bwino kudikhira bzisimbo bza Yahova.
kr tsa. 236 ndi. 16
Umambo bwa Mulungu Bun’dzakwanirisa Bzomwe iye Akufuna pa Dziko la Pantsi
16 Mkhomeko. Pakumalizira pace, mafala yakulimbikisa yomwe yali pa Zaiya 11:6-9 yan’dzakwanisika. Amuna, akazi na wana an’dzakhala wakukhotcerereka kuli-kwentse komwe an’dzayendako pa dziko la pantsi. Kun’dzakhala kulibe cinthu ciri-centse cakugopswa, ne munthu ayai cirombo. Kumbukirani momwe mun’dzakhalira wakukondwa pa nthawe imweyo pomwe dziko lentse la pantsi lin’dzakhala ninga mui wanu. Bzin’dzakhala bzakudekeza kutcula m’mikulo, m’nyanza, kuyenda m’mapiri na m’thengo mwakusaya kugopa cinthu ciri-centse napo bucikhala usiku. Pa nthawe imweyo mafala ya pa Ezekiyeli 34:25 yan’dzakhala yakwanisika ndipo bzin’dzakhala bzakwanisika kwa wanthu wa Mulungu ‘kukhala m’dambo mwakusaya cinthu ciri-centse ca kuwagopswa na kugona m’thengo.’
Cuma Cauzimu
w13 15/9 tsa. 19 ndi. 12
Kodi Mwacinja Makhalidwe Yanu?
12 Wanthu azinji m’dzikoli ana ‘makumbukidwe yakuipa.’ Pinango iwo ambakumbuka kuti mpsacikale-kale munthu kuuzidwa bzakucita. Apfunzisi na abereki ambakumbuka kuti wana ana ufulu bwakucita bzomwe akufuna. Iwo ambawona kuti palibe nfundo zomwe munthu ali-wentse an’funika kuziteweza. Napo wanthu azinji omwe ambayenda ku gereja ambawona kuti ana ufulu bwakucita ciri-centse comwe akuwona kuti n’cabwino mwakusaya kukumbukira bzomwe Mulungu akufuna. (Salimo 14:1) Nzeru ninga zimwezi zingadzonge momwe Akristau ambawonera bzinthu m’gulu la Yahova. Mwa ciratizo angafune lini kuteweza malango ya gwere ndipo angayambe kudandaula na ciri-centse comwe akukomedwa lini naco. Pinango angafune lini kuteweza malango yakucokera m’Bibliya yakulewa bza masenzeka, kuphatisa basa interneti na mapfunziro ya ku universidade.