Mareferentsiya ya Kabukhu ka Mitsonkhano ka Moyo Wathu na Utumiki
© 2024 Watch Tower Bible and Tract Society of Pennsylvania
6-12 MAIO
CUMA CA M’FALA LA MULUNGU MASALIMO 36-37
“Leka Kukalipa Thangwe ra Wanthu Omwe Ambacita Bzakuipa”
N’ciyani Cin’dzacitika Umambo bwa Mulungu Bukadzafika?
4 Kodi timbatokonyedwa tani na wanthu wakuipa? Mpostolo Paulo adalewa kuti nsiku zakumalizira zin’dzakhala ‘nthawe zakupambulika na zakunesa.’ Iye adathumizira pomwe kuti: “Wanthu wakuipa na wacinyengo an’dzayenda aciipiratu.” (2 Timotio 3:1-5, 13) Kodi ndibzo lini bzomwe bzinkucitika nsiku zino? Azinji wa ife timbacitiridwa bzinthu bzakuipa ninga ciwembo, kuwengedwa thangwe ra mtundu na ukambowa. Ndipo wanthu winango ambacita bzinthu bzakuipabzi padeca. Winango ambabziwonesa ninga wanthu wabwino pomwe mbakuipa. Tsono napo penu ifepano tinati kucitiridwa bzakuipa ninga bzimwebzi, bzomwe wanthu wakuipawo ambacita bzimbatitokonyambo. Mwa ciratizo, tikambabva kuti wanthu acitira bzinthu bzakuipa wana, nkhalamba na winango omwe alibe mphanvu za kubzikhotcerera, timbawawidwa kwene-kwene. Wanthu wakuipawa ambacita bzinthu ninga bzirombo bza m’thengo ayai madimonyo. (Tiyago 3:15) Mpsakukondwesa kuti Fala la Yahova limbatipasa cidikhiro.
Yahova Ambabaira Wanthu Omwe Ambalekerera
10 Tikambakoya cakumtima, timbabzipweteka tekha. Ukali buli ninga cimtolo cakulemera. Ndipo Yahova akudziwa kuti tikatula cimtolo cimweci, tin’pepukidwa. (Werengani Aefezo 4:31, 32.) Ndipopa, iye ambatiuza kuti ‘tileke kukhala na ciya.’ (Salimo 37:8) Mpsabwino kwene-kwene kuteweza malango yamweya. Tikambakoya cakumtima, ifepano tingakhale lini na manungo yabwino. (Mimwani 14:30) Ndipo tikapitiriza kukhala na ciya na mwanzathu, timbakhala ninga kuti tamwa veneno. Venenoyo ingapweteke lini mwanzathuyo, koma in’pweteka ifepano. Ndipopa tikalekerera anzathu, ifepano timbakhala na phindu. (Mimwani 11:17) Ifepano timbakhala na mtendere mu mtima mwathu ndipo timbapitiriza kutumikira Yahova mwakukondwa.
w03 1/12 tsa. 13 ndi. 20
“Kondwa Kwene-kwene mwa Yahova”
20 Patsogolo pace, “anyakulungama an’dzatambira dziko la pantsi.” (Salimo 37:11a) Tsono, kodi “anyakulungama” mbani? Fala lomwe lidasanduliziridwa kuti “anyakulungama” limbacokera ku fala lomwe limbathandauza “kuzunza, kucepesa, kunyoza.” Inde, “anyakulungama” ni wanthu omwe ambadikhirira Yahova mwakubzicepesa kuti amalise bzinthu bzentse bzakuipa. Iwo ‘an’dzapfatsa na mtendere uzinjisa.’ (Salimo 37:11b) Napo ntsiku zino, timbagumana mtendere uzinji m’Paraizo wauzimu omwe ali mu gwere lacikristau.
Cuma Cauzimu
it-2 tsa. 445
Phiri
Kusaya kutekenyeka, kusaya kucinja ayai kutalimpha. Phiri limbalewedwa kuti ndakusaya kutekenyeka na lakusaya kucinja. (Zai 54:10; Hab 3:6; ndendemezerani na Sl 46:2.) Na tenepo, pomwe nyakunemba salimo adalewa kuti cirungamo ca Yahova ciri ninga “phiri la Mulungu” (Sl 36:6) iye pinango akhalewa kuti cirungamo ca Yahova cimbacinja lini. Ayai, pakuti Phiri nditali, pinango iye akhafuna kulewa kuti cirungamo ca Mulungu cimbaposa ca wanthu. (Ndendemezerani na Zai 55:8, 9.) Pakulewa bza kuthululidwa kwa tijela yaci 7 ya ukali bwa Mulungu, Apokalipse 16:20 ambalewa kuti: “Ntsuwa zentse zidathawa ndipo mapiri yadanyembereka.” Pinango bzimwebzi bzikulatiza kuti napo mapiri yacikhala matali, yangapulumuke lini pa ukali bwa Mulungu. — Ndendemezerani na Jer 4:23-26.
13-19 MAIO
CUMA CA M’FALA LA MULUNGU MASALIMO 38-39
Lekani Kupitiriza Kumbabzipasa Mulandu
Nyang’anisani Kutsogolo
12 Werengani 1 Juwau 3:19, 20. Nthawe zinango tentsenefe timbabzipasa mulandu. Winango ambabzipasa mulandu thangwe ra bzinthu bzomwe adacita pomwe akhanati kupfunza cadidi. Ndipo winango ambabzipasa mulandu thangwe ra bzinthu bzomwe adacita pambuyo pakubatizidwa. (Aroma 3:23) Mpsakubveka kuti tentsenefe timbafuna kucita bzinthu bzabwino. Tsono ‘tentsenefe timbaphonya kazinji kentse.’ (Tiyago 3:2; Aroma 7:21-23) Napo kuti timbakomedwa lini tikambabzipasa mulandu, koma bzimwebzi nthawe zinango mpsabwino. Thangwe ranyi tikulewa tenepo? Thangwe makumbukidwe yakumbabzipasa mulandu yangatithandize kucinja moyo wathu ticileka kudzabwerezera kucita bzinthu bzakuphonyeka. — Ahebereu 12:12, 13.
13 Nthawe zinango ifepano tingabzipase mulandu mwakupitirira malire pa bzinthu bzomwe tidakungula Yahova acitilekerera. Kubzipasa mulandu kumweku kungakhale kulibe na basalo. (Salimo 31:10; 38:3, 4) Thangwe ranyi? Onani ciratizo ca mpfumakazi yomwe ikhambabzipasa mulandu thangwe ra pikado zomwe idacita kale-kale. Mpfumakaziyo idalewa kuti: “Ndikhabva utofu kupitiriza kutumikira Yahova na nyongo thangwe ra kukumbukira kuti pinango-pentse nin’dzapulumusidwa lini.” Azinji wa ifepano pinango angakumbukembo tenepo. Tsono tin’funika kucita mphole kuti tireke kumbabzipasa mulandu mwakupitirira malire. Thangwe ranyi? Thangwe ndakuti tikacita bzimwebzi, tingafike pakusiya kutumikira Yahova, ndipo Sathani angakomedwe kwene-kwene bzimwebzi bzikacitika. Yahova ambatifuna kwene-kwene ndipo iye ambatilekerera tikakhala tamuphonyera. — Ndendemezerani na 2 Aroma 2:5-7, 11.
w02 15/11 tsa. 20 ndi. 1-2
Kodi Tingacite Tani Kuti Ntsiku za Moyo Wathu Zikondwese Yahova?
Ntsiku za moyo wathu zimbawoneka kuti n’zakucepa ndipo zimbamala mwakamfulumize. Nyakunemba salimo Davide adawona kuti moyo wa munthu ngufupi ndipo adanemba kuti: “Imwe Yahova, ndithandizeni kuzindikira kuti moyo wangu ngufupi; na kudziwambo ntsiku za moyo wangu. Kulewa cadidi, mwacepesa ntsiku za moyo wangu ndipo ntsikuzo ni cinthu lini pamaso panu.” Davide akhacita thupo kwene-kwene thangwe akhafuna kukondwesa Mulungu m’mafala na m’bzicito. Pakulewa bza kuthemba Mulungu, iye adati: “Cidikhiro cangu ciri pa imwepo.” (Salimo 39:4, 5, 7) Yahova adamubvera. Adawona bzomwe Davide akhacita ndipo adamusimba mwakubverana na bzomwe iye akhacitabzo.
Mpsakupusa kwene-kwene nthawe zentse kukhala wakutanganidwa na bzinthu bzakusiyana-siyana bza pa moyo wathu. Bzimwebzi bzingaticitise kuti tikhale na thupo, maka-maka tikakhala na bzakucita bzizinji ndipo nthawe yakuti ticite bzinthubzo njakucepa. Kodi thupo lathu ndakukondwesa Mulungu ninga lomwe Davide akhanalo? Kulewa cadidi, Yahova ambatiwona tentsenefe ndipo ambadziwa bzomwe bziri mu mtima mwathu. Djobi, mwamuna omwe akhagopa Mulungu, adazindikira bzimwebzi magole 3600 m’mbuyomu kuti Yahova akhawona bzentse bzomwe iye akhacita. Djobi adabvunza kuti: “Kodi ningamutawire tani akandibvunza?” (Djobi 31:4-6, 14) Tingakondwese Mulungu mu ntsiku zentse za moyo wathu tikambaikha bzinthu bzauzimu pa mbuto yakuyamba, kubvera malamulo yace na kuphatisa bwino basa nthawe yathu. Bwerani ticezerane bwino-bwino mbali zimwezi.
Khalani Pomwe pa Uxamwali na Yahova
Mbacezani na Yahova nthawe zentse. Timbabvesesa kuti kundokhalira kubzipasa mulandu nthawe zentse kungakutaziseni kumbapemba kwa iye. (Aroma 8:26) Napo bziri tenepo, “pitirizani kumbapemba” kwa Yahova na kumufotokozera kuti mukufuna kwene-kwene kukhala xamwali wace. (Aroma 12:12) Andrej adalewa kuti: “Ndikhabzipasa mulandu ndipo ndikhabva manyazi. Tsono ndikambapemba ndikhambabzibva bwino. Ndikhabzibva kuti ndina mtendere mu mtima mwangu.” Penu imwepo mukudziwa lini bzomwe mungalewe mu mpembo, kumbukirani mipembo ya Mambo Davide, yomwe adaicita pambuyo pa kukungula, yomwe imbagumanika pa Masalimo 51 na 65.
Cuma Cauzimu
Latizani Kuti Ndimwe Munthu Wakukhulupirika
16 Kubziphata n’kwakufunika kwene-kwene penu tikufuna kuti anzathu ambatikhulupire. Thangwe khalidwe limweri limbatithandiza kuphata mulomo wathu kakakhala kabwera kamtima kakufuna kuzimbula nkhani ya cintsintsi. (Werengani Mimwani 10:19.) Nthawe zinango bzinganese kukhala wakubziphata tikakhala tikuceza pa interneti. Ndipo tikasaya kuwona bwino tingazimbule nkhani za cintsintsi kwa wanthu azinji mwakusaya kudziwa. Tin’funikambo kukumbukira kuti tikambalewa nkhani za cintsintsi pa interneti timbadziwa lini kuti n’ciyani comwe wanthu an’cita na nkhanizo na mabvuto yomwe yangabwere. Kukhala wanthu wakubziphata kumbatithandizambo kunyamala pomwe anyamadulanthaka wanthu akutingingimiza kuti tizimbule bzinthu bzomwe bzingaikhe pa ngozi moyo wa abale na mpfumakazi zathu. Bzimwebzi bzingacitike tikakhala tikubvunzidwa na mapolisiya m’madziko yomwe basa lathu ndakuletsedwa ayai tiribe ufulu bwa kunamata. Pa nthawe ninga zimwezi, tingaphatise basa nfundo ya m’Bibliya yakuti ‘tiphate mulomo wathu.’ (Salimo 39:1) Bwerani tilatize kuti ndife wanthu wakukhulupirika kwa wanthu wa pa mui pathu, axamwali wathu, abale na mpfumakazi zathu ayai wanthu winango. Ndipo kuti bzimwebzi bzikwanise tin’funika kukhala wanthu wakubziphata.
20-26 MAIO
CUMA CA M’FALA LA MULUNGU MASALIMO 40-41
Thangwe Ranyi Tin’funika Kuthandiza Anzathu?
Munthu Wakupasa Ambakhala Wakukondwa
16 Munthu omwe ana mtima wakupasa, ambadikhira lini kubwezeredwa cinthu. Ndipo Jezu adati: ‘Ukacita madyo, cemera anyakusauka, anyakulemala, anyakugwinthoma na azimola ndipo un’dzakondwa, pakuti iwo alibe cinthu comwe angakubwezere.’ (Luka 14:13, 14) Bibliya limbalewambo kuti: ‘Mpasi an’dzasimbidwa,’ ndipo ‘An’kondwa ni ule omwe ambacita bzinthu acikumbukira munthu wakunyozeka.’ (Mimwani 22:9; Salimo 41:1) Ifepano timbakhala wakupasa thangwe ra kufunisisa kuthandiza winango.
17 Pomwe Paulo adalewa mafala ya Jezu yakuti ‘kupasa kumbabweresa cikondweso cikulu kuposa kutambira,’ iye akhandolewa lini bza kupasa munthu bzinthu bzakuthupi. Mwa ciratizo, tingalatize kuti ndife wakupasa mwa kulimbisa winango, kuwapasa malango kucokera m’Bibliya na kuwathandiza akafunikira thandizo. (Mabasa 20:31-35) Ndipo mwa mafala na bzicito, Paulo adalatiza kufunika kwa kumbapasa wanthu nthawe, mphanvu pabodzi na lufoyi lathu.
18 Adziwi omwe ambapfunza bza makhalidwe ya wanthu, adawona kuti kupasa kumbacitisa munthu kukhala wakukondwa. Ndipo mwakubverana na kafukufuku munango, wanthu adalewa kuti ambakhala wakukondwa kwene-kwene akacitira anzawo bzinthu bzabwino. Ndipo adziwiwo ambalewa kuti tikambathandiza winango, ifepano timbawona kuti moyo wathu una cakulinga na thandauzo. Tenepo, adziwi winango ambauza wanthu kuti ambacite mabasa manango yakubzipereka kuti akhale na thanzi labwino na wakukondwa. Tsono bzomwe adziwiwa ambalewa bzimbatidabwisa lini, thangwe Mulengi wathu Yahova ambatiuza kale m’Bibliya kuti kupasa kumbaticitisa kukhala wakukondwa. — 2 Timotio 3:16, 17.
w15 15/12 tsa. 24 ndi. 7
Yahova An’dzatithandiza Tikakhala Tinkuduwala
7 Napo bziri tenepo, tikakhala tinkuduwala, tin’funika kunyang’ana kwa Mulungu kuti atitsangalaze, kutipasa nzeru, na kutithandiza ninga momwe adacitira na atumiki wace wakukhulupirika wakale. Mambo Davide adanemba kuti: “An’kondwa ngule omwe ambakumbukira munthu wakunyozeka; Yahova an’dzamukhotcerera na kumusunga wa moyo.” (Salimo 41:1, 2) Mu ntsiku za Davide munthu omwe akhathandiza munthu wakusauka, bzikhathandauza lini kuti iye angadakhala na moyo wakusaya kumala. Tenepo, Davide akhathandauza lini kuti munthu omwe angadacita bzimwebzo, Mulungu angadacita cakudabwisa mwa kumupasa moyo wakusaya kumala. Mafala yamweya yakuthandauza kuti Mulungu angadamuthandiza munthuyo thangwera kukhulupirika na nsisi zace. Mu njira iponi? Davide adafotokoza kuti: “Yahova an’dzathandiza wakunyozeka pomwe ankuduwala pakama pace. Pomwe iye ankuduwala Yahova an’dzacinja kama yace.” (Salimo 41:3) N’cadidi, munthu omwe ankuduwala angatsimikize kuti Mulungu an’dzayebwa lini bzinthu bzense bzabwino bzomwe iye adacita, ndipo ambadziwambo bza kukhulupirika kwace. Mpsakutsangalaza pomwe kudziwa kuti Mulungu adakonza thupi la munthu kuti limbakwanise kucira.
Tewezerani Ntsisi za Yahova
17 N’cadidi kuti kulatiza ntsisi n’kwakuthandiza kwene-kwene kwa ifepano, tsono thangwe likulu lomwe timbalatizira ntsisi ndakuti timbafuna kutewezera Yahova na kumupasa mbiri. Iye ni nsansa ya lufoyi na ntsisi. (Mimwani 14:31) Ndipo iye ambatipasa ciratizo cabwino kwene-kwene pa nkhani ya ntsisi. Tenepo, mbaticiteni bzense bzomwe tingakwanise kuti timbatewezere Mulungu mwa kumbalatiza ntsisi. Ndipo tikacita bzimwebzi, ifepano tin’dzabverana na abale na mpfumakazi zathu ndipo tin’dzakhala pa uxamwali bwabwino na anzathu. — Agalatiya 6:10; 1 Juwau 4:16.
Cuma Cauzimu
it-2 tsa. 16
Yahova
Nkhani zentse za m’Bibliya nfundo yace njibodzi yomwe ni kulatiza kuti Yahova ndiye omwe an’themera kutonga wanthu ndipo cakulinga cace cikulu ni kucenesa dzina lace. Bzimwebzi bzimbaphatanidza kucenesa dzinalo ku magunkha yentse. Kuthumizira bzimwebzi, dzinalo limbafunika kulemekezedwa na kuwonedwa kuti ndakucena na bzakulengedwa bzentse bza kudzulu na bza pa dziko la pantsi. Bzimwebzi bzikuthandauza kuti wanthu wentse an’funika kuzindikira kuti Yahova ndiye an’themera kutonga cirengedwe centse ndipo iwo an’funika kumutumikira acicita bzomwe iye ambafuna mwakucita kufuna kwawo sikuti mwakucita kukakamizidwa na iye. Mpembo wa Davide pa Salimo 40:5-10 ukulatiza kuti iye akhacita bzimwebzi ndipo akhafunisisa kucenesa dzina la Yahova. (Onani momwe mpostolo Paulo adalatizira kuti mafala ya pa salimoya yakhalewa bza Jezu Kristu pa Ahe 10:5-10.)
27 MAIO–2 JUNHO
CUMA CA M’FALA LA MULUNGU MASALIMO 42-44
Phatisani Basa Malango Yomwe Timbatambira Kucokera kwa Yahova
w06 1/6 tsa. 9 ndi. 4
Nfundo Zikulu-zikulu za Cigawo Caciwiri ca Bukhu la Masalimo
42:4, 5, 11; 43:3-5. Penu tingakwanise lini kutsonkhana na Akristau anzathu thangwe ra bzinthu bzinango, tingakhale wakulimba tikambakumbukira cikondweso comwe tikhakhala naco pomwe tikhatsonkhana pabodzi na gwere. Napo kuti pakuyamba bzingatiwawe, koma bzingatikumbusembo kuti Mulungu ni pakutawira pathu ndipo tin’funika kudikhirira iye kuti atithandize.
w12 15/1 tsa. 15 ndi. 2
Bzomwe Mungacite Kuti Mumbagumane Phindu na Kukomedwa pa Kupfunza Bibliya
1 KUPEMBA: Cinthu cakuyamba comwe tin’funika kucita ni kupemba. (Salimo 42:8) Thangwe ranyi tikulewa tenepoyo? Tin’funika kumbawona kuti kuwerenga Bibliya kumbacita mbali ya kunamata kwathu. Tsono, tin’funika kukumbira Yahova kuti atithandize kukhala na makumbukidwe yabwino na kuti atipasembo mzimu wace wakucena. (Luka 11:13) Barbara, omwe akutumikira ninga mpainiya kuyambira kale-kale, adalewa kuti: “Ndikanati kuyamba kuwerenga Bibliya ayai kupfunza, nimbayamba kupemba. Ndikacita bzimwebzi, nimbakwanisa kuwona kuti Yahova ali nande ndipo akukomedwa na bzomwe ndikucita.” Kupemba tikanati kupfunza Bibliya kumbatithandiza kuti makumbukidwe yathu yakhale pa mbuto ticigumana phindu na bzinthu bzomwe tikupfunzabzo.
“Lekani Kulekerera Kuti Manja Yanu Yatepe”
11 Yahova ambatilimbisambo mwa malango yomwe timbatambira pa mitsonkhano yathu yacikristau, mitsonkhano ya dera na yacigawo kuphatanidza na maxikola yakupfunzisa utumiki. Malangoya yambatithandiza kutumikira Mulungu na cakulinga cabwino, kuti tikwanise bzakulinga na kuti timbakwanise kusamalira maudindo mazinji yacikristau. (Salimo 119:32) Kodi munkufunisisa kugumana mphanvu mwauzimu na malango ya Yahova?
12 Yahova adathandiza wanthu wace kuti akunde pakumenyana na Amaleki na Etiopiya ndipo iye adapasambo mphanvu Nehemiya na Adjuda kuti amalize kumanga mpanda wa Jeruzalemu. Mu njira ibodzi-bodziyo, Mulungu an’dzatipasa mphanvu kuti tipitirize kucita basa lakupalizira napo kuti tinkulimbana na thupo, kutsutsidwa pabodzi na kuwona wanthu wakusaya kufunisisa bzinthu bzauzimu. (1 Pedru 5:10) Yahova ambamalisa lini mabvuto yathu mu njira yakudabwisa. Koma tin’funika kucita mbali yathu. Mu njira iponi? Tin’funika kumbawerenga Fala la Mulungu nsiku zense, kukonzekera na kumbayenda ku mitsonkhano yathu mdzinga uli-wense, kupitiriza kucita pfunziro lathu la patekha, kunamata ninga banja na kuthemba Yahova mwa kumbacita mpembo. Tin’funika lini kubvuma kuti cinthu ciri-cense cititazise kucita bzinthu bzomwe Yahova adapereka kuti bzitilimbise. Mukawona kuti manja yanu yankutepa mu mbali zense zomwe tafotokozazi, kumbirani thandizo kuna Yahova. Patsogolo pace onani momwe mzimu wa Mulungu ‘ukukupasirani mphanvu na cikhumbo kuti mucite bzomwe iye akufuna.’ (Afilipi 2:13) Kodi imwepo mungakwanisembo kulimbisa manja ya winango?
Cuma Cauzimu
it-1 tsa. 1242
Mphumphi
M’Bibliya, mphumphi zimbaphatisidwa basa kawiri-kawiri mu njira yakuyezezera. Djobi pa kudandaula kwace adakhala ninga “m’bale wa mphumphi.” (Djb 30:29) Pakulewa bza kukundidwa kwakupasa manyazi kwa wanthu wa Mulungu, nyakunemba salimo akhalewa bza mbuto yomwe mphumphi zimbagumana kuti zidye bzinthu bzakufa (Onani Sl 68:23), iye adadandaula kuti: “Imwepo mwatiphwanya ku mbuto komwe mphumphi zimbagumana.” (Sl 44:19) Pomwe mzinda wa Jeruzalemu udazunguliridwa na Ababiloniya mu gole la 607 AEC, mu mzindamo mudakhala na njala ndipo azimai adayamba kudya wana wawo. Pa nkhani imweyi, Jeremiya adalatiza kusiyana komwe kukhalipo pakati pa ‘wanthu wa Mulungu’ na mphumphi zomwe zimbasamalira bwino wana wazene. — Mal 4:3, 10.
3-9 JUNHO
CUMA CA M’FALA LA MULUNGU MASALIMO 45-47
Nyimbo Yakulewa bza Malowozi ya Mambo
w14 15/2 matsa. 9-10 ndi. 8-9
Kondwani Thangwe ra Malowozi ya Mwana wa Bira!
8 Werengani Salimo 45:13, 14a. Noivayu akonzekera kazamento yace ndipo akuwoneka kuti “ana ulemerero bukulu.” Pa Apokalipse 21:2 pakundendemezera noivayu ninga Jeruzalemu mupsa omwe “wabvala bwino kuti atambire mwamuna wace.” Mzinda wakudzulu umweyu una ‘ulemerero bwa Mulungu’ ukuyetima “ninga mwala wakufunika, ninga mwala wa jaspe wakungwerewera ninga vidru.” (Apokalipse 21:10, 11) Bukhu la Apokalipse limbafotokoza bza ulemerero bwa Jeruzalemu mupsa. (Apokalipse 21:18-21) Ndipopa nyakunemba salimo adalewa kuti noivayu “ana ulemerero bukulu.” Iye ana ulemererodi thangwe kazamentoyo ikucitikambo kudzulu.
9 Noivayu akumupereka kwa noivo omwe ni Mambo wa Umambo bwa Mulungu. Mamboyo akhala akumukonzekeresa mwa ‘kumutsuka na madzi yomwe ni Fala la Mulungu.’ Na tenepo, iye ‘ngwakucena na wakusaya cirema.’ (Aefezo 5:26, 27) Bzakubvala bza noivayo bzin’funika kukhala bzakudeka mwakubverana na msinda wa kazamentoyo. Ndipo bziridi tenepoyo thangwe rakuti “bzakubvala bzace mpsa oro,” ndipo “adamuyendesa kwa Mambo adabvala cakubvala cakuluka.” Pa kazamento ya Mwana wa Bira, noiva “wabvumizidwa kubvala bzakubvala bzakuumira, bzakuyetima na bzakucena bwino. Pakuti bzakubvala bzakuumirabzo, bzikuimira mabasa yakulungama ya anyakucena.” — Apokalipse 19:8.
Kodi Bukhu la Apokalipse Limbati Ciyani pa Nkhani ya Tsogolo Lanu?
10 Kodi Yahova an’dzacita ciyani anyamadulanthaka wace akadzafuna kupha wanthu wace? Iye akutiuza kuti: “Inepano nin’dzakalipa kwene-kwene.” (Ezekiyeli 38:18, 21-23) Pa Apokalipse kapitulo 19, pambatiuza bzomwe bzin’dzacitika. Yahova an’dzatumiza Mwana wace kuti adzakhotcerere wanthu wace na kukunda anyamadulanthaka wace. Pa nkhondoyi, Jezu an’dzakhala pabodzi na “acikunda wakudzulu” omwe ni anjo wakukhulupirika wa Yahova pabodzi na wa 144 000. (Apokalipse 17:14; 19:11-15) Kodi nkhondo imweyi in’dzamala tani? Pa nkhondoyi, wanthu wentse wakuipa pabodzi na magulu ya wanthu yomwe yambabvera lini Yahova an’dzapfudzidwa. — Werengani Apokalipse 19:19-21.
11 Kodi mukukumbuka kuti atumiki wa Mulungu an’dzabva tani akadzawona kuti anyamadulanthaka wentse wa Mulungu apfudzidwa ndipo iwo apulumuka? Imweyi in’dzakhala nthawe yakudekeza kwene-kwene! N’cadidi kuti kudzulu anjo an’dzakomedwa kwene-kwene Babiloniya Mkulu akadzapfudzidwa. Tsono pana cinthu pomwe cinango comwe cin’dzacitisa kuti wale omwe ali kudzulu akomedwe kwene-kwene. (Apokalipse 19:1-3) Cinthuco ni “malowozi ya Mwana wa Bira,” yomwe ni nkhani yakudekeza kwene-kwene ya m’bukhu la Apokalipse. — Apokalipse 19:6-9.
12 Kodi malowozi ya Mwana wa Bira yan’dzacitika lini? Akristau wentse omwe ambacita mbali ya wa 144 000 an’dzakhala ali kale kudzulu pomwe nkhondo ya Armagedo ikanati kuyamba. Tsono imweyi in’dzakhala lini nthawe yakuti malowozi ya Mwana wa Bira yacitike. (Werengani Apokalipse 21:1, 2.) Malowozi ya Mwana wa Bira yan’dzacitika nkhondo ya Armagedo ikadzamala, pomwe anyamadulanthaka wentse wa Mulungu apfudzidwa. — Salimo 45:3, 4, 13-17.
it-2 tsa. 1169
Nkhondo
Thangwe ra kumala kwa nkhondo, pa dziko la pantsi pan’dzakhala na mtendere kwa magole 1000. Nyakunemba salimo adalewa kuti “[Yahova] akuletsa nkhondo pa dziko lentse la pantsi. Akutcola uta acigwata-gwata dipa. Ndipo akutentha ngolo za nkhondo pa moto.” Bzimwebzi bzidakwanisika kale pakuyamba pomwe Mulungu adacitisa kuti Ajirayeri akhale na mtendere mwa kutcola bzifuzo bzakumenyera nkhondo bza anyamadulanthaka wawo. Pambuyo pa Kristu kukunda anyamadulanthaka wace pa nkhondo ya Armagedo, pa dziko lentse la pantsi pan’dzakhala na mtendere uzinjisa. (Sl 46:8-10) Wanthu omwe an’dzatambira moyo wakusaya kumala an’dzakhala wale omwe ‘mphanga zawo azisula magedjo, na madipa yawo aciyasula kukhala bzakutunthulira miti’ na wale omwe ‘an’dzapfunza lini pomwe nkhondo.’ “Pakuti pa mulomo pa Yahova wa anyankhondo ndipo palewa bzimwebzi.” — Zai 2:4; Mik 4:3, 4.
Cuma Cauzimu
N’ciyani Cin’dzacitika Umambo bwa Mulungu Bukadzafika?
9 Kodi n’ciyani cin’dzapita m’mbuto mwa mabungwe yacinyengo? Kodi Armagedo ikadzamala, pa dziko la pansi pano pan’dzakhala pana bungwe liri-lense? Bibliya limbalewa tenepa: “Pana kudzulu kupsa na dziko la pantsi lipsa bzomwe tikudikhirira mwakubverana na bzomwe iye adalewa, ndipo m’mwemo mun’dzakhala cirungamo.” (2 Pedru 3:13) Kudzulu kwakale na dziko lakale bzimbaimira maboma yacinyengoya pabodzi na wanthu omwe ambayatsogolera. Tsono bzimwebzi bzikadzapfudzidwa, n’ciyani cin’dzapita m’mbuto mwace? Ni “kudzulu kupsa na dziko lipsa.” Kudzulu kupsa, ni boma lipsa lomwe ni Umambo bwakutongedwa na Jezu Kristu pabodzi na anzace wa 144 000. Dziko lipsa, ni wanthu omwe an’dzatongedwa na Umambo bwa Mulungu. Jezu pabodzi na anzacewo, an’dzacita bzinthu mwakutewezera Yahova Mulungu, omwe ambacita bzinthu mwakulongosoka. (1 Akolinto 14:33) Ndipopa ‘dziko lipsa’ lin’dzakhala lakulinganizika. Lin’dzakhala na amuna omwe an’dzasamalira bwino bzinthu. (Salimo 45:16) Amunawo an’dzatsogoleredwa na Kristu pabodzi na wa 144 000. Ndokumbukirani momwe bzin’dzakhalira bzakudekeza kukhala m’dziko la gulu libodzi lakuphatana na lakusaya cinyengo!
10-16 JUNHO
CUMA CA M’FALA LA MULUNGU MASALIMO 48-50
Abereki, Thandizani Banja Lanu Kuti Lipitirize Kukhala m’Gulu la Yahova
Kunamata Kwacadidi Kumbakuthandizani Kukhala Wakukondwa
11 Tikambapfunza Fala la Mulungu na kupfunzisambo wana wathu bza iye timbakhala tikunamata Yahova. Pa ntsiku ya Sabudu, Ajirayeri akhambaphata lini basa thangwe ikhali ntsiku yakulimbisa uxamwali bwawo na Yahova. (Ekisodo 31:16, 17) Ajirayeri wakukhulupirika akhambapfunzisa wana wawo bza Yahova na bzinthu bzabwino bzomwe akhawacitira. Ntsiku zino, ifepano tin’funika kumbapambula nthawe kuti timbapfunze Fala la Mulungu. Bzimwebzi bzimbacita mbali yakunamata kwathu Yahova ndipo bzimbatithandiza kukhala pa uxamwali na iye. (Salimo 73:28) Tikambapambula nthawe kuti tipfunze Fala la Mulungu na banja lathu, timbathandiza wana wathu kukhala pa uxamwali bwakulimba kwene-kwene na Baba wathu wa kudzulu. — Werengani Salimo 48:13.
w11 15/3 tsa. 19 ndi. 5-7
Bzinthu Bzomwe Bzingakucitiseni Kukhala Wakukondwa
“Zungulirani Ziyoni, anthumwe, ndipo fambani-fambani m’mwemo, werengani ntsanza zace. Kumbukirani bza litsito lace lakulimba. Zonderani ntsanza zace zakukhala, kuti mudzadziwise m’badwo wakutsogolo.” (Salimo 48:12, 13) Pamwepa, nyakunemba salimo akhalimbikisa Ajirayeri kuti ayende kukawona mzinda wa Jeruzalemu. Kodi mukukumbuka kuti mabanja yacijirayeri yomwe yakhayenda kukawona mzinda wakupambulikayu na kucitambo phwando la pa gole yakhabva tani? Iwo akhakomedwa kwene-kwene ndipo ‘adzadziwisambo m’badwo wakutsogolo’ bzomwe akhawonabzo.
Kumbukirani bza mambo-mkazi wa ku Xeba omwe pakuyamba akhapenukira bzomwe adabva pakulewa bza utongi bwamphanvu bwa Salomau na nzeru zace zakudabwisa. Kodi n’ciyani comwe cidacitisa kuti mambo-mkaziyo akhulupire bzomwe adabvabzo? Mambo-mkaziyo adalewa kuti: “Ndiribe kukhulupira mafalayo kufikira pomwe ndidadzacita kuwona na maso yangu.” (2 Nkhani 9:6) Bzomwe timbawona na ‘maso yathu’ bzimbacinja momwe tikhakumbukirira pomwe tikhanati kubziwona.
Kodi mungathandize tani wana wanu kuti ambawone na ‘maso yawo’ bzinthu bzakudabwisa bza m’gulu la Yahova? Penu kufupi na komwe mumbakhalako kuna mthambi ya Mboni za Yahova, mungacite bwino kumbayenda kukazunga nawo kumweko. Mwa ciratizo, Mandy na Bethany ni atsikana omwe adakulira mu mzinda omwe uli pa mtantho wa makilometro 1500 kucokera ku Beteli ya ku dziko lawo. Koma abereki wawo akhacita makonzedwe yakuti ambayende kukawona nawo Beteliyo, maka-maka pomwe iwo akhakula. Atsikanawo adalewa kuti: “Pomwe tikhanati kuyenda ku Beteli tikhakumbuka kuti Beteli ni mbuto yakusaya kudekeza ndipo kumweko kumbakhala mkhalamba zokha-zokha. Tsono pomwe tidayenda kumweko, tidagumana na maswaka yomwe yakhatumikira Yahova mwanyongo na mwakukondwa. Tidakwanisa kuwona kuti gulu la Yahova likhandogumanika lini komwe tikhakhalako basi, koma nthawe zentse tikambayenda ku Beteli tikhalimbikisidwa mwauzimu.” Mandy na Bethany adalidziwa bwino-bwino gulu la Mulungu ndipo bzimwebzi bzidawalimbikisa kuti acite upainiya na kutumikira pa Beteli mu nthawe yakucepa.
w12 15/8 tsa. 12 ndi. 5
Mbacitani Bzinthu Ninga Nzika za Umambo!
5 An’funika kudziwa mbiri ya dzikolo. Munthu omwe akufuna kukhala nzika ya dziko linango angafunikire kudziwa bzinthu bzinango bza dzikolo. Wanthu omwe an’funa kukhala nzika za Umambo bwa Mulungu an’funika kudziwa bzinthu bzizinji bza Umambobo. Wana wa Kora, omwe akhatumikira mu Jirayeri, ni ciratizo cabwino pa nkhani imweyi. Iwo akhafuna kwene-kwene mzinda wa Jeruzalemu ndipo akhakomedwambo kuuza anzawo mbiri ya mzindayo. Comwe cikhawadekera kwene-kwene cikhali lini kudeka kwa mzindayo, koma bzomwe mzindayo na mbuto yakunamatira bzikhaimira. Jeruzalemu akhali “mzinda wa Mambo mkulu” thangwe rakuti wanthu akhanamata Yahova ndipo akhapfunza Malamulo yace. Ndipo Yahova akhadekera mtima wanthu omwe akhatongedwa na Mambo wa ku Jeruzalemu. (Werengani Salimo 48:1, 2, 9, 12, 13.) Kodi imwepo mumbakomedwambo kupfunza na kuuzambo wanthu winango bza mbiri ya wanthu wa Yahova? Mun’dzalatiza kuti mumbatenda kwene-kwene Umambo bwa Mulungu mukambapfunza bzinthu bzizinji bza wanthu wa Mulungu na momwe Yahova ambawathandizira. Bzimwebzi bzin’dzakucitisani kuti mumbafune kupalizira bza mafala yabwino ya Umambo. — Jeremiya 9:24; Luka 4:43.
Cuma Cauzimu
it-2 tsa. 805
Cuma
Pakuti Ajirayeri akhali mtundu wakusimbidwa, iwo angadadya na kumwa (1 Am 4:20; Mpa 5:18, 19), ndipo cuma cawo cingadawathandiza kuti aleke kugumana na mabvuto nakuti aleke kusauka. (Mim 10:15; Mpa 7:12) Tsono, napo kuti ni Yahova omwe akhafuna kuti Ajirayeri adale thangwe ra basa lomwe akhacita (ndendemezerani na Mim 6:6-11; 20:13; 24:33, 34), Yahovayo adawacenjeza kuti iwo akhafunikira lini kuthemba cuma cawoco aciyebwa kuti ni Yahova omwe akhawacitisa kuti adale. (Deu 8:7-17; Sl 49:6-9; Mim 11:4; 18:10, 11; Jer 9:23, 24) Iye adawakumbusa kuti cuma cawoco cikhali cakanthawe (Mim 23:4, 5), cumaco cingadaperekedwa lini ntsembe kwa Mulungu cicicitisa kuti munthu aleke kufa (Sl 49:6, 7), ndipo cikhalibe phindu kwa anyakufa (Sl 49:16, 17; Mpa 5:15). Iye adawalatiza kuti kufuna kwene-kwene cuma kungadawacitisa kuti ambabere wanthu omwe ambacita nawo malonda ndipo bzimwebzi bzingadacitisa kuti Yahova aleke kukomedwa nawo. (Mim 28:20; ndendemezerani na Jer 5:26-28; 17:9-11.) Ndipo adawalimbikisambo kuti ‘ambamulemekeze na bzinthu bzawo bzakufunika.’ — Mim 3:9.
17-23 JUNHO
CUMA CA M’FALA LA MULUNGU MASALIMO 51-53
Bzomwe Mungacite Kuti Mutcenkhe Kucita Pikado Ikulu
Kodi Mungakhotcerere Tani Mtima Wanu?
4 Fala lakuti “mtima” lomwe lidaphatisidwa basa pa Mimwani 4:23, limbaimira “unthu bwa mkati.” (Werengani Salimo 51:6.) Mu njira inango, tingalewe kuti “mtima” umbaimira makumbukidwe na bzikhumbo. Ayai ni momwe ifepano tiriri mkati, sikuti mawonekedwe yathu ya kunja.
5 Kumbukirani momwe thanzi la thupi lathu limbalatizira kufunika kwa unthu bwathu bwa mkati. Cakuyamba, kuti thupi lathu likhale na mawonekedwe yabwino, tin’funika kumbadya bzakudya bzakupasa thanzi na kumbacita masenzeka yakulimbisa thupi mwakukhazikika. Mpsibodzi-bodzimbo na ifepano, kuti tipitirize kukhala na thanzi labwino mwauzimu, tin’funika kumbadya cakudya cauzimu cakupasa thanzi na kumbalimbisa nthawe zense cikhulupiro cathu kwa Yahova. Ndipo tingalatize cikhulupiro cathu kwa Yahova mwa kuphatisa basa bzomwe timbapfunza, na kuuzambo winango bza cikhulupiro cathuco. (Aroma 10:8-10; Tiyago 2:26) Caciwiri, tikambawona mawonekedwe yathu yakunja, tingakumbuke kuti tina thanzi labwino, ne kudziwa kuti mkati mwa thupiro tina matenda. Mpsibodzi-bodzimbo, tikambawona momwe tinkucitira bzinthu bzauzimu, tingakumbuke kuti cikhulupiro cathu n’cakulimba, tsono bzikhumbo bzakuipa bzingakule mu mtima mwathu. (1 Akolinto 10:12; Tiyago 1:14, 15) Tin’funika kumbakumbukira kuti Sathani an’funa kutipumpsa kuti tikhale na makumbukidwe ninga yace. Kodi iye angacite tani bzimwebzo? Ndipo tingabzikhotcerere tani?
w15 15/6 tsa. 14 ndi. 5-6
Tingapitirize Kukhala Wakucena
5 Timbalatiza kuti timbathemba Yahova tikambapemba kwa iye kuti atithandize kutcenkha makumbukidwe yakuipa. Tikambamufenderera Yahova mu mpembo, iye ambatifendererambo. Iye ambatipasa mzimu wace wakucena kuti utithandize kupitiriza kukhala wakucena ticitcenkha kukhala na makumbukidwe yakuipa. Ndipopa tin’funika kumukumbira Yahova kuti atithandize kukumbukira bzinthu bzomwe bzimbamukondwesa. (Salimo 19:14) Tin’funika kupemba kwa Yahova kuti atithandize kuzindikira makumbukidwe yali-yentse yomwe yangaticitise kucita pikado. (Salimo 139:23, 24) Timbakumbire Yahova nthawe zentse kuti atithandize kukhala wakukhulupirika kwa iye napo ticigumana na mabvuto. — Mateu 6:13.
6 Pinango pomwe tikhanati kupfunza bza Yahova tikhacita bzinthu bzomwe iye ambabziwenga, ndipo pinango nthawe zinango timbakumbukira bzinthu bzimwebzi. Napo bziri tenepo, Yahova angatithandize kupitiriza kukhala wakucena. Davide akhadziwa bwino bzimwebzi. Pomwe iye adacita upombo na Bateseba adapemba kwa Yahova kuti: “Ndicitiseni kukhala na mtima wakulungama, ndipo ikhani mwa ine makumbukidwe yapsa na yakukhazikika.” (Salimo 51:10, 12) N’cadidi kuti tingakhumbe kucita bzinthu bzakuipa ndipo bzingatinese kusiya kumbabzikumbukira. Tsono Yahova angapitirize kutitsogolera ticibvera malamulo yace. Iye angatithandize kuti tireke kumbakhala na nzeru zakuipa. — Salimo 119:133.
Cuma Cauzimu
it-1 tsa. 644
Doegi
Akhali m’edomu ndipo akhali nyakunyang’anira anyakabusa wa Mambo Sauli. (1Sa 21:7; 22:9) Bzikuwoneka kuti iye adacita kucinja kuti akhale mu Jirayeri. Pakuti iye “akhadaimisidwa kucita bzinthu bzinango pamaso pa Yahova” ku Nobe, pinango pentse thangwe ra piciro linango ayai thangwe ra cinthu cinango cakupswipa ayai thangwe ra mapere, Doegi akhalipo pomwe mkulu wa antsembe Aimeleki adapasa Davide pau zakupambulika na xipada ya Goliyati. Patsogolo pace, pomwe Sauli akhalewa kuti atumiki wace amuphindukira, Doegi adamuuza bzentse bzomwe iye adawona ku Nobe. Pomwe Sauli adacemeresa mkulu wa antsembe Aimeleki pabodzi na antsembe winango wa ku Nobe, iye adauza alindiri wace kuti aphe antsembewo. Pomwe alindiriwo adalamba, Doegi adabvuma kucita bzomwe Sauli adamuuza ndipo adapha antsembe wakukwana 85. Pambuyo pakucita bzimwebzi, iye adayenda ku Nobe acikapha wanthu wentse wa kumweko kuphatanidzambo maswaka, nkhalamba na bzifuwo. — 1Sa 22:6-20.
Ninga momwe umbalatizira msolo wa cinembo ca Salimo 52, Davide adanemba pakulewa bza Doegi, aciti: “Lirime lace ndakuthwa ninga lezi, ambafuna kucita bzinthu bzakuipa ndipo ngwakunama. Iwepo umbafuna kwene-kwene kucita bzinthu bzakuipa m’mbuto mwakucita bzabwino, umbawona kuti kunama n’kwabwino m’mbuto mwakulewa cadidi. Iwepo umbafuna mafala yakudzonga, iwe lirime lakunamawe.” — Sl 52:2-4.
24-30 JUNHO
CUMA CA M’FALA LA MULUNGU MASALIMO 54-56
Mulungu ali ku Mbali Yanu
w06 1/8 tsa. 22 ndi. 10-11
Khalani Wanzeru mwa Kugopa Mulungu!
10 Pa nthawe inango, Davide adayenda kwa Akisi, mambo wa mzinda wa Afilisteu wa ku Gati, komwe kukhakhala Goliyati. (1 Samuyeli 21:10-15) Atumiki wa mamboyo adalewa kuti Davide akhali nyamadulanthaka wa mtundu wawo. Kodi Davide adacita ciyani pomwe bzinthu bzidafika pakuipa tenepa? Iye adapemba kwa Yahova na mtima wace wentse. (Salimo 56:1-4, 11-13) Napo kuti Davide adanamizira kuti akhali nyamsala, iye akhadziwa kuti Yahova ndiye omwe adasimba bzomwe iye adacitabzo. Davide adathemba Yahova na mtima wace wentse, ndipo adalatiza kuti akhali munthu omwe akhagopadi Mulungu. — Salimo 34:4-6, 9-11.
11 Ninga Davide, ifembo tingalatize kuti timbagopa Mulungu pa kukhulupira piciro lace lakuti an’dzatithandiza kulimbana na mabvuto yomwe timbagumana nayo. Davide adati: “Bvuma kuti Yahova akutsogolere m’njira yako, umukhulupire ndipo iye an’dzakuthandiza.” (Salimo 37:5) Bzimwebzi bzin’funa lini kulewa kuti tin’ndofunika kusiyira Yahova mabvuto yathuyo kuti iye ndiye ayamalise yekha ife ticindoberekera manja basi. Davide alibe kundopemba kwa Yahova kuti amuthandize acindokhala phee. Koma adaphatisa basa mphanvu na nzeru zomwe Yahova adamupasa kuti alimbane na bvuto lacero. Tsono Davide akhadziwa kuti munthu angakwanise lini kucita cinthu mwa iye yekha. Ifepanombo tin’funika kukumbukira bzimwebzi. Tikacita mbali yathu na mphanvu zathu zentse, tin’funika kusiya bzentse m’manja mwa Yahova. Nthawe zinango pambakhala palibe bzomwe tingacite kupambula kuthemba Yahova basi. Imweyi ni nthawe yomwe timbalatiza patekha kuti timbagopadi Mulungu. Tingalimbikisidwe na mafala yomwe Davide adalewa mwakucokera mu mtima, yakuti: “Uxamwali bwa pa mtima na Yahova n’bwa wale omwe ambamugopa.” — Salimo 25:14.
cl tsa. 243 ndi. 9
Palibe Comwe “Cingatilekanise na Lufoyi la Mulungu”
9 Yahova ambawonambo kupirira kwathu. (Mateu 24:13) Kumbukirani kuti Sathani akufuna kuti musiye kutumikira Yahova. Dziwani kuti ntsiku iri-yentse yomwe mumbapitiriza kukhala wakukhulupirika kwa Yahova mumbakhala mukugaza magunkha yomwe Sathani adalewa. (Mimwani 27:11) Tsono nthawe zinango kupirira n’kwakunesa. Kuduwala, kusaya kobiri, kusunama na mabvuto manango bzingacitise kuti kupirirako kukhale kwakunesa. Bzimbatinesambo kupirira tikakhala tikudikhirira cinthu, tsono cinthuco cikucedwa. (Mimwani 13:12) Tikambapirira pa mabvuto yentseneya timbakondwesa Yahova. Ndipopa Mambo Davide adakumbira Yahova kuti afungire misozi yace mu “nthawa.” Ndipo iye adalewa mwakutsimikiza kuti: “Kodi iyo iri lini m’bukhu lanu?” (Salimo 56:8) Yahova ambawona ndipo ambakumbukira misozi yathu na mabvuto yentse yomwe tikuyapirira na kupitiriza kukhala wakukhulupirika kwa iye. Iye ambafunisisa kutithandiza.
Lufoyi la Yahova Limbatithandiza Kukunda Mantha
16 Sathani ambadziwa kuti ifepano timbafuna kukhala na moyo. Ndipo iye adalewa kuti tin’dzabvuma kudzonga uxamwali bwathu na Yahova na kucita cinthu ciri-centse kuti tipulumuse moyo wathu. (Djobi 2:4, 5) Koma iye akhanama. Pakuti ndiye “omwe ambacitisa kuti wanthu afe,” ndipopa ambayezera kutigopswa mwakuphatisa basa infa kuti tisiye kutumikira Yahova. (Ahebereu 2:14, 15) Nthawe zinango wanthu omwe ambatsogoleredwa na Sathani ambatigopswa mwakulewa kuti an’tipha tikapitiriza kutumikira Yahova. Tikakhala kuti tikuduwala, nthawe zinango Sathani ambaphatisa basa mpata umweyu kuti adzonge cikhulupiro cathu. Adotolo ayai abale wathu omwe ni Mboni lini za Yahova angayezere kutingingimiza kuti tiikhidwe mulopa, komwe ni kuphonyera mitemo ya Mulungu. Ayai munthu unango angayezere kutingingimiza kuti tibvume thandizo la ulapi lomwe limbabverana lini na bzomwe Bibliya limbapfunzisa.
17 Napo timbafuna lini kufa, timbadziwa kuti Yahova an’dzapitiriza kutifuna napo ticifa. (Werengani Aroma 8:37-39.) Axamwali wa Yahova akafa, iye ambapitiriza kuwakumbukira ninga kuti iwo akana moyo. (Luka 20:37, 38) Ndipo iye an’dzawalamusa kuti akhale pomwe na moyo. (Djobi 14:15) Yahova adapagali pereso yakuumira kwene-kwene kuti ifepano ‘tidzakhale na moyo wakusaya kumala.’ (Juwau 3:16) Ifepano timbadziwa kuti Yahova ambatifuna kwene-kwene ndipo ambatithandiza. Ndipopa timbathemba iye kuti atitsangalaze, atipase nzeru na mphanvu tikakhala tikuduwala ayai wanthu akafuna kutipha. Ndipo mpsimwebzi bzomwe mpfumakazi Valérie na mwamuna wawo adacita. — Salimo 41:3.
Cuma Cauzimu
it-1 matsa. 857-858
Kukonzeratu Momwe Bzinthu Bzin’dzacitikira Kutsogolo
Bzomwe Djuda Sikaliyoti adacita bzidakwanirisa polofesiya yomwe Yahova na Jezu akhadailewa kale. (Sl 41:9; 55:12, 13; 109:8; Mab 1:16-20) Tsono tingalewe lini kuti Mulungu akhadanemba kale kuti Djuda ndiye angadadzacita bzimwebzi. Mapolofesiya yakhadalewa kale kuti m’bodzi wa anyakupfunza wa Jezu ndiye omwe angadadzamupereka, koma yakhalewa lini kuti ni mbani maka-maka omwe angadacita bzimwebzi. Kuthimizira bzimwebzi, Mulungu angadaleweratu kuti Djuda ndiye angadacita bzimwebzi, bzingadakhala bzakupitana na nfundo za m’Bibliya. Nfundo ya m’Bibliya yomwe idalewedwa na mpostolo njiyi: “Leka kufulumiza kupasa munthu ali-wentse udindo ne kukhala na mulandu pa pikado za wanthu winango, m’mbuto mwace pitiriza kukhala na makhalidwe yakucena.” (1Ti 5:22; ndendemezerani na 3:6.) Jezu adaphuphudza akupemba pomwe akhanati kusankhula apostolo wace 12, ndipo bzimwebzi bzidalatiza kuti iye akhafuna kuti bzomwe an’sankhula bzibverane na kufuna kwa Pai wace. (Lu 6:12-16) Bzingadakhala kuti bzidanembedwa kale kuti Djuda ndiye omwe angadapereka Jezu, bzimwebzi bzingadalatiza kuti Yahova alibe kumuthandiza bwino Jezu pomwe akhasankhula apostolo wace, ndipo mwakubverana na nfundo ya m’Bibliya ire, iye angadakhala athandizirambo pikado yomwe Djuda adacita.
Tenepo, bzikuwonekeratu kuti pomwe Jezu adasankhula apostolo wace, Djuda akhanati kukhala na makumbukidwe ya kupereka Jezu. Iye adalekerera kuti ‘muzi wa veneno uphukire’ mu mtima mwace ndipo umudzonge, acilamba kutsogoleredwa na Mulungu, m’mbuto mwace acibvuma kutsogoleredwa na Sathani kuti ayambe kuba na kupereka Jezu. (Ahe 12:14, 15; Ju 13:2; Mab 1:24, 25; Tiy 1:14, 15) Pomwe kupanduka kwace kudayamba kuwonekera, Jezu adadziwa bzomwe bzikhali mu mtima mwa Djuda ndipo adalewa kuti ndiye omwe angadadzamupereka. — Ju 13:10, 11.