Mareferentsiya ya Kabukhu ka Mitsonkhano ka Moyo Wathu na Utumiki
© 2024 Watch Tower Bible and Tract Society of Pennsylvania
6-12 JANEIRO
CUMA CA M’FALA LA MULUNGU MASALIMO 127-134
Abereki — Pitirizani Kusamalira Wana Wanu
Mbalemekezani Mbuto Yomwe Munayo m’Banja la Yahova
9 Yahova adapasa wanthu ufulu bwakusankhula kukhala na wana, pabodzi na udindo bwa kuwapfunzisa kufuna Yahovayo na kumutumikira. Penu imwepo ndimwe m’bereki, kodi mumbatenda mphaso yabwinoyi? Yahova adapasa anjo maluso mazinji. Tsono iye alibe kuwapasa ufulu bwakusankhula kukhala na wana. Tenepo, penu imwepo ndimwe m’bereki, mbatendani mwayi omwe munawo wakukhala na wana. Abereki adapasidwa udindo bwakufunika kwene-kwene bwakuti ‘[ambalere wana wawo] m’malango ya Yahova.’ (Wayefezo 6:4; Bzakutonga 6:5-7; Psalymo 127:3) Kuti gulu la Mulungu lithandize abereki kupfunzisa wana wawo, iro limbapereka bzinthu bzizinji bzakupfunzisira bzakucokera m’Bibliya, ninga mabukhu, mavidiyo, nyimbo na bzinthu bzomwe bziri pa interneti. Kulewa cadidi, Baba wathu wa kudzulu pabodzi na Mwana wace, ambafuna wana wathu. (Luka 18:15-17) Abereki akambathemba Yahova na kucita ciri-centse comwe angakwanise kuti alere wana wawo, Yahovayo ambakomedwa. Ndipo abereki amwewa ambathandizambo wana wawo kuti akhale na cidikhiro cakuti adzacitembo mbali ya wanthu wa m’banja la Yahova mpaka kale-kale!
Abereki — Mbapfunzisani Wana Wanu Kuti Ambafune Yahova
20 Adziweni bwino wana wanu. Kapitulo 127 ya bukhu la Psalymo imbandendemezera wana na misewe. (Werengani Psalymo 127:4.) Misewe imbakonzedwa na bzinthu bzakusiyana-siyana ndipo inango imbakhala ikulu, inango ing’ono, mpsibodzi-bodzimbo na wana, iwo ambakhala wakusiyana-siyana. Tenepo, abereki an’funika kudziwa momwe angapfunzisire mwana ali-wentse payekha. Banja linango la ku Israel lomwe lidakwanisa kulera bwino wana wawo awiri kuti atumikire Yahova, lidafotokoza bzomwe bzidawathandiza. Iro lidati: “Ifepano tikhacitisa pfunziro la Bibliya mwana ali-wentse payekha.” Kulewa cadidi, banja liri-lentse lingasankhule bzomwe lingapfunze na wana wawo.
Cuma Cauzimu
it-1 tsa. 543
Miti ya mu Nthawe za m‘Bibliya
Munembi wa salimo adaphatisa basa muti wa olivera kuti afotokoze bza wale omwe ambagopa Yahova. Iye adati: “Wana wanu an’dzakhala ninga mphukira za muti wa olivera zomwe zidazungulira meza yako.” (Sl 128:1-3) Kazinji-kazinji mithambi ya muti wa olivera ikagwatidwa icibzalidwa, imbaphukira icikhala miti minango. Kuthumizira bzimwebzi, pinango-pentse miti ya miolivera yomwe njakale-kale imbacosambo mphukira ku mizi yace icicitisa kuti mitiyo ireke kufa. Ninga mphukira zimwezi, wana akambabvera bzomwe pai wawo ambawapfunzisa ambacitisa kuti m’banja mukhale na mtendere.
13-19 JANEIRO
CUMA CA M’FALA LA MULUNGU MASALIMO 135-137
“Mbuya Wathu ni Mkulu Kuposa Mirungu Inango Yentse”
it-2 tsa. 661 ndi. 4-5
Mphanvu, Mabasa Yamphanvu
Mulungu ana mphanvu yakucita bzomwe akufuna na cirengedwe cace. Kuti alatize kuti ni Mulungu wacadidi, Yahova ana mphanvu yakutsogolera cirengedwe cace mu njira yomwe ingabverane na thandauzo la dzina lace. (Sl 135:5, 6) Pakuti dzuwa, mwezi, maplaneta na nyenyezi bzimbaphata kale basa mwakubverana na momwe bzidakonzedwera, nyengo (yomwe imbacitisa kuti kucite conzi, nvula na bzinthu bzinango) imbacita bzinthu mwakubverana na momwe idakonzedwera, bziwala bzimbakhalira pa mbuto ibodzi ndipo mbalame zimbambuluka ziciyenda ku mbuto inango, bzinthu bzimwebzi bzingadacitisa lini kuti dzina la Mulungu licenesedwe mwa kucitisa kuti wanthu omwe ambalinyoza azindikire kuti iye ngwamphanvu thangwe ibzo bzimbaphata kale basa mwakubverana na momwe bzidakonzedwera.
Ndipopa, Yahova angacitise kuti bzinthu bza m’cirengedwe bzilatize mphanvu yace mwakubzicitisa kuti bziphate basa mwakusiyana na momwe bzidalengedwera pa nthawe yomwe iye akufuna. Napo kuti bzinthu ninga kunesa kwa madzi, conzi ayai kucinja kwa nyengo bzikhambacitika kale, koma pa kukwanirisa cakulinga ca Mulungu, ibzo bzikhacitika mu njira yakudabwisa. (Ndendemezerani na 1Am 17:1; 18:1, 2, 41-45.) Kazinji-kazinji bzinthu bzimwebzi bzikhacitika mwakudabwisa kwene-kwene thangwe ra kukula kwace ayai mphanvu yace (Eki 9:24) ayai bzikhacitika mu njira yomwe ikhanati kucitika kale, ayai pa nthawe yakusaya kudikhiririka. — Eki 34:10; 1Sa 12:16-18.
Kodi Lufoyi Lacadidi la Yahova Limbathandauza Ciyani Kuna Imwepo?
16 Yahova akakhala mbuto yathu Yakuthawira timbakhala wakukhotcerereka. Nthawe zinango tingabzibve kuti tidawofoka ndipo bzingatinese kusiya kubva tenepoyo. Pa nthawe ningati zimwezi, kodi n’ciyani comwe Yahova an’dzaticitira? (Werengani Salimo 136:23.) Iye an’dzatiikha m’manja mwace, an’dzatidzusa mwakudeka mtima, acitithandiza kumuka na minyendo yathu. (Salimo 28:9; 94:18) Momwe timbagumanira phindu: Kudziwa kuti Yahova angatithandize nthawe zentse, kumbaticitisa kukumbukira kuti ndife wakusimbidwa mu njira ziwiri. Yakuyamba, kuli-kwentse komwe tingakhale, tina mbuto yakuthawira yakukhotcerereka. Yaciwiri, Baba wathu walufoyi wakudzulu ambatifuwa na mtima wentse.
Cuma Cauzimu
it-1 tsa. 1248
Yah
Fala lakuti Yah kazinji-kazinji limbaphatisidwa basa na munthu omwe akukomedwa pomwe akuimba nyimbo zacitumbizo na pomwe akucita mpembo wakudandaula. Ndipo iro limbaphatisidwambo basa na wanthu omwe akukomedwa thangwe ra kukunda na kutsudzulidwa ayai akazindikira kuti Yahova awathandiza. M’Bibliya muna mbuto zizinji zomwe zina fala limweri. Mafala yakuti: “Tumbizani Yah, wanthumwe!” (Aleluya) yambafotokozedwa m’masalimo ninga mafala yakutumbiza Mulungu ndipo mafalaya yambagumidwa kakuyamba pa Salimo 104:35. M’masalimo manango, mafalaya yambagumanika pa tumisolo twa makapitulo (Sl 111, 112), nthawe zinango pakati pa salimo (135:3) ndipo nthawe zinango kuphampha kokha (Sl 104, 105, 115-117). Koma kazinji-kazinji yambagumanika kwakuyambirira na kuphampha (Sl 106, 113, 135, 146-150). Mu bukhu la Apokalipse, bzakulengedwa bza kudzulu bzimbaguma dzina limweri mwakubwereza-bwereza pa kutumbiza Yahova. — Apo 19:1-6.
M’mbuto zinango wanthu adaphatisa basa fala lakuti “Yah” pomwe akhaimba nyimbo zakutumbiza na pakucita mipembo ya kukumbira thandizo kwa Yahova. Mozeji adaimba nyimbo yacipulumuso. (Eki 15:2) Pa mafala yomwe Zaiya adanemba, iye adaphatisa basa madzina mawiriya yakuti “Yah na Yahova.” (Zai 12:2; 26:4) Pa mafala yomwe Ezekiya adalewa pambuyo pa kupozedwa na Yahova mu njira yakudabwisa pomwe akhadasala pang’ono kufa pakufuna kulatiza momwe akhabvera adabwerezera kawiri fala lakuti Yah. (Zai 38:9, 11) Pana kusiyana pakati pa wanthu wakufa omwe angatumbize lini Yah na omwe ana moyo omwe ambamutumbiza. (Sl 115:17, 18; 118:17-19) Ndipo masalimo manango yana mipembo yakutenda thangwe ra kutsudzulidwa, kukhotcereredwa na kutsimulidwa. — Sl 94:12; 118:5, 14.
20-26 JANEIRO
CUMA CA M’FALA LA MULUNGU MASALIMO 138-139
Lekani Kulekerera Kuti Mantha Yakutaziseni Kucita Mbali pa Mitsonkhano
Momwe Tingatumbizire Yahova pa Mitsonkhano ya Gwere
10 Kodi m’mimba mwanu mumbabvunduka mukafuna kuimisa boko lanu kuti mupereke mtawiro pa mitsonkhano? Penu bziri tenepo, dziwani kuti ndimwe lini mwekha. Cadidi n’cakuti azinji wa ifepano timbacita mantha tikambapereka mitawiro. Mukanati kumalisa bvuto lanu, cakuyamba mun’funika kuzindikira bzinthu bzomwe bzimbakucitisani mantha mukambapereka mitawiro. Kodi imwepo mumbacita mantha thangwe ra kuyebwa bzomwe mumbafuna kulewa ayai thangwe ra kukumbuka kuti mun’lewa bzinthu bzakuphonyeka? Kodi mumbacita thupo kuti mtawiro wanu un’dzabveka lini bwino ninga momwe winango ambatawirira? Mantha ninga yamweya, yangakhale cizindikiro cabwino. Yangalatize kuti imwepo ndimwe wakubzicepswa nakuti mumbawona winango kukhala wakukuposani. Yahova ambafuna wanthu wa khalidwe limweri. (Psalymo 138:6; Wafiripo 2:3) Koma iye ambafunambo kuti mumutumbize na kulimbisa abale na mpfumakazi zanu pa mitsonkhano. (1 Watesalonika 5:11) Iye ambakufunani ndipo an’dzakupasani cilimbiso cakufunikira.
Bwerani Timbalimbikisane pa Mitsonkhano ya Gwere
7 Pinango nfundo zomwe tidapfunza mu Ntsanza ya Mulindiri m’mbuyomu zingakuthandizeni. Cinthu cibodzi comwe mungacite ndico kumbakonzekera bwino. (Mimwani 21:5) Imwepo mukabvesesa bwino nfundo zomwe mun’kapfunza, bzin’dzakupusirani kuti muimise boko kuti mutawire. Ndipo cinthu cinango, mbaperekani mitawiro yacigwatira. (Mimwani 15:23; 17:27) Imwepo mun’dzacita lini mantha mukadziwa kuti mafala yomwe mun’funa kulewayo ni mang’ono-ng’ono. Mungapereke mtawiro ufupi mwa kundofotokoza nfundo yakufunika, ndipo bzimwebzi bzin’dzathandiza abale kubvesesa bzomwe mwafotokoza kusiyana na mtawiro utali omwe una nfundo zizinji. Mukapereka mtawiro wacigwatira mwa kufotokoza mafala yanu-yanu, imwepo mun’dzalatiza kuti mwakonzekera bwino ndipo mwaibvesesa bwino nkhaniyo.
Cuma Cauzimu
it-1 tsa. 862 ndi. 4
Kulekerera
Bziribe basa kuti ni kangasi komwe wanthu angaticitire bzakuipa, ifepano tin’funika kuwalekerera basi thangwe bzimwebzi ndibzo bzomwe Mkristau an’funika kucita. (Lu 17:3, 4; Aef 4:32; Ako 3:13) Mulungu ambalekerera lini wanthu omwe ambalekerera lini anzawo. (Mat 6:14, 15) Napo kuti “munthu wakuipa” omwe wacita pikado ikulu angacosedwe gwere, na kupita kwa nthawe iye akalatiza kuti wakungula bzacadidi, angalekereredwe. Ndipo gwere lingamulatize pomwe lufoyi munthuyo. (1Ak 5:13; 2Ak 2:6-11) Tsono Akristau ambangingimizidwa lini kuti alekerere wale omwe ambacita pikado utowa acisaya kufuna kukungula. Wanthu amwewa ambakhala anyamadulanthaka wa Mulungu. — Ahe 10:26-31; Sl 139:21, 22.
27 JANEIRO–2 FEVEREIRO
CUMA CA M’FALA LA MULUNGU MASALIMO 140-143
Citani Bzinthu Mwakubverana na Mipembo Yanu
‘Tetekerani Mafala ya Wanthu Wanzeru’
13 Mbawonani kuti malango ni lufoyi la Yahova. Yahova ambafuna kuti bzinthu bzitifambire bwino. (Mimwani 4:20-22) Iye akambatipasa malango mwakuphatisa basa Fala lace, mabukhu yomwe yambafotokoza bza Bibliya yomwe gulu lathu limbapereka ayai Akristau wakukhwima ambakhala akulatiza kuti ambatifuna. Ndipo pa Ahebereu 12:9, 10 pambalewa kuti: “Iye ambacita bzimwebzi kuti bzinthu bzitifambire bwino.”
14 Kumbukirani bwino-bwino malangoyo, sikuti momwe yaperekedwera. Nthawe zinango, ifepano tingawone kuti malango yomwe tapasidwa yalibe kuperekedwa bwino. N’cadidi kuti ali-wentse omwe an’funa kupereka malango, an’funika kucita ciri-centse kuti malango yaceyo yakhale yakusaya kunesa kuyabvuma. (Agalatiya 6:1) Tsono penu tikutambira malango, tingacite bwino kukumbukira bzomwe tingapfunze na malangoyo, napo penu tikuwona kuti yalibe kuperekedwa bwino. Bzibvunzeni kuti: ‘Kodi ciripo comwe ningapfunze na malango yamweya, napo kuti ndiribe kukomedwa na momwe yaperekedwera? Kodi ningaleke kundowona bzomwe ningapfunze na malangoya, sikuti kuphonya kwa omwe andipasa malangoyu?’ Bzingakhale bwino kwene-kwene kwa ifepano kucita ciri-centse kuti tigumane phindu na malango yomwe tapasidwa. — Mimwani 15:31.
w10 15/3 tsa. 32 ndi. 4
Pitirizani Kukhala na “Mtima Wakucena” mu Ntsiku Zakunesa Zino
Atumiki winango wa Yahova ambabonera thangwe ra kutsutsidwa, kusauka na matenda. Ndipo kazinji-kazinji bzimwebzi bzimbawacitisa kuti awawidwe kwene-kwene mu mtima mwawo. Bzinthu ninga bzimwebzi bzidacitikirambo Mambo Davide. Iye adati: “Mphanvu zangu zamala; ndipo mtima wangu ukucita dzanzi.” (Salimo 143:4) Pa nthawe imweyi, n’ciyani comwe cidathandiza Davide kuti apirire? Davide adakumbukira bzomwe Mulungu akhadacitira atumiki wace wa m’mbuyo na bzomwe akhadamucitirambo kale pa moyo wace. Adakumbukira bzomwe Yahova akhadacita kale thangwe ra dzina lace. Davide akhakumbukira kwene-kwene bza mabasa ya Mulungu. (Salimo 143:5) Ifepanombo tikambakumbukira bza Mulengi wathu, bzinthu bzomwe iye adaticitira na bzomwe akuticitira tsapano, tin’dzakwanisa kupirira pomwe tikugumana na mabvuto.
w15 15/3 tsa. 32 ndi. 2
Kodi Mpsakukwanisika Kulowola Ayai Kulowodwa “Kokha mwa Mbuya”?
Nthawe zinango imwepo mungakhale na makumbukidwe ninga yomwe nyakunemba salimo Davide akhanayo, pomwe adati: “Nditawireni mwakamfulumize, imwe Yahova; mphanvu zangu zamala. Lekani kundibisira nkhope yanu.” (Salimo 143:5-7, 10) Pa nthawe zimwezo, mupaseni nthawe Yahova kuti akulatizeni cakulinga comwe anaco na imwepo. Mungacite bzimwebzi mwa kumbawerenga Fala lace, Bibliya, mucimbakumbukira bzomwe mukuwerengabzo. Mukacita tenepoyo, imwepo mun’dzayadziwa bwino malamulo ya Yahova na kukwanisambo kuwona momwe iye akhathandizira wanthu wace m’mbuyomu. Kucita bzimwebzi, kun’dzakucitisani kuti mufune kupitiriza kumukhulupira.
Cuma Cauzimu
it-2 tsa. 1151
Veneno
Mu Njira Yakuyezezera. Pakuti mafala yakunama na magunkha yomwe wanthu wakuipa ambacita bzimbadzonga mbiri ya munthu omwe akumunamizirayo, ndipopa bzimbandendemezeredwa na veneno yakupha ya nyoka. (Sl 58:3, 4) Pakulewa bza wanthu wa magunkha, Bibliya limbati: “Bzomwe bzimbacoka pa miromo yawo, bziri ninga veneno ya nyoka” yomwe imbacokera pa mulomo wace. (Sl 140:3; Aro 3:13) Lirime lakunama, bzipfunziso bzakunama ayai mafala yakudzonga “[mpsakudzala] na veneno yakupha.” — Tiy 3:8.
3-9 FEVEREIRO
CUMA CA M’FALA LA MULUNGU MASALIMO 144-146
“An’kondwa ni Wale Omwe Mulungu Wawo ni Yahova!”
Mibvunzo Yakucokera kwa Anyakuwerenga
2. Mafala yomwe yasanduliziridwa papsaya yakubverana na mafala yentse ya mu Salimo 144. Kuphatisidwa basa kwa fala lakuti “tenepo” pa vesi 12 kukulatiza kuti bzinthu bzentse bzabwino bzomwe bzimbafotokozedwa pa vesi 12 mpaka 14 bzikulewa bza wanthu wakulungama omwe akukumbira kuti ‘apulumusidwe’ kwa wanthu wakuipa (vesi 11). Kucinja kumweku kulipombo pa vesi 15, pomwe pana mafala mawiri yakundendemerana. Mafala mawiri yakuti “an’kondwa” yakulewa bza wanthu abodzi-bodzi omwe “Mulungu wawo ni Yahova!” Mpsakufunikambo kubvekesa kuti mu Bzinembo Bzacihebereu bzakuyambirira akhaphatisa lini basa bzizindikiro, ninga aspas duplas. Ndipopa kuti anyakusandulizira abvesese thandauzo la mafalaya, an’funika kukumbukira momwe yakhanembedwera mu Cihebereu, nkhani yomwe akusandulizirayo na nkhani zinango za m’Bibliya zomwe zikubverana na nkhaniyo.
3. Cinembo comwe casanduliziridwa papsaci cikubverana na mavesi yanango ya m’Bibliya yomwe yambalatiza kuti Mulungu an’dzasimba wanthu omwe mbakukhulupirika. Kusanduliziridwa papsaku kukulatiza kuti Davide akhapenukira lini kuti Mulungu angadadzapulumusa mtundu wa Jirayeri kwa anyamadulanthaka wawo, ndipo patsogolo pace angadadzawasimba mwa kuwacitisa kuti akhale wakukondwa na kucitisambo kuti bzinthu bziwafambire bwino. (Levitiko 26:9, 10; Deuteronomiyo 7:13; Salimo 128:1-6) Mwa ciratizo, Deuteronomiyo 28:4 ambalewa kuti: “Wana wanu an’dzasimbidwa, bzisapo bza m’dziko lanu, wana wa bzifuwo bzanu, wana wa ng’ombe zanu na wana wa mabira yanu.” Mu utongi bwa mwana wa Davide wakucemeredwa Salomau, Ajirayeri akhali wakukondwa ndipo bzinthu bzikhawafambira bwino. Tileke kuyebwa kuti bzinthu bzinango bzomwe bzidacitika mu utongi bwa Salomau, bzimbalatiza momwe moyo un’dzakhalira mu utongi bwa Mesiya. — 1 Amambo 4:20, 21; Salimo 72:1-20.
Pitirizani Kulimbisa Cidikhiro Canu
16 Cidikhiro cakudzakhala na moyo wakusaya kumala ni mphaso yakucokera kwa Mulungu. Ifepano tikudikhirira nthawe yomwe bzimwebzi bzin’dzacitika ndipo tikudziwa kuti bzin’dzacitikadi. Cidikhiro cimweci ciri ninga ndangula thangwe cimbatithandiza kupirira mabvuto, kukhala wakukhulupirika pomwe tikuzunzidwa na kulimbika napo wanthu acifuna kutipha. Ndipo cidikhiroci cirimbo ninga kapaseti thangwe cimbatithandiza kutcenkha nzeru zakuipa kuti ticite bzinthu bzabwino. Cidikhiro cathuci cimbatithandiza kumudziwa bwino Mulungu ndipo cimbatithandizambo kudziwa kuti iye ambatifuna kwene-kwene. Ndipopa tingalewe kuti timbagumana phindu tikalimbisa cidikhiro cathu.
17 Mpostolo Paulo adanembera Akristau wa ku Roma kuti: “Kondwani na cidikhiro canu.” (Aroma 12:12) Paulo akhakomedwa kwene-kwene thangwe akhadziwa kuti akapitiriza kukhala wakukhulupirika, iye angadzakhala na moyo wakusaya kumala kudzulu. Ifepano tin’funikambo kukomedwa na cidikhiro cathu thangwe tikudziwa kuti Yahova an’dzacitadi bzomwe adalewa. Nyakunemba Salimo adalewa kuti: “An’kondwa ni ule . . . omwe ambadikhirira Yahova Mulungu wace, . . . Omwe ambapitiriza kukhala wakukhulupirika nthawe zentse.” — Salimo 146:5, 6.
Kodi Tingagumane Tani Cikondweso Caico?
19 Wanthu ankubonera m’dziko la Sathaniri kwa magole 6000. Ndipo mu nsiku zakumalizira zino, dzikoli ladzala na wanthu omwe mbakubzifuna okha, wakufuna kobiri na bzakutsangalaza. Iwo ambandokumbukira bza iwo wokha ndipo ambaikha bzakufuna bzawo pa mbuto yakuyamba pa moyo wawo. Koma cadidi n’cakuti wanthu amwewa, ambakhala lini wakukondwa. Ndipo mwakusiyana na wanthu amwewa, Bibliya limbati: “An’kondwa ni ule omwe mthandizi wace ni Mulungu wa Djakobo, ule omwe ambadikhirira Yahova Mulungu wace.” — Psalymo 146:5.
20 Ifepano timbafuna kwene-kwene Yahova, ndipo gole liri-lentse, wanthu azinji ambapfunza bza iye na kufika pa kumufunambo. Bzimwebzi, bzinkulatiza kuti Umambo bwa Mulungu bunkutonga ndipo tsapanopa bun’bweresa bzisimbo bzizinji! Tikambacita bzomwe Yahova ambafuna, iye ambakomedwa nafe, ndipo bzimwebzi ndibzo bzomwe bzimbatibweresera cikondweso caico. Wale omwe ambafuna Yahova an’dzakhala wakukondwa mpaka kale-kale! Mu nkhani yakutewerayi tin’cezerana bza makhalidwe yakuipa yomwe yambabwera thangwe ra kukhala wakubzifuna kwene-kwene. Patsogolo pace tin’dzawona momwe makhalidweyo yaliri yakusiyana na makhalidwe yabwino yomwe atumiki wa Yahova anayo.
Cuma Cauzimu
it-1 tsa. 111 ndi. 9
Bzirombo
Bibliya limbalewa kuti tin’funika kumbasamalira bwino bzirombo. Kulewa cadidi, Yahova ndiye omwe adabzipasa moyo na omwe ambabzisamalira. (Mim 12:10; Sl 145:15, 16) Lamulo la Mozeji likhalatiza kuti bzirombo bzikhafunika kusamaliridwa bwino. Bzirombo bzomwe bzasocera bzikagumanidwa bzikhafunika kukaperekedwa kwa mwenekaciro; bzikakhala kuti mtolo omwe bzanyamula ukulemera kwene-kwene, mtoloyo ukhafunika kutsudzulidwa. (Eki 23:4, 5) Akhafunika kubziphatisa basa mwa ntsisi. (Deu 22:10; 25:4) Pakuti wanthu akhambapuma pa Sabudu, bzirombobzo bzikhafunika kumbapumambo. (Eki 20:10; 23:12; Deu 5:14) Bzirombo bzakugopswa bzikhafunika kunyang’aniridwa ayai kupfudzidwa. (Gen 9:5; Eki 21:28, 29) Wanthu akhafunika lini kucitisa kuti bzirombo bza mitundu yakusiyana-siyana bzifambizane. — Lev 19:19.
10-16 FEVEREIRO
CUMA CA M’FALA LA MULUNGU MASALIMO 147-150
Tina Mathangwe Mazinji Yakutumbizira Yahova
Thangwe Ranyi Tin’funika Kumbatumbiza Yahova?
5 Yahova adatsangalaza sikuti kokha Ajirayeri ninga mtundu, koma adatsangalazambo Mjirayeri ali-wense payekha. Yahova ambacita bzibodzi-bodzibzi kuna ifepanombo nsiku zino. Nyakunemba psalymo adalewa kuti Mulungu “ambapoza omwe ana mtima wakusweka; iye ambamanga bzironda bzawo.” (Psalymo 147:3) Tikambaduwala, bwerani timbakhale wakutsimikiza kuti Yahova an’tisamalira. Yahova ambafunisisa kutitsangalaza na kutipoza pomwe tina mtima wakusweka. (Psalymo 34:18; Zaiya 57:15) Iye ambatipasa nzeru na mphanvu kuti tikwanise kulimbana na cineso ciri-cense comwe tingagumane naco. — Tiyago 1:5.
6 Patsogolo pace nyakunemba psalymo adanyang’anisa kudzulu ndipo adalewa kuti Yahova “ambalewenga nyenyezi” ndipo “ambazicemera zense na dzina lace.” (Psalymo 147:4) Iye akhaziwona, koma akhadziwa lini kuti nyenyezizo zikhalipo zingasi. Nsiku zino, masiyentista yambadziwa kuti nyenyezi ziripo mabidyau mazinjisa kudzuluku. Ndipo kudzuluku kuna migwala ya nzou mamidyau na mamidyau! Wanthu angakwanise lini kulewenga nyenyezi zense, koma Mulengi angakwanise. N’cadidi! Mulungu ambadziwa bwino nyenyezi ibodzi na ibodzi mwakuti adazipasa madzina. (1 Wakolinto 15:41) Tenepo, penu iye ambadziwa nyenyezi ibodzi na ibodzi, ndiye kuti iye ambakudziwanimbo imwepo. Iye nthawe zense ambadziwa momwe muliri, momwe munkubvera na bzomwe mumbafunikira!
Thangwe Ranyi Tin’funika Kumbatumbiza Yahova?
7 Yahova ambadziwa mabvuto yomwe munkugumana nayo, ndipo iye ana mphanvu yakukuthandizani. (Werengani Psalymo 147:5.) Pinango mungawone ninga kuti bvuto lanu ndikulu kwene-kwene mwakuti mungakwanise lini kulimbana nalo. Mulungu ambadziwa bzomwe tingakwanise lini, ndipo ‘ambakumbukira kuti ndife pfumbi.’ (Psalymo 103:14) Ifepano ndife wakuperewera, ndipopa timbaphonya mwakubwereza-bwereza, ndipo bzimwebzi bzingatisunamise. Timbabziimba mulandu thangwe ra cinthu cinango comwe tidalewa, cikhumbo cinango cakuipa comwe tikhabva ayai njiru yomwe tikhanayo! Yahova ambaphonya lini na pang’onopo, koma iye ambadziwa momwe timbabvera. — Zaiya 40:28.
Thangwe Ranyi Tin’funika Kumbatumbiza Yahova?
18 Nyakunemba psalymo akhadziwa kuti, Yahova akhadasankhula kale mtundu wa Jirayeri kuti ukhale wanthu wace pakati pa mitundu yense ya pa dziko la pansi. Ndiwo wokha omwe akhatambira ‘fala’ la Mulungu na ‘malamulo yace.’ (Werengani Psalymo 147:19, 20.) Nsiku zino, tina mwayi ukulu wense wa kucemeredwa na dzina la Mulungu. Tinkutenda kwene-kwene kuti timbamudziwa Yahova, tina Fala lace lomwe limbatitsogolera, na kuti tingakhale pa uxamwali bwakulimba na iye. Ninga nyakunemba Psalymo 147, imwepo muna mathangwe mazinji ‘Yakutumbizira Yah!’ na kulimbisa winango kuti ambacitembo bzibodzi-bodzibzo.
Cuma Cauzimu
Pfunzani bza Yahova Kucokera m’Cirengedwe
6 Yahova ambacita bzinthu pa nthawe yace. Mu nthawe ya Ajirayeri pakhana mbalame zinango zomwe zikhambambuluka zicimbayenda ku Norte kwa dziko la Jirayeri kuphampha kwa mwezi wa Fevereiro na pakati pa mwezi wa Maio. Yahova adauza Ajirayeri kuti: “Napo segonya ambadziwa nthawe yace.” (Jeremiya 8:7) Ninga momwe Yahova adaikhiratu nthawe yakuti mbalame zimwezi zimbambuluke, iye adaikhambo nthawe yakuti adzapereke ciyeruzo. Ntsiku zino tikambawona mbalame zikumbuluka timbakhulupira kuti Yahova adaikha “nthawe” kuti amalise uipi bwentse bwa m’dzikoli. — Habakuki 2:3.
17-23 FEVEREIRO
CUMA CA M’FALA LA MULUNGU MIMWANI 1
Maswaka — Kodi Mun’dzatetekera Yani?
Lekani Kubvuma Kuti Cinthu Ciri-cense Cikutaziseni Kudzatambira Mabaibai Yanu
16 Pinango ndimwe tswaka ndipo mumbawona ninga kuti abereki wanu ambakubvesesani lini ayai mbakunesa kwene-kwene. Pinango bzimwebzi bzimbakusunamisani kwene-kwene ndipo pinango mumbabzibvunza penu mun’funadi kutumikira Yahova. Tsono mukasiya Yahova, imwepo mun’dzazindikira kuti palibe munthu omwe ambakufunani kwene-kwene kuposa abereki wanu wacikristau pabodzi na axamwali wanu wa m’gwere.
17 Kumbukirani ibzi: Kodi imwepo mungadadziwa tani kuti abereki wanu ambakufunanidi angadasaya kumbacita namwe thupo? (Wahebereu 12:8) Iwo mbakuperewera, ndipopa nthawe zinango angakusunamiseni na momwe angakupasireni malango. Koma lekani kumbasunama na bzimwebzi. M’mbuto mwace, mbacitani nyongo yakubvesesa bzomwe bzawacitisa kulewa ayai kucita cinthu cinango. Mbakhalani wakugwa mpfuwa ndipo lekani kumbakalipa kwene-kwene. Bibliya limbati: “Munthu wa cidziwiso ambasamala na mafala yace, ndipo munthu wakuzindikira ambakhala wakuderekha.” (Mimwani 17:27) Khalani na cikhumbo cakukhala munthu wakukhwima, omwe ambabvuma malango na kuyaphatisa basa, bziribe basa momwe malangoyo yaperekedwera. (Mimwani 1:8) Ndipo lekani kuyebwa kuti ni mwayi ukulu kwene-kwene kukhala na abereki omwe ambatumikira Yahova. Iwo ambafuna kukuthandizani kuti mudzakhale na moyo wakusaya kumala.
w05 15/2 matsa. 19-20 ndi. 11-12
Kukhotcerera Dzina Lathu Ninga Akristau
11 Kondwesani Mulungu sikuti wanthu. Mpsacibadwa kufuna kudziwisa gulu lomwe timbacita mbali. Wanthu wentse ambafunika kukhala na axamwali na kukhala mu grupo yomwe imbawacitisa kuti abzibve bwino. Wana akafika pa msinkhu wa utswaka ayai akakula angayambe kutewezera bzomwe anzawo ambacita ndipo bzimwebzi bzingawacitise kuyamba kufuna kutewezera wanthu winango na kufuna kuwakondwesa. Tsono dziwani kuti ni nthawe lini zentse zomwe anzathu angatifunire bzabwino. Nthawe zinango iwo ambandofuna kuti munthu acite nawo pabodzi bzakuipa bzomwe akucitabzo. (Mimwani 1:11-19) Mkristau akambabvera anzace omwe akumungingimiza kuti acite bzinthu bzakuipa, kazinji-kazinji ambabisa kuti ni mtumiki wa Yahova. (Salimo 26:4) Mpostolo Paulo adacenjeza kuti: “Lekani kutewezera makumbukidwe ya m’dzikoli.” (Aroma 12:2) Yahova ambatithandiza kuti tikhale wakukhwimika ticileka kutewezera bzomwe wanthu winango ambacita. — Ahebereu 13:6.
12 Penu tikuyamba kutengeka na bzinthu bzomwe wanthu winango ambacita bzomwe bzingaipise dzina lathu ninga Akristau, bzingakhale bwino kukumbukira kuti kukhala wakukhulupirika kwa Yahova ni cinthu cakufunika kwene-kwene kuposa bzomwe wanthu ambakumbuka na kucita. Nfundo yabwino kwene-kwene yomwe imbalewa bza nkhani imweyi iri pa Ekisodo 23:2 pomwe pambati: “Leka kucita bzinthu bzakuipa thangwe rakuti azinji akucita bzimwebzo.” Pomwe Ajirayeri adapenukira kuti Yahova angadakwanirisa piciro lace, Kalebe alibe kubvuma bzomwe Ajirayeriwo akhalewa. Iye akhana citsimikizo centse cakuti mapiciro ya Mulungu njakuthembeka ndipo adasimbidwa thangwe ra kukhwimika kwace. (Numero 13:30; Djoswa 14:6-11) Kodi imwepo muli wakutsimikiza kuleka kutewezera makumbukidwe yomwe wanthu azinji anayo pakufuna kukhotcerera uxamwali bwanu na Yahova?
Cuma Cauzimu
it-1 tsa. 846
Atsiru
Mwakubverana na Bibliya, fala lakuti “atsiru” limbalewa lini bza wanthu omwe ali lini bwino mu msolo, koma limbalewa bza wanthu omwe ambanyoza nzeru yacadidi ndipo ambacita bzinthu bzomwe bzimbapitana na malamulo yakulungama ya Yahova. Mu Cihebereu muna mafala mazinji yomwe yambakhala yakulewa bza wanthu amwewa yomwe ni kesilʹ (“atsiru”; Mim 1:22), ʼewilʹ (“wakupusa”; Mim 12:15), na·valʹ (“dzenga”; Mim 17:7), na lets (“nyakunyoza”; Mim 13:1). Mu Cigerego fala lakuti aʹphron limbathandauza “munthu wakusaya nzeru” (Lu 12:20), a·noʹe·tos “wakusaya nzeru” (Aga 3:1), na mo·rosʹ ‘atsiru’ ayai “wakupusa” (Mat 23:17; 25:2).
24 FEVEREIRO–2 MARÇO
CUMA CA M’FALA LA MULUNGU MIMWANI 2
Thangwe Ranyi Mun’funika Kumbacita Pfunziro Lapamwekha na Mtima Wentse?
‘Pitirizani Kufamba m’Cadidi’
16 Pinango imwepo mumbaneseka kupfunza. Napo bziri tenepo, Yahova akutikumbira kuti ‘tipitirize kunyang’ana’ na ‘kupitiriza kufufudza’ cadidi kuti ticibvesese bwino. (Werengani Mimwani 2:4-6.) Tikacita nyongo yakupfunza, ifepano tin’dzagumana phindu. Pa nkhani yakucita pfunziro la patekha, m’bale Corey adalewa kuti ambapfunza vesi liri-lentse palokha. Iye adafotokoza kuti: “Inepano nimbawerenga mafala ya m’nyantsi ya vesi liri-lentse ndipo nimbawerengambo mareferentsiya na nkhani zinango zakulewa bza nkhaniyo. . . . Kucita bzimwebzi kumbandithandiza kudziwa bzinthu bzizinji!” Penu timbaphatisa basa njira imweyi ayai njira inango, bzentse bziri bwino. Tikambaphatisa basa nthawe yathu pakupfunza, timbalatiza kuti timbatenda cadidi. — Salimo 1:1-3.
Nzeru Yacadidi Ikukuwa
3 Nzeru ni luso lomwe munthu analo lakuphatisa basa bzomwe akudziwa kuti acite bzinthu bzabwino. Tsono, nzeru yacadidi imbathandauza bzinthu bzizinji kuposa bzimwebzi. Bibliya limbalewa kuti: “Kugopa Yahova ni ciyambi ca nzeru, ndipo kudziwa Wakucenesesa ni kubvesesa bzinthu.” (Mimwani 9:10) Ndipopa tikafuna kucita cinthu cikulu pa moyo wathu, tin’funika kumbakumbukira bzomwe Yahova, omwe ni “Mulungu Wakucenesesa,” akufuna kuti ticite. Tingacite bzimwebzi mwakuyamba kuwona bzomwe Bibliya limbalewa pa nkhaniyo na bzomwe mabukhu yathu yambapfunzisa. Tikambacita bzimwebzi, ifepano tin’dzalatiza kuti tina nzeru yacadidi. — Mimwani 2:5-7.
4 Ni Yahova yekha omwe angatipase nzeru yacadidi. (Aroma 16:27) Thangwe ranyi tikulewa tenepoyo? Thangwe lakutoma ndakuti, iye ni Mulengi, ndipo ambadziwa bwino cirengedwe cace. (Salimo 104:24) Laciwiri ndakuti, bzentse bzomwe Yahova ambacita bzimbalatiza kuti iye ana nzeru kwene-kwene. (Aroma 11:33) Lacitatu ndakuti, malango yentse yomwe Yahova ambapereka yambathandiza wanthu wentse omwe ambayaphatisa basa. (Mimwani 2:10-12) Ndipopa, penu tikufuna kukhala na nzeru yacadidi, tin’funika kubvuma kuti Yahova ndiye yekha omwe angati pase malango. Ndipo tin’funikambo kumbathemba nzeru zace tikafuna kucita cinthu.
Maswaka, Limbisani Cikhulupiro Canu
2 Wanthu azinji nsiku zino ambakhulupira lini kuti Mulungu ndiye adatilenga. Penu imwepo ndimwe mtumiki wa Yahova ayai munkupfunza bza iye, nthawe zinango mungadabwe momwe mungalatizire kuti iye ni Mulengi wathu. Bibliya limbatithandiza kuti tikumbukire kucokera pansi pa mtima pa bzomwe timbabva ayai kuwerenga na kumbalikumbukira. Fala la Mulungu limbati: “Kukumbuka bwino kun’dzakunyang’anira.” Mu njira iponi? Kucita bzimwebzi kun’dzakuthandizani kuti mulambe nzeru zomwe n’zacadidi lini ndipo mun’dzalimbisa cikhulupiro canu kuna Yahova. — Werengani Mimwani 2:10-12.
3 Kuti tikhale na cikhulupiro cakulimba kuna Yahova, tin’funika kumudziwa bwino. (1 Timotio 2:4) Tenepo tikambawerenga Bibliya na mabukhu yathu manango, n’bzakufunika kwene-kwene kuima ticimbakumbukira bzomwe bzinkulewedwabzo. Yezerani kubvesesa bzomwe munkuwerengabzo. (Mateu 13:23) Mukambapfunza mu njira imweyi, mun’dzagumana umboni bwakuti Yahova ni Mulengi wathu ndipo Bibliya ndace. (Wahebereu 11:1) Bwerani ticezerane momwe tingacitire bzimwebzi.
Cuma Cauzimu
it-1 tsa. 1211 ndi. 4
Kukhulupirika
Munthu ambakwanisa lini kukhala wakukhulupirika mwa mphanvu zace ayai mwa iye yekha, koma ambakwanisa thangwe ra kuthemba Yahova na cikhulupiro comwe anaco kwa iye na kwa mphanvu yace yakupulumusa. (Sl 25:21) Mulungu akupicira kuti an’dzakhala “cakukhotcera” kwa wale omwe ambacita bzinthu mwakukhulupirika. (Mim 2:6-8; 10:29; Sl 41:12) Thupo lawo lakufuna kukondwesa Mulungu limbawacitisa kuti akhale wakugwa mpfuwa acifamba mu njira yabwino yomwe imbawacitisa kuti akwanisire cakulinga cawo. (Sl 26:1-3; Mim 11:5; 28:18) Djobi adakwanisa kuwona kuti napo kuti munthu wakusaya kuphonya angabonere thangwe ra utongi bwakuipa acifa pabodzi na wanthu wakuipa, Yahova ambatsimikizira kuti ambadziwa bzomwe bzikucitika pa moyo wa munthu wakusaya kuphonyayo ndipo ambamutsimikizirambo kuti tsogolo lace lin’dzakhala la mtendere ndipo an’dzatambira bzinthu bzabwino. (Djb 9:20-22; Sl 37:18, 19, 37; 84:11; Mim 28:10) Ninga momwe bzidacitikira na Djobi, comwe cimbacitisa kuti munthu akhale wakufunika na wakuthemera kulemekezedwa ni kukhulupirika kwace sikuti cuma cace. (Mim 19:1; 28:6) Wana omwe ana pai ayai mai omwe ngwakukhulupirika, ambakhala wakukondwa (Mim 20:7), ambatambira utaka bwabwino bomwe ni ciratizo cabwino ca pai wawo, ambakondwa thangwe ra mbiri yabwino ya pai wawoyo pabodzi na ulemu.