Gwere Lidawalatiza Lufoyi

YOMARA na azibale wace awiri, Marcelo na Hiver, ambakhala ku mudzi unango ku Guatemala. Yomara adayamba kupfunza Bibliya na Mboni za Yahova ndipo patsogolo pace abale wacewo adayamba kupfunzambo. Tsono pakhana bvuto. Wentsenewo akhali azimola ndipo akhadziwa lini kuwerenga cirewedwe ca azimola. Mpfunzisi wawo ndiye omwe akhambawawerengera nkhani zomwe akhapfunza na mavesi ya m’Bibliya.

Tsono pakhana bvuto pomwe linango. Iwo akhakwanisa lini kuyenda ku Nyumba ya Umambo okha. Abale adacita makonzedwe yakuti ambawatenge acimbayenda nawo ku mitsonkhanoko. Pomwe iwo adayamba kutambira mbali pa mitsonkhano ya pakati pa sumana, abale akhambawathandiza kuti akonzekere bwino mbali zawozo.

M’mwezi wa Maio, 2019, mitsonkhano idayamba kumbacitikira komwe iwo akhakhalako. Pa nthawe yimweyi, banja linango lomwe likhali apainiya lidayenda kukakhala kumweko. Banjalo lidayamba kuwapfunzisa cirewedwe ca azimola, napo kuti bzikhali bzakunesa kucita bzimwebzo. Iwo adayamba kuwerenga mabukhu ya bzomwe angacite kuti apfunzise munthu omwe ni zimola.

Pomwe padandopita minyezi ming’ono-ng’ono, Yomara pabodzi na azimano wace adayamba kuwerenga cirewedwe ca azimola ndipo bzimwebzi bzidacitisa kuti iwo adziwe bzinthu bzizinji bza uzimu. Tsapano Yomara na azimano wace akutumikira ninga apainiya wakukhazikika. Marcelo ni mtumiki wakuthandiza. Iwo ambacita bzinthu bzizinji kwene-kwene pakutumikira Yahova. Bzimwebzi bzikucitisa kuti wanthu winango awatewezerembo.

Yomara na azimano wace akutenda kwene-kwene lufoyi lomwe gwere lidawalatiza. Yomara adalewa kuti: “Kuyambira pomwe tidagumana na Mboni za Yahova izo zidatilatiza lufoyi lacadidi.” Ndipo Marcelo adalewambo kuti: “Timbacita mbali ya gulu la abale wa pa dziko lentse omwe ana lufoyi.” Yomara na azimano wace akudikhirira na mtima wentse pomwe dziko lentse lin’dzakhala paraizo. — Salimo 37:10, 11; Zaiya 35:5.