Thandizani Azimola Kupfunza bza Yahova
1. Kodi Jezu adalatiza tani nsisi kuna azimola?
1 Zikhadasala nsiku zing’onong’ono kuti Jezu afe. Pomwe iye akhayenda mu mzinda wa Jeriko, azimola awiri adayamba kukuwa acimbati: ‘Mbuya, tibverenimbo nsisi!’ Napo Jezu akhambakumbukira mabvuto yomwe yakhamudikhirira, iye adaima, ndipo adawacemera amunawo aciwapolesa. (Mat. 20:29-34) Kodi tingatewezere tani nsisi za Jezu pomwe tinkuthandiza azimola?
2. Kodi tingakwanise tani kupereka umboni kwa zimola omwe tingagumane naye mu mbuto zomwe zimbakhala na wanthu azinji?
2 Khalani Wakuthandiza: Mukagumana munthu omwe ni zimola, pinango pa mbuto yomwe ina wanthu azinji, yambani ndimwe kubzidziwikisa ndipo bziperekeni kuti mumuthandize. Napo wanthu wamwewa kawiri-kawiri ambafulumiza kuzindikira bzinthu, pa ulendo bwakuyamba angakupenukireni. Tsono, kukhala kwanu munthu wakufikirika na kumulatiza thupo cairo, bzingamuthandize kukhala wakutsudzuka. Mbakumbukirani kuti pana kusiyana-siyana kwa bvuto lakusaya kuwona ndipo bzimwebzi bzingakuthandizeni kuzindikira momwe mungamuthandizire. Pambuyo pakuti mwamuthandiza, pinango mungamuuze kuti imwepo mumbacita basa lakuthandiza wanthu kupfunza Bibliya. Muwerengereni vesi libodzi, ninga la Psalymo 146:8 ayai Zaiya 35:5, 6. Penu iye angakwanise kuwerenga bzinembo bza azimola, mungamubvunze penu angafune mabukhu ya bzinembo bza azimola yomwe yangamuthandize kupfunza bzinthu bzizinji bza m’Bibliya. Mungamuthandizembo iye kugumana nkhani zakucita kubvesera pa jw.org. Penu komputadori yanu imbakwanisa kuwerenga mwakucita kubveka, iye angakomedwe na mabukhu yakudindidwa ya pa jw.org pabodzi na mabukhu yomwe yangacosedwe mu mtundu wa RTF (Rich Text Format).—Onani kwadru ya msolo wakuti “Pakuthandiza Zimola . . .”
3. Kodi tingawanyang’ane tani azimola mu gawo lathu?
3 Nyang’anani Azimola: Timbagumana lini azimola kawiri-kawiri pa kucita upalizi bwa nyumba na nyumba thangwe azinji wa iwo ambabva lini bwino kulewalewa na munthu wakusaya kumudziwa omwe wabwera panyumba zawo. Na tenepo, mpsakufunika nyongo kuti ‘tinyang’ane’ wanthu amwewa kuti tiwapalizire. (Mat. 10:11) Kodi munaye mwanzanu wa basa ayai wakuxikola omwe ni zimola? Yambani ndimwe kuceza naye. Penu mu dera lanu muna xikola ya azimola, perekani yanango mwa mabukhu yathu ya bzinembo bza azimola ku nyumba ya mabukhu ya paxikolayo. Kodi imwepo mumbadziwa banja liri-lense lomwe lina zimola? Kodi gawo lanu lina gulu lakupereka cithandizo kuna azimola ayai kuna nyumba zakufuwira azimola? Fotokozerani banja lacero, munthu nyakutambira alendo ayai director kuti Mboni za Yahova zinkufunisisa kuthandiza azimola, ndipo gawirani mabukhu ya bzinembo bza azimola ayai ma audio. Mulatizeni mapiciro ya m’Bibliya yakuti tsapanopapa Mulungu an’dzamalisiratu bvuto lakusaya kuwona. Mungamulatizembo vidiyo yakugumanika pa jw.org ya msolo wakuti “Sem Ela, eu me Sentiria Perdido,” yomwe imbafotokoza cakucitika ca munthu m’bodzi zimola omwe adagumana phindu thangwe ra kukhala na Bibliya la bzinembo bza azimola. Mwa kufotokoza cakulinga ca kumuzungira kwanu, bzimwebzi bzingapereke mpata wakuceza na azimola.
4. Kodi tingapfunze ciyani pa bzomwe bzidacitikira Janeti?
4 Mpfumakazi inango dzina lace Janeti idakazungira nyumba zomwe zimbakhalidwa na azimola. Iyo idayamba kuceza na mtsikana m’bodzi. Janeti adamuuza kuti, “Jezu adapoza azimola, kuti awonese bzomwe iye an’dzacita kuna wense womwe mbazimola.” Iwo adacezerana Cibvumbulutso 21:3, 4, ndipo Janeti adamufotokozera momwe Umambo bwa Mulungu bun’dzakwanisira mapiciro yamweya. Mkaziyo adakhala mwakudereka ndipo adadzalewa kuti: “Ndikhanati kubva bzinthu ninga bzimwebzi kuna azimola. Wanthu azinji womwe ambawona ambakhulupira kuti munthu ambakhala zimola thangwe ra bzinthu bzinango bzomwe iye ayai anyamuya wace adacita.” Janeti adatumizira mkaziyo pa e-mail bukhu la Baibulo Limaphunzitsa Chiyani, ndipo tsapano iwo wankupfunza Bibliya pabodzi kawiri pa mdzinga.
5. Napo tingakwanise lini kupoza munthu omwe ni zimola ninga momwe Jezu adacitira, kodi kulatiza thupo kuna zimola kun’dzabweresa bzisimbo bziponi?
5 N’cadidi kuti tingakwanise lini kucitisa azimola kuyamba kuwona ninga momwe Jezu adacitira, koma tingathandize wanthu wense womwe mulungu wa mkonzedwe uno wa bzinthu adawacitisa kukhala azimola m’bzakukumbuka, kuphatanidza wanthu omwe ambawonadi lini kuti abvesese cadidi ca Fala la Mulungu. (2 Wak. 4:4) Jezu adapoza amuna awiri kufupi na Jeriko thangwe iye ‘adabva nsisi.’ (Mat. 20:34) Tikambalatizambo thupo kwa zimola, tingapfatse na mwayi wa kuthandiza munthu kuti apfunze bza Yahova, omwe an’dzamalisiratu bvuto lakusaya kuwona.
[Kwadru pa tsamba 3]
Pakuthandiza Zimola . . .
• Mbalewalewaniletu naye ndimwe, koma lekani kumbakuwa kwene-kwene. Zimola angakwanise lini kuwona, koma iye angakwanise kubva bwino-bwino.
• Futhulani boko lanu ndipo penu imwepo munkumuperekeza mulekeni iye aphate boko lanu pafupi na kakonokono kanu. Iye an’dzakwanisa kutewera pomwe imwepo munkufamba pang’ono-pang’ono kutsogolo kwace. Mukawona cinthu ciri-cense cakuphingiza kutsogolo kwace bzin’funika kumudziwisa.
• Mungatsudzuke kuphatisa basa mafala yakufotokoza bza kuwona, ninga yakuti “nyang’anisa” na “ona”. Azimola ambayaphatisambo basa. Iwo “ambawona” mwanjira inango, ndipo angakhale na cithunzithunzi mu makumbukidwe yawo ca bzinthu bzomwe bzinkufotokozedwabzo.
• Kucezeranako kucitike pa mbuto yakusaya baludya. Azimola kawiri-kawiri ambakhala lini wakutsudzuka pa mbuto yomwe pana baludya, ndipo bzimbakhala bzakunesa kuti azindikire kuti n’ciyani cinkucitika pafupi na iwo.
• Muuzeni kuti munkuyenda. Bzimwebzi bzin’dzamuthandiza kuti iye aleke kucita manyazi thangwe ra kulewalewa na munthu omwe wayenda kale.
• Dzazani formulario yakuti Muzungireni Munthuyu (S-43) mucipasa munembi, penu zimolayo ankufunisisa koma ambakhala lini mu dera lanu.