Jezu Adapoza Munthu Omwe Adabadwa Zimola

Jezu akhali ku Jeruzalemu pa nsiku ya Malinkhuma. Pomwe iye pabodzi na anyakupfunza wace akhafamba mu mzinda wa Jeruzalemuyo, iwo adawona munthu nyakuphempheza omwe akhadabadwa zimola. Anyakupfunzawo adabvunza Jezu kuti: ‘Rabi kuti munthuyu abadwe zimola, mbani omwe adaphonya, ngumweyu ayai abereki wace?’—Juwau 9:2.

Anyakupfunzawo akhadziwa kuti munthu ambakhala lini na mzimu omwe umbakhala na moyo kumbuto kwinango pomwe munthuyo akanati kubadwa, koma pinango iwo akhabzibvunza kuti munthu angaphonye pomwe akali m’mimba mwa mai wace. Jezu adawatawira kuti: ‘Ne munthuyu ne abereki wace, wensenewa alibe kuphonya, koma bziri tenepa kuti mabasa ya Mulungu yawonekere mwa munthuyu.’ (Juwau 9:3) Tenepo, munthuyo alibe kubadwa zimola thangwe iye ayai abereki wace adaphonyesa cinthu cinango. Koma thangwe ra kuphonya kwa Adamu, wanthu wense ambabadwa wakuperewera ndipo angakhale cirema ninga kubadwa zimola. Tsono kubadwa zimola kwa munthuyo kudapasa mpata Jezu wakuwonesa mabasa ya Mulungu, ninga momwe adacitira pakupoza wanthu winango wakuduwala.

Jezu adalewa kuti basali likhafunika kucitidwa mwakamfulumize. Iye adati: ‘Tin’funika kucita mabasa ya ule omwe adandituma pomwe yakali masikati, bunkufika usiku, pomwe palibe omwe angadzaphate basa. Pomwe ine ndikali pansi pano, inepano ndine ceza ca dzikoli.’ (Juwau 9:4, 5) Jezu adalewa mafala yamweya, thangwe akhadziwa kuti akhadasala pang’ono kuphedwa, tsono infayo ingadakhala ninga kuti wathusidwa mu mdima thangwe angadakwanisa lini kuwona ayai kucita cinthu ciri-cense. Koma pomwe akhana moyo Jezu akhali ceza ca dziko.

Kodi Jezu adathandiza tani munthuyo? Jezu adapsipira pansi ndipo adamunya mataka na mata yaceyo. Patsogolo pace adanyatika matakayo m’maso mwa zimolayo acimuuza kuti: ‘Ndoko ukasambe mu thawale la ku Sirowe.’ (Juwau 9:7) Munthuyo adabvera ndipo adacitadi bzimwebzo. Atamala kusamba iye adayamba kuwona. Ndokumbukirani momwe iye adakondwera, pomwe adawona kakuyamba pa moyo wace!

Anyakufendererana nawo nyumba pabodzi na wanthu winango akhadziwa kuti iye akhali zimola ndipo adadabwa na bzimwebzi. Tenepo, iwo adayamba kubvunzana kuti: ‘Kodi umweyu ndiye lini ule omwe akhambakhala pansi acimbaphempheza?’ Ndipo winango adayamba kulewa kuti: ‘Ndiye inde.’ Tsono winango alibe kukhulupira bzimwebzi ndipo adalewa kuti: ‘Ndiye lini, koma andotengana.’ Koma munthuyo adatawira yekha kuti: ‘Ndinepanodi.’—Juwau 9:8, 9.

Tenepo, iwo adayamba kumubvunza kuti: ‘Tsono maso yakoya yafunguka tani?’ Iye adawatawira kuti: ‘Munthu munango wakucemeredwa Jezu, adamunya mataka, ndipo adayanyatika m’maso mwangumu, acindiuza kuti: “Ndoko ukasambe mu thawale la ku Sirowe.” Inepano ndidayendadi kukasamba mu thawalemo, ndipo ndidayamba kuwona.’ Iwo adamubvunza kuti: ‘Kodi alikuponi munthu umweyo?’ nyakuphemphezayo adawatawira kuti: ‘Ndin’dziwa lini.’—Juwau 9:10-12.

Wanthuwo adayenda naye munthuyo kwa Afarizeu, omwe akhafunambo kudziwa bzomwe bzikhadacitika kuti ayambe kuwona. Iye adawauza kuti: ‘Iye adanyatika mataka m’maso mwangumu, ndicikasamba ndipo tsapano ndinkukwanisa kuwona.’ Afarizeuwo akhafunika kukondwa pakuwona kuti munthu omwe akhali zimola ule, tsapano ankuwona. Tsono m’mbuto mwa kukondwa, iwo adayamba kunyoza Jezu, acimbalewa kuti: ‘Munthu umweyo alibe kucokera kwa Mulungu, thangwe ambasunga lini nsiku ya Malinkhuma.’ Koma wanthu winango adalewa kuti: ‘Kodi bzingakwanisike tani kuti munthu wapikado acite bzakudabwisa ninga bzimwebzi?’ (Juwau 9:15, 16) Tenepo, wanthuwo adakhala wakugawanika.

Thangwe ra kusiyana makumbukidweku, wanthuwo adabvunza munthu omwe adayamba kuwonayo kuti: ‘Kodi ungatiuze ciyani bza iye, pakuti iye wafungula maso yakoya?’ Iye akhapenukira lini pakulewa bza Jezu, ndipo adatawira kuti: ‘Iye ni mpolofeta.’—Juwau 9:17.

Ajudawo adalamba kukhulupira bzimwebzo. Ndipo iwo akhakumbuka kuti Jezu adacita mpangano na munthu omwe akhali zimola ule kuti ambauze wanthu kuti wayamba kuwona thangwe Jezu wamupoza. Tsono iwo adawona kuti njira ya bwino yakumalisira nkhaniyo ikhali kubvunza abereki wa nyakuphemphezayo penu mwana wawoyo adabadwadi zimola.