Kodi Mukukumbukira?

Kodi imwepo mwawerenga bwino-bwino nkhani za gole lino mu Ntsanza ya Mulindiri? Penu mun’ti inde, yezerani kutawira mibvunzo iri m’nyantsiyi:

Kodi ‘kucinja makumbukidwe yathu’ kumbathandauza ciyani? (Aroma 12:2)

Kucinja nzeru kumbathandauza lini kundokhala munthu wabwino pa bzinthu bzing’ono-ng’ono basi. Koma kumbathandauza kupitiriza kucinja makhalidwe yathu tikawona kuti yakubverana lini na bzomwe Yahova ambafuna. — w23.01, matsa. 8-9.

Kodi tingacite tani bzinthu mwacikati-kati pomwe tikuwona bzakucitika bza m’dzikoli?

Tikufunisisa kudziwa momwe bzakucitika bza m’dzikoli bzikukwanirisira mapolofesiya. Tsono m’mbuto mwa kumbalewa bzinthu bza mu msolo mwathu, bzomwe bzingacitise kuti gwere lireke kukhala lakubverana, bzingakhale bwino kumbacezerana nfundo za m’mabukhu yomwe yambakonzedwa na gulu la Yahova. (1 Akolinto 1:10) — w23.02, tsa. 16.

Kodi ubatizo bwa Jezu budasiyana tani na bwa ateweri wace?

Pakuti Jezu adabadwira mu mtundu wa wanthu omwe akhali wakubzipereka kale kwa Mulungu, iye akhafunikira lini kubzipereka kwa Yahova ninga momwe ifepano timbacitira. Jezu akhali munthu wakulungama ndipo akhalibe pikado. Iye akhafunikira lini kukungula pikado zace. — w23.03, tsa. 5.

Kodi mungacite tani kuti winango ambaperekembo mitawiro pa mitsonkhano?

Comwe tingacite ndico kupereka mitawiro yathu mwacigwatira kuti tipase mpata anzathu kuti atawirembo. Ndipo tin’funikambo kumbatcenkha kumbalalewa bzinthu bzizinji. Tikacita tenepoyo, anzathu an’dzawonambo bzakutawira. — w23.04, tsa. 23.

Kodi “Mseu Wakucena” omwe umbalewedwa pa Zaiya 35:8 umbathandauza ciyani?

Mseu wakuyezezerayu cakuyamba ukulewa bza mseu omwe Adjuda adauphatisa basa pomwe akhacokera ku Babiloniya kuyenda ku dziko lawo. Tanimbo ntsiku zathu zino? Pomwe gole la 1919 likhanati kufika, basa lakukonza njira lidayamba kucitika, lomwe likhali kusandulizira, kudinda Bibliya na bzinthu bzinango. Wanthu wa Mulungu akhala akufamba mu “Mseu Wakucena” omwe umbawatsogolera ku paraizo wauzimu, omwe umbacitisa kuti atambire bzisimbo bza Umambo bwa Mulungu. — w23.05, matsa. 15-19.

Kodi Mimwani kapitulo 9 ambafotokoza bza malango yaponi ya akazi awiri wakuyezezera?

Mimwani ambalewa bza “mkazi wakusaya nzeru” omwe mcemo wace umbayendesa ku “infa” ndipo “nzeru yacadidi,” ikuyezezeredwa na mkazi omwe mcemo wace umbacitisa kuti wanthu “abvesese bzinthu” ndipo umbapasa moyo. (Mimwani 9:1, 6, 13, 18) — w23.06, matsa. 22-24.

Kodi Mulungu adalatiza tani ntsisi na kubzicepesa pomwe akhacita bzinthu na Loti?

Yahova adauza Loti kuti acoke mu mzinda wa Sodoma acithawira ku mapiri. Tsono Loti adakumbira Yahova kuti athawire ku mzinda wa Zoari m’mbuto mwa kuthawira ku mapiri, Yahova adabvuma mkumbiro waceyo. — w23.07, tsa. 21.

N’ciyani comwe mkazi angacite penu mwamuna wace ambawona Pornografia?

Iye an’funika lini kumbabzipasa mulandu pa bzomwe bzacitikabzo. Iye an’funika kulimbisa uxamwali bwace na Yahova na kumbakumbukira bziratizo bza akazi omwe adatsangalazidwa na Yahova. Iye angathandize mwamuna wace kuti atcenkhe kuwona pomwe pornografia. — w23.08, matsa. 14-17.

N’ciyani comwe cin’dzatithandiza kudziwa momwe tingatawirire wanthu omwe akuticita mibvunzo pa nkhani ya bzomwe timbakhulupira?

M’mbuto mwakukumbuka kuti mbvunzo omwe munthuyo wapereka ukulatiza kuti akukunyozani, imwepo mun’funika kukumbukira momwe mbvunzo waceyo ungakuthandizireni kudziwa bzomwe iye akukumbuka. Bzingakhale bwino kumutawira mwakuderekha. — w23.09, tsa. 17.

Kodi tingapfunze ciyani na Mariya pa nkhani yakupasidwa mphanvu na wanthu winango?

Pomwe Mariya adadziwa kuti angadakhala mai wa Mesiya, iye adakhala na mphanvu thangwe ra kuthandizidwa na wanthu winango. Gabriyeli na Elizabeti adalimbisa Mariya mwakuphatisa basa Bzinembo. Ifepanombo tingakhale na mphanvu mwakuthandizidwa na abale wathu wacikristau. — w23.10, tsa. 15.

Kodi Yahova angatawire tani mipembo yathu?

Iye akupicira kuti an’dzatetekera mipembo yathu na kuwona momwe iyo ikubveranira na cakulinga cace. (Jeremiya 29:12) Iye angatawire mipembo yakundendemerana mu njira zakusiyana, tsono nthawe zentse an’dzatithandiza. — w23.11, matsa. 21-22.

Aroma 5:2 ambalewa bza “cidikhiro,” tsono thangwe ranyi cidikhiroco cimbalewedwa pomwe pa vesi 4?

Mwa kubva mafala yabwino, munthu angakhale na cidikhiro ca kudzakhala na moyo wakusaya kumala m’paraizo pa dziko la pantsi. Pomwe tikugumana na mabvuto kupirira na kuwona kuti Mulungu ambatifuna kun’dzalimbisa cidikhiro cathu. — w23.12, matsa. 12-13.