Kodi Imwepo Muna Cikhulupiro?

Kuti ifepano tikondwese Yahova tin’funika kukhala na cikhulupiro. Tsono, Bibliya limbalewa kuti “ni wanthu lini wentse omwe ambakhala na cikhulupiro.” (2 Atesalonika 3:2) Pomwe mpostolo Paulo akhalewa mafala yamweya, iye akhalewa bza “wanthu omwe ambapweteka anzawo na wakuipa,” ayai wanthu omwe akhamuzunza. Tsono bzomwe iye adalewa pakulewa bza cikhulupiro bzimbaphatanidzambo wanthu winango. Wanthu winango ambalamba utowa kukhulupira kuti kuna Mulungu omwe ni Mulengi wa bzinthu bzentse napo aciwona umboni bwakuti iye alipo. (Aroma 1:20) Winango angalewe kuti ambakhulupira kuti kuna cinthu cinango ayai munthu munango wamphanvu. Tsono bzimwebzi mpsakukwanira lini kuti tikondwese Mulungu.

Tin’funika kukhala na citsimikizo cakuti Yahova alipo ndipo iye “ambabaira” wanthu omwe ambamukhulupira. (Ahebereu 11:6) Cikhulupiro ni khalidwe lomwe limbacita mbali ya bzisapo bzomwe mzimu wakucena umbabala. Kuti tikhale na mzimu wakucena tin’funika kupemba kwa Yahova kuti atipase mzimuyo. (Luka 11:9, 10, 13) Njira inango yakufunika kwene-kwene ya momwe tingatambirire mzimu wakucena ndiyo kuwerenga Fala la Mulungu, Bibliya. Ndipo mpsakufunikambo kukumbukira bzomwe tikuwerengabzo na kubziphatisa basa. Tikacita bzimwebzi, timbabvuma kuti mzimu wa Yahova utithandize kukhala na moyo wakubverana na cikhulupiro comwe cimbamukondwesa.