Thembani Yahova Ninga Tsendwa Lanu

1. Mwakubverana na Salimo 18:46, kodi Mambo Davide adandendemezera Yahova na ciyani?

IFEPANO tikukhala mu dziko lomwe mabvuto yangacinje moyo wathu kabodzi na kabodzi. Tsono timbatenda kwene-kwene Yahova thangwe rakuti iye ambatithandiza! Mu nkhani idapita ire, tidakumbusidwa kuti Yahova ni Mulungu wamoyo ndipo iye nthawe zentse ngwakukonzeka kutithandiza. Iye akatithandiza timbakwanisa kutsimikizira kuti “Yahova ni Mulungu wamoyo!” (Werengani Salimo 18:46.) Tsono pomwe Mambo Davide adamala kulewa bzimwebzi, iye adacemera Yahova kuti “Tsendwa langu.” Thangwe ranyi iye adandendemezera Yahova Mulungu wa moyo na cinthu cakusaya moyo comwe ni tsendwa?

2. Kodi tin’pfunza ciyani mu nkhani ino?

² Mu nkhani ino, tiniwona kuti n’thangwe ranyi Yahova ambacemeredwa tsendwa ndipo tiniwonambo kuti bzimwebzi bzimbatipfunzisa ciyani pakulewa bza iye. Ndipo tin’pfunza kuti n’thangwe ranyi tin’funika kuthemba Yahova ninga Tsendwa lathu. Pakumalizira, tiniwona momwe tingatewezerere makhalidwe ya Yahova.

THANGWE RANYI YAHOVA NI TSENDWA?

3. Kodi nthawe zinango Bibliya limbaphatisa basa fala lakuti “tsendwa” pakufuna kulewa bza yani? (Onani pa tsamba lakuyamba.)

³ Bibliya limbandendemezera Yahova na “tsendwa” kuti litithandize kuyadziwa bwino makhalidwe yace. Kazinji-kazinji atumiki wa Yahova wakale-kale akafuna kutumbiza Yahova thangwe ra makhalidwe yace yakudabwisa, iwo akhambalewa kuti iye ni tsendwa. Mbuto yakuyamba yomwe Yahova ambacemeredwa kuti “Tsendwa” ni pa Deuteronomiyo 32:4. Mu mpembo wace, Ana adalewa kuti “palibe tsendwa lakundendemerana na Mulungu wathu.” (1 Samuyeli 2:2) Habakuki adacemera Yahova kuti “Tsendwa langu.” (Habakuki 1:12) Nyakunemba Salimo 73 adacemera Yahova kuti “tsendwa la mtima wangu.” (Salimo 73:26) Ndipo napo Yahova caiyeyo adabzilewa kale yekha kuti ni Tsendwa. (Zaiya 44:8) Mbatiwoneni makhalidwe matatu yomwe yambacitisa Yahova kuti akhale ninga tsendwa. Ndipo tin’pfunza momwe tingambamuwonere ninga “Tsendwa lathu.” — Deuteronomiyo 32:31.

4. Kodi Yahova ni mbuto yakuthawira mwa njira iponi? (Salimo 94:22)

⁴ Yahova ni mbuto yathu yakuthawira. Pa nthawe ya cimphepo ca mphanvu tingakhale wakukhotcerereka tikathawira mu cimphako ca mwala. Mwakundendemerana na bzimwebzi, tikagumana na mabvuto pa moyo wathu Yahova angatikhotcerere. (Werengani Salimo 94:22.) Yahova an’dzatithandiza kuti tikhotcerere uxamwali bwathu na iye. Iye ambatitsimikizira kuti palibe mabvuto yomwe timbagumana nayo tsapano yomwe yangatidzonge mpaka kale-kale. Ndipo iye akupicira kuti kutsogolo an’dzacosa cinthu ciri-centse comwe cimbaticitisa kuti tibonere ayai kuticitisa thupo. — Ezekiyeli 34:25, 26.

5. Kodi Yahova angakhale tani mbuto yathu yakuthawira?

⁵ Njira ibodzi yomwe timbalatizira kuti Yahova ni mbuto yathu yakuthawira ndiyo kucita mpembo kwa iye. Tikapemba kwa Yahova, iye ambatipasa “mtendere wace” omwe umbakhotcerera mitima yathu na makumbukidwe yathu. (Afilipi 4:6, 7) Onani bzomwe bzidacitikira m’bale Artem, omwe adamangidwa thangwe ra cikhulupiro cace. Nyakufufudza nkhani munango mkali adamubvunza kazinji-kentse, ndipo adamuboneresa na kumupasisa manyazi. Artem adalewa kuti: “Nyakufufudza nkhaniyo akandicemera ndikhacita thupo kwene-kwene. . . . Nthawe zentse ndikhambapemba kwa Yahova kuti andipase mtendere wa mu mtima nakuti andipasembo nzeru. Napo nyakufufudza nkhaniyo akhandicita bzimwebzi, ine ndidapitiriza kukhala wakuderekha. . . . Na thandizo la Yahova, bzidakhala ninga kuti ndikhadaima kukhonde kwa parede ya minyala.”

6. Thangwe ranyi nthawe zentse tingathembe Yahova? (Zaiya 26:3, 4)

⁶ Yahova ngwakuthembeka. Ninga phiri ayai tsendwa lomwe lingacoke lini pa mbuto yace, Yahova ambacinja lini ndipo ngwakukonzeka kutithandiza. Tin’funika kumuthemba thangwe iye ni “Tsendwa lakusaya kumala.” (Werengani Zaiya 26:3, 4.) Yahova nthawe zentse an’dzakhala alipo kuti ateweze mapiciro yace yentse, kutetekera mipembo yathu na kutithandiza pa bzomwe tingafunikire. Ifepano tingathembe Yahova thangwe iye ngwakukhulupirika kwa wale omwe ambamutumikira. (2 Samuyeli 22:26) Iye an’dzayebwa lini bzinthu bzentse bzomwe timbamucitira ndipo an’dzatisimba thangwe ra bzimwebzi. — Ahebereu 6:10; 11:6.

7. Tikathemba Yahova, n’ciyani comwe cin’dzacitika? (Onani cithunzi-thunzi.)

⁷ Ifepano timbacitisa kuti Yahova akhale Tsendwa lathu tikambamukhulupira na mtima wentse. Tina citsimikizo cakuti tikambamubvera napo pa nthawe za mabvuto, bzinthu bzin’dzatifambira bwino. (Zaiya 48:17, 18) Tikambawona momwe Yahova akutithandizira, ni pomwe timbamukhulupirambo kwene-kwene ndipo timbakhala na citsimikizo centse cakuti ndiye yekha omwe angatithandize kupirira mabvuto yali-yentse napo yacikhala yakunesa. Napo tikagumana na bvuto lomwe tikuwona kuti palibe munthu munango kuti atithandize, timbazindikira kuti tin’funika kuthemba Yahova. Bzimwebzi ndibzo bzomwe m’bale Vladimir adacita. Iye adalewa kuti: “Nthawe yomwe ndidamala ndiri m’kawoko ndidalimbisa kwene-kwene uxamwali bwangu na Yahova. Inepano ndidapfunza kuthemba kwene-kwene Yahova thangwe ndikhali ndekha ndipo palibe munthu ali-wentse omwe angadandithandiza.”

8. (a) Thangwe ranyi tingalewe kuti Yahova ambacinja lini? (b) Kodi ni phindu liponi lomwe timbakhala nalo tikambawona Yahova ninga Tsendwa lathu? (Salimo 62:6, 7)

⁸ Yahova ambacinja lini. Ninga tsendwa likulu, makhalidwe na cakulinga ca Yahova bzimbacinja lini. (Malakiya 3:6) Pomwe Adamu na Eva adamupandukira, iye alibe kucinja cakulinga cace. Mpostolo Paulo adalewa kuti Mulungu “angabzilambe lini yekha.” (2 Timotio 2:13) Bzimwebzi bzikuthandauza kuti bziribe basa bzomwe bzicitike ayai bzomwe wanthu angacite, Yahova ambacinja lini momwe ambacitira bzinthu, ambacinja lini bzakulinga bzace ayai mitemo yace. Ifepano tingakhulupire Mulungu omwe ambacinja lini ticikhala na citsimikizo cakuti iye an’dzatithandiza pa nthawe zakunesa nakuti iye an’dzakwanirisa mapiciro yace yentse yakutsogolo. — Werengani Salimo 62:6, 7.

9. Kodi mwapfunza ciyani na bzomwe bzidacitikira Tatyana?

⁹ Tikambakumbukira bza makhalidwe ya Yahova na cakulinga cace timbamuwona Yahovayo kuti ni Tsendwa lathu na Munthu caiye. Bzimwebzi bzin’dzatithandiza kukhala wakugwa mpfuwa na kupitiriza kukhala wakukhulupirika pa nthawe zakunesa. (Salimo 16:8) Bzimwebzi ndibzo bzomwe bzidacitikira mpfumakazi inango yakucemeredwa Tatyana yomwe idaikhidwa m’kawoko thangwe ra cikhulupiro cace. Mpfumakaziyi idalewa kuti: “Inepano ndikhali ndekha-ndekha. Bzimwebzi bzidakhala bzakunesa pakuyamba. Inepano ndikhambakhala wakusunama.” Tsono mpfumakaziyi idayamba kukumbukira bza Yahova na cakulinga cace pakulewa bza dziko la pantsi ndipo idakwanisa kuzindikira kufunika kwa kupirira mabvuto yomwe iyo ikhagumana nayo. Bzimwebzi bzidacitisa kuti ikhale yakugwa mpfuwa na kugumana mphanvu kuti ikwanise kupirira. Iyo idati: “Kubvesesa thangwe lomwe likhacitisa kuti ndigumane na mayezoyo kudandithandiza kukumbukira kuti ndikugumana na mayezoyo thangwe ra kutumikira Yahova. Bzimwebzi bzidandithandiza kuti ndileke kumbandokumbukira bza mabvutoyo.”

10. Kodi n’ciyani comwe tingacite kuti Yahova akhale Tsendwa lathu?

¹⁰ Tsapanopali tin’gumana na mayezo yakunesa kwene-kwene ndipo tin’dzafunikira kuthemba Yahova kuposa kale-kale. Ndipopa ino ni nthawe yakuthemba kwene-kwene Yahova na kulimbisa cikhulupiro cathu cakuti iye an’dzatipasa bzomwe timbafunikira kuti tipitirize kukhala wakukhulupirika. Tsono kodi tingacite tani bzimwebzi? Tingacite bzimwebzi mwa kumbawerenga nkhani za m’Bibliya za atumiki wa Yahova wakale-kale na nkhani za abale na mpfumakazi wa ntsiku zino. Mbakumbukirani momwe Yahova ninga tsendwa adathandizira atumiki wace. Mbakumbukirani mwakuzika nkhani zimwezi. Mukacita bzimwebzi, imwepo mun’dzakwanisa kuwona kuti Yahova ni Tsendwa lanu.

TEWEZERANI MAKHALIDWE YA YAHOVA

11. Thangwe ranyi tikufuna kutewezera makhalidwe ya Yahova? (Onani kwadru yakuti “Bzakulinga Bzomwe Maswaka Yangakhale Nabzo.”)

¹¹ Kufika pano, takwanisa kuwona kuti thangwe ranyi Yahova ambacemeredwa kuti tsendwa. Tsapano tiniwona momwe tingatewezerere makhalidwe yace. Tikacita bzomwe tingakwanise kuti titewezere Yahova tin’dzakwanisa kulimbisa abale wathu. Mwa ciratizo, Jezu adapasa Simau dzina lakuti Khefa (lomwe kulisandulizira ni “Pedru”) ndipo limbathandauza “Kambali ka Tsendwa.” (Juwau 1:42) Mwa njira imweyi, Jezu adabvekesa kuti Pedru angadatsangalaza na kulimbisa cikhulupiro ca abale na mpfumakazi zace. Akulu wa gwere ambalewedwa kuti ali ninga “mthunzi wa tsendwa likulu.” Bzimwebzi bzikuthandauza kuti akulu ambakhotcerera abale wa m’gwere. (Zaiya 32:2) Tsono tentsenefe, sikuti akulu okha, tikambatewezera makhalidwe ya Yahova, tin’dzalimbisa winango m’gwere. — Aefezo 5:1.

12. Kodi tingakhale tani mbuto yakuthawira kwa abale wathu?

¹² Khalani mbuto yakuthawira kwa abale. Abale akaluza bzinthu bzawo thangwe ra malengwa ya pantsi ayai akathawa acisiya nyumba zawo thangwe ra nkhondo, tin’funika kuwatenga acikakhala kumui kwathu. Pomwe bzinthu bzikuyenda bziciipiratu mu “ntsiku zakumalizira” zino, bzikuwonekeratu padeca kuti ifepano tin’dzafunika kuthandiza abale na mpfumakazi zathu mwa kuwapasa bzomwe iwo akufunikira. (2 Timotio 3:1) Ifepano tingawatsangalazembo na kuwalatiza lufoyi lomwe iwo akufunikira mwakuthupi na mwauzimu. Njira ibodzi ya momwe tingacitire bzimwebzo ndiyo kumbaceza nawo ku Nyumba ya Umambo na kuwapasa mtsangalazo omwe iwo akufunikira. Ifepano tikufuna kuti gwere likhale mbuto ya mtendere yomwe abale na mpfumakazi angalimbisidwe na kulatizidwa lufoyi. Ntsiku zino, wanthu azinji ambacitira bzinthu bzakuipa anzawo ndipo bzimwebzi bzingacitise kuti abale na mpfumakazi zathu asuname na kubzibva kuti ambafunidwa lini. Ndipopa abale na mpfumakazi zathu akabwera pa mitsonkhano, tin’funika kucita ciri-centse kuti timbawalimbikise na kuwalatiza lufoyi.

13. Kodi akulu angakhale tani mbuto yakuthawira kwa winango? (Onani cithunzi-thunzi.)

¹³ Akulu angakhale mbuto yakuthawira ya abale omwe ambagumana na mabvuto yakusiyana-siyana. Pakacitika malengwa ya pantsi ayai pakafunikira thandizo la ulapi mwakamfulumize akulu ambacita ciri-centse kuti athandize abale wawo. Iwo ambaphatisambo basa Bibliya kuti apereke malango na cilimbikiso. Abale an’dzakhala wakutsudzuka kukumbira thandizo kwa mkulu omwe ambadziwika kuti ambalewalewa nawo mwakudeka mtima ndipo ambacita nyongo yakubvesesa momwe iwo akubvera. Na bzimwebzi, abale ambabzibva kuti mbakufunidwa ndipo bzin’dzakhala bzakupusa kwa iwo kuteweza malango ya m’Bibliya yomwe mkuluyo angapereke. — 1 Atesalonika 2:7, 8, 11.

14. Kodi tingalatize tani kuti ndife wakuthembeka?

¹⁴ Khalani wakuthembeka. Ifepano tikufuna kuti winango akhale na citsimikizo cakuti tin’dzawathandiza iwo akadzagumana na mabvuto. (Mimwani 17:17) Tsono n’ciyani comwe tingacite kuti abale ambatiwone kuti ndife wakuthembeka? Ifepano tingacite bzomwe tingakwanise kuti titewezere Yahova ntsiku na ntsiku. Mwa ciratizo, timbacita bzimwebzi mwa kumbateweza bzomwe tapicira na kumbakoya nthawe. (Mateu 5:37) Ndipo tingacitembo bzomwe tingakwanise mwakuthandiza munthu omwe akufunikira thandizo. Kuthumizira bzimwebzi, tin’funika kukwanirisa mabasa yomwe tapasidwa m’gwere mwakubverana na malango yomwe tapasidwa.

15. Kodi akulu omwe mbakuthembeka ambathandiza tani gwere?

¹⁵ Akulu omwe mbakuthembeka ni mphaso m’gwere. Mwa njira iponi? Abale ambabzibva bwino akadziwa kuti pa nthawe iri-yentse angakumbire thandizo kwa akulu. Abale ambabzibva kuti mbakufunidwa akadziwa kuti akulu mbakukonzeka kuwathandiza. Abale an’dzathemba kwene-kwene akulu akawona kuti iwo ambaphatisa basa Bibliya na mabukhu yathu sikuti nzeru zawo pomwe akupereka malango. Kuthumizira bzimwebzi, abale ambathemba akulu omwe ambauza lini wanthu winango nkhani za cintsintsi ndipo ambapitiriza kuteweza bzomwe adapicira.

16. Kodi ifepano pabodzi na winango timbagumana phindu liponi tikambateweza malango ya Yahova?

¹⁶ Mbacitani bzomwe Yahova akulewa kuti mpsabwino. Tingakhale ciratizo cabwino kwa winango tikambabvera Yahova pa bzinthu bzentse na kumbacita bzakusankhula mwa kuphatisa basa nfundo za m’Bibliya. Tikambapfunza Bibliya na kulimbisa cikhulupiro cathu kwa Yahova tin’dzakhala wakukhulupirika kwa iye na kuteweza mitemo yace. Tin’dzanamizidwa lini na nkhani zakunama ayai kukumbuka bzinthu bzomwe mpsakusiyana na bzomwe Yahova ambatipfunzisa. (Aefezo 4:14; Tiyago 1:6-8) Tikabva notisiya zakuipa tin’dzakhala wakugwa mpfuwa thangwe timbathemba na kukhulupira mapiciro ya Yahova. (Salimo 112:7, 8) Ndipo tin’dzathandizambo wale omwe akugumana na mabvuto. — 1 Atesalonika 3:2, 3.

17. Kodi akulu angathandize tani abale kuti apitirize kukhala na cikhulupiro cakulimba?

¹⁷ Akulu an’funika kukhala wakucita bzinthu mwacikati-kati, wakukumbuka bwino, wakucita bzinthu mwakulinganizika na wakuleka kumbangingimira nzeru zawo. Akulu ambathandiza winango kukhala wakugwa mpfuwa acikhala na cikhulupiro cakulimba kwa Yahova. Iwo ambalimbisambo gwere “akateweza bwino-bwino mafala yakukhulupirika.” (Tito 1:9; 1 Timotio 3:1-3) Na ciratizo cawo pabodzi na maulendo ya ubusa yomwe iwo ambacita, akulu ambathandiza apalizi m’gwere kuti ambatsonkhane mwakukhazikika, kupalizira na kucita pfunziro lawo la pawokha. Abale akagumana na mabvuto yomwe yakuwapasisa thupo, akulu angawakumbuse kufunika kwa kuthemba Yahova na kuikha makumbukidwe yawo pa mapiciro yace.

18. Thangwe ranyi ifepano tikufuna kutumbiza Yahova ticipitiriza kukhala pa uxamwali na iye? (Onani kwadru yakuti “Njira Yomwe Ingatithandize Kukhala pa Uxamwali na Yahova.”)

¹⁸ Pomwe tamala kupfunza makhalidwe manango ya Yahova, tingalewembo mafala ninga yomwe Mambo Davide adayalewa, yakuti: “Atumbizidwe Yahova Tsendwa langu.” (Salimo 144:1) Ifepano nthawe zentse tingathembe Yahova. Pa moyo wathu wentse, napo ticikalamba, ifepano timbakhulupira kuti Yahova an’dzapitiriza kutithandiza kukhala pa uxamwali bwakulimba na iye. Ndipopa ifepano tingalewe mwakutsimikiza kuti: “Iye ni Tsendwa langu.” — Salimo 92:14, 15.